مسرّت اور خوف!

رگ و پے میں مسرّت کا احساس جاگ اٹھتااور جسم کا ہر خلیہ مسکرا دیتاہے ۔ ہر سمت میں انسانی علم تیز ترین رفتار سے بڑھ رہا ہے لیکن پھر اندیشے جاگتے ہیں۔ آدمی سہم کے رہ جاتاہے ۔

ایک ایسی نئی دریافت ہوئی ہے ، جو ٹیلی ویژن اور کمپیوٹر سمیت بجلی سے چلنے والی تمام اشیا میں انقلاب کا پیش خیمہ ہو سکتی ہے ۔ ان چیزوں میں سائنسدانوںکو سب سے زیادہ پریشان کرنے والی بات توانائی کا ضیاع ہے ۔ اسے ایسے سمجھیے کہ جس لیپ ٹاپ پہ اس وقت میں ٹائپنگ کر رہا ہوں ، اس میں لگا ہوا پروسیسر بجلی استعما ل کرتے ہوئے مسلسل حرارت پیدا کر رہا ہے ۔ اگر خصوصی طور پر بنا ہوا ایک چھوٹا سا پنکھا ہوا پھینک کر اسے ٹھنڈا نہ کرتا ہوتو گرم ہو کر وہ کام کرنے سے انکا رکر دے گا۔

بجلی ایٹم کے گرد موجود الیکٹران کی مدد سے حرکت کرتی ہے ۔ ان اشیا میں خاص قسم کا ایک آلہ ''سپر کنڈکٹر‘‘(Super Conductor) پچھلے تیس برسوں سے سائنسدانوں کی تحقیق کا مرکز تھا۔ عام میٹریل میں الیکٹران حرکت کے دوران ایک دوسرے سے ٹکراتے او ربجلی ضائع کرتے چلے جاتے ہیں ۔ سپر کنڈکٹرز میں وہ ایک ترتیب یا قطار کی صورت اختیار کرتے ہوئے بجلی کو خود پر سے ایسے گزارتے ہیں کہ توانائی ضائع نہیں ہوتی ۔ اس مقصد کے لیے بیسویں صدی کے آغاز میں دریافت ہونے والے ان سپر کنڈکٹرز کو انتہائی حد تک یعنی منفی 273ڈگری سینٹی گریڈ تک ٹھنڈا کرنا پڑتا تھا۔ پھر 1980ء کی دہائی میں زیادہ درجہ ء حرارت یعنی مائنس 135ڈگری پہ کام کرنے والے سپر کنڈکٹر دریافت ہوئے۔ یہ دریافت اتفاقیہ تھی ۔ سائنسدان یہ بات سمجھنے سے قاصر تھے کہ وہ کون سی خصوصیات ہیں ، جو کسی شے کو زیادہ درجہ ء حرارت پہ کام کرنے والا سپر کنڈکٹر بناتی ہیں۔ دوسرے الفاظ میں ان کے پاس اشیاء کے باہمی ربط کا علم توتھا، ان کی حقیقت کا نہیں ۔ اس صورتِ حال کا سب سے بڑا نقصان یہ تھا کہ انسان اپنے طور پرکم سے کم توانائی خرچ کرنے والی بہترین ایجادات کے قابل نہ تھا۔

تیس سال تک سائنسدان تحقیق کرتے رہے ۔ آخر یونیورسٹی آف کیمبرج کے محققین نے یہ راز پالیا۔ طاقتور ترین مقناطیسی میدان پیدا کرنے سے انہیں یہ معلوم ہوا کہ بعض مخصوص اشیا کے ایٹموں کے گرد چکراتے الیکٹران ایسی لہریں پید اکرتے ہیں ، جس کے تحت زیادہ درجہ ء حرارت پہ بھی وہ سپر کنڈکٹر کا کردار ادا کرتے ہوئے توانائی کو ضائع ہونے نہیں دیتے ۔

اب مستقبل میں ایسے الیکٹریکل گرڈز سمیت بجلی فراہم کرنے اور اس سے چلنے والی ایسی اشیا کی ایجاد ممکن ہے ، جو انتہائی کم توانائی استعمال کر یں گی ۔اب سپر کمپیوٹرز کی اگلی بہتر نسل کے خواب دیکھے جا رہے ہیں ۔ یونیورسٹی آف سٹین فورڈ کے محققین نے اس باب میں قابل قدر پیش رفت کی ہے ۔ انہوں نے آئرن سلینائڈ نامی سپر کنڈکٹر ز بنائے ہیں ، جنہیں ٹائٹینیم اور آکسیجن جیسے عناصر کے اشتراک سے بنے ہوئے ایک میٹریل کے اوپر لگانے سے وہ توانائی کے سو فیصد استعمال کا کامیاب تجربہ کر چکے ہیں۔ سو فیصد!

یہ سب اپنی جگہ درست ہے لیکن سب سے سستی توانائی کا درست ترین استعمال ہمارا جسم کرتاہے ۔ یہ جان کر آپ حیران رہ جائیں گے کہ ہمارے جسم و دماغ بھی مکمل طور پر بجلی کے پیغامات کی مدد سے تمام افعال سرانجام دیتے ہیں ۔ اٹھنے بیٹھنے سے لے کر سوچنے سمجھنے اور خوراک ہضم کرنے سے لے کر دل دھڑکنے تک ، ہمارے رگ و پے میں الیکٹریکل اور کیمیائی پیغامات مسلسل دوڑ تے چلے جا رہے ہیں ۔ سب سے زیادہ حیران کن بات یہ ہے کہ دوسرے جانوروں کے برعکس ، انسانی دماغ جسم کا محض دو فیصد ہونے کے باوجود خوراک اور آکسیجن سے پیدا ہونے والی توانائی کا 20فیصد حصہ ڈکار جاتاہے ۔

جیسا کہ شروع میں عرض کیا تھا، ہر سمت میں انسانی علم تیز ترین رفتار سے بڑھ رہا ہے ۔ کرّۂ ارض کی تاریخ اور حیوانی باقیات (فاسلز) پہ تحقیق کرنے والے سائنسدان مدتوں اس بات پہ حیران ہوتے رہے کہ آج سے قریب پچاس کروڑ سال پہلے کیا ماجرا پیش آیا تھاکہ نت نئی نسلوں کے جانور انتہائی تیز رفتاری سے کرّہء ارض پہ پھیل گئے تھے ۔ اسی بات نے مشہورِ ماہرِ ارتقا چارلس ڈارون کو پریشان کیے رکھا ۔ اس کااظہار وہ اپنی مشہور کتاب "On the Origion of Species"میں بھی کرتاہے ۔ اس سے قبل سمندر تو جانداروں سے لیس تھے لیکن نرم جسم اور ہڈیوں سے محروم، یہ اور طرح کی زندگی تھی ۔ پھر کوئی عجیب واقعہ پیش آیا ۔ پہلی بار ٹھوس ڈھانچے والے نت نئی قسموں کے جانور کرّۂ ارض کے رگ وپے میں پھیلتے چلے گئے ۔آج جتنے بھی جانور ہمیں نظر آتے ہیں ، تقریباً ان سبھی کے اجداد اسی زمانے میں منظرِ عام پر آئے تھے ۔ میں اورآپ بھی انہی میں شامل ہیں ۔ اسے کرّۂ ارض کی تاریخ کا اہم ترین واقعہ کہا جاتاہے۔ اسے Darwin Dilemmaبھی کہا جاتاہے کہ چارلس ڈارون کے نظریات سے یہ متصادم تھا۔

تو حیرت زدہ سائنسدان مسلسل تحقیق کرتے رہے ۔ یونیورسٹی آف کیلیفورنیا کے محققین نے اب سراغ لگایا ہے کہ یہ عرصہ کل دو کروڑ سال پہ محیط تھا۔ ا س دوران سمندر کا پانی بلند ہو کر خشکی پہ چڑھ آیا تھا اور آکسیجن کی مقدار بے حد بڑھ گئی تھی۔ پانی اور آکسیجن، زندگی اور زندگی!

تو یوں ایک ایک کر کے سارے معمّے حل ہوتے جا رہے ہیں ۔ ظاہر ہے کہ کروڑوں برس پرانے ان واقعات پہ حتمی شہادت نہیں دی جا سکتی لیکن بہرحال ایسا ہر واقعہ کرّہ ٔ ارض پہ اپنے انمٹ نشان چھوڑ ہی جاتاہے ۔ پریشانی اس بات سے ہوتی ہے کہ آج سے قریب چالیس ہزار سال پہلے ایک اور حادثے کا آغاز ہوا تھا ۔ تقریباً اسی دور میں انسانی دماغ کو اس کی موجودہ شان و شوکت عطا ہوئی تھی ۔ اس کے بعد اگلے تیس ہزار سال میں براعظم شمالی امریکہ کے بڑے میملز میں سے آدھے ہمیشہ کے لیے ناپید ہو گئے تھے۔

میملز جانوروں کا وہ گروہ ہے ، جس میں انسا ن بھی شامل ہے !