بنیاد پرستی کا چھلاوا

لاہور میںمال روڈ پر یکم دسمبر کو ''دفاع پاکستان کونسل‘‘ کی ریلی میں شریک افراد کی تعداد پانچ ہزار سے زیادہ نہ تھی۔ نیلا گنبد سے ریگل چوک تک کے گنجان علاقے میں یہ ریلی کافی بڑی نظر آرہی تھی لیکن 36مذہبی پارٹیوں اور گروپوں کے اتحاد، مدرسوں کے وسیع و عریض نیٹ ورک، مالیاتی وسائل کو مدنظر رکھا جائے تو شرکا کی تعداد بہت کم تھی۔دفاع پاکستان کونسل اور جے یو آئی (ف) جیسی مذہبی جماعتوں کی سیاسی سرگرمیوں میں تیزی دراصل مستقبل قریب میں افغانستان میں متوقع تبدیلیوں کی تیاری ہے۔ اس سال جولائی میں امریکی سفیر کا اکوڑہ خٹک میں قائم ''دارالعلوم حقانیہ‘‘ کا دورہ اور دفاع پاکستان کونسل کے رہنما مولانا سمیع الحق سے مذاکرات اس امر کی نشاندہی کرتے ہیں کہ امریکی‘ افغانستان سے انخلا کے لئے ملائوں سے گٹھ جوڑ کرنے کے آپشن کو استعمال کرنا چاہتے ہیں۔ تمام تر امریکہ دشمن نعرے بازی کے ساتھ ساتھ ''ملاقاتوں کے یہ سلسلے‘‘ اس حقیقت کو واضح کرتے ہیں کہ حصول اقتدار ، ''مال‘‘ کی حصہ داری میں اضافے اور مشترکہ مفادات کے پیش نظر کسی بھی مرحلہ پر مصالحت ہوسکتی ہے۔

25مارچ 2013ء کو مولانا سمیع الحق نے جو ''انتخابی منشور‘‘ پیش کیا تھا۔ اس منشور میں مخلوط تعلیم کے خاتمے اور تمام بالغ مسلمانوں کو جہاد کی تربیت دینے کا عہد بھی کیا گیا تھا۔طالبان کے بیشتر نمایاں لیڈر مولانا سمیع الحق کی سر پرستی میں چلنے والے دیوبندی مدارس سے فارغ التحصیل ہیں۔ افغانستان کے بارے میں انہوں نے حل پیش کیا ہے کہ ''طالبان کو صرف ایک سال دیں، وہ افغانستان کو خوشیوں کا گہوارہ بنا دیں گے... ایک بار امریکی چلے گئے تو یہ سب ایک سال میں ہو جائے گا۔‘‘طالبان نے اپنے دور حکومت میں افغانستان کے عوام کو جو ''راحت‘‘ دی ہے وہ کسی سے ڈھکی چھپی نہیں ہے۔

پاکستانی فوجی اسٹیبلشمنٹ کے مذہبی دھڑے کے نمائندے اور ریٹائرڈ فوجی افسران کی ایسوسی ایشن کے بلا مقابلہ صدر منتخب ہونے والے جنرل حمید گل بھی دفاع پاکستان کونسل کی قیادت میں شامل ہیں۔ان کی پوری کوشش اور کاوش ہے کہ بنیاد پرستوں کے اس اتحاد کو مزید وسیع کیا جائے۔ لاہور میں خطاب کرتے ہوئے موصوف فرماتے ہیں کہ ''دفاع پاکستان کونسل پر مذہب کا لیبل لگانا غلط ہے۔ میں ایک سپاہی ہوں جس نے دفاع پاکستان کا عہد کیا ہوا ہے۔‘‘ دفاع پاکستان کونسل کے مطالبات اور نعرے گزشتہ کئی دہائیوں کی عمومی مذہبی سیاست سے مختلف نہیں ہیں۔ مثلاً ہندوستان دشمنی، امریکہ مردہ باد، نیٹو سپلائی بند کرو وغیرہ وغیرہ۔

حکمران طبقات اور ریاست کے کچھ دھڑوں کی جانب سے ایک ''یکجا مذہبی قوت ‘‘ کی تشکیل کی کوششیں لمبے عرصے سے جاری ہیں۔ یہ کوئی نئی بات نہیں ہے۔1960ء میں امریکی سامراج نے اسلامی بنیاد پرستی کو مسلمان اکثریتی ممالک میں اپنے سٹریٹجک مفادات کے پیش نظر پروان چڑھایا تھا۔ افغان ڈالر جہاد کے دوران ضیا الحق کی آمریت میں یہ پالیسی شدت اختیار کر گئی۔ طالبان اور امریکی کمپنی یونوکول کے درمیان گیس کی پائپ لائن کے معاملات طے پانے ہی والے تھے کہ 9/11کا واقعہ ہو گیا اور پہلے سے ترش تعلقات بالکل بگڑ گئے۔ 1977ء میں پی این اے سے لے کر 1988ء میں آئی جے آئی اور 2002ء میں متحدہ مجلس عمل تک،پاکستانی اسٹیبلشمنٹ بوقت ضرورت دائیں بازو کے مختلف اتحاد بناتی اور پروان چڑھاتی رہی ہے۔

اگر دفاع پاکستان کونسل میں مختلف مسالک کے گروپ شامل ہیں تو ہندوستان کی بھارتیہ جنتا پارٹی کو بھی کئی مسلمان گروپوں کی حمایت حاصل ہے۔ یہ سب مفاد پرستی کے مختلف انداز ہیں۔ پاکستان اور ہندوستان میں ہندو اور مذہبی بنیاد پرست ایک دوسرے کے بالواسطہ حمایتی ہیں۔ ایک حریف کے بغیر دوسرے کی

سیاست ادھوری ہے اور ایک کا جنون دوسرے کی وحشت کو ہوا دیتا ہے۔پاکستان میں اگر مذہبی بنیاد پرستی ظاہری طور پر سماج پر حاوی ہے تو ہندوستان میں نریندر مودی کا ابھار سیاست پر حاوی ہوتا ہوا نظر آرہا ہے۔ دونوں طرف محنت کش طبقے کی تحریک کا فقدان ، سماجی جمود اور معاشی و اقتصادی بحران اس رجعت کو بنیادیںفراہم کررہے ہیں۔دونوں ممالک کے حکمران طبقات ایک جدید قومی ریاست اور ترقی یافتہ سماج تشکیل دینے میں ناکام رہے ہیں۔

بھارتی سرکار کاکشمیری بارڈر پر 198میل کلو میٹر لمبی دیوار بنانے کا منصوبہ مغربی کنارے کی اسرائیلی دیوار سے مختلف نہیں ہے۔المیہ یہ ہے کہ اس دیوار کی تعمیر میں استعمال ہونے والا سیمنٹ سابقہ فلسطینی وزیر اعظم کی فیکٹری سے حاصل کیا جارہا ہے۔ تقسیم کی یہ دیوار بھارت کے حکمرانوں کی رجعتی سوچ اور تاریخی استرداد کی غمازی کرتی ہے۔بھارت کے 74بڑے سرمایہ دار اگر بنیاد پرست نریندر مودی کی حمایت کر رہے ہیں تو پاکستان کا سرمایہ دار طبقہ بھی مذہبی بنیاد پرستی کو فنانس کر کے اپنے مفادا ت کے لئے استعمال کرتا ہے۔

آزاد منڈی کی معیشت کے گن گانے والی فیشن ایبل سوسائٹی اپنے لبرل ازم کے ذریعے مذہبی بنیاد پرستی کا خاتمہ تو کیا اس کا مقابلہ بھی نہیں کر سکتی۔ قدامت پرستی کی یہ قوتیں نہ صرف اس نظام کی پیداوار ہیں بلکہ اسے قائم رکھنے کی بنیادی ضرورت بن چکی ہیں۔ سرمایہ داری کو حتمی نظام سمجھنے والے لبرل اور سیکولر دانشور اور سیاستدان مذہبی جنونیت کو بنیاد بنا کر سامراج کی حمایت حاصل کرتے ہیں۔ شام کی خانہ جنگی میں مذہبی جنونیوں کی حمایت، ایران سے امریکہ کی حالیہ ڈیل اور عرب حکمرانوں سے سامراج کے پرانے یارانے ہمارے سامنے ہیں۔ سرمایہ کی اس سیاست اور سفارت میں نظریہ ''ڈسپوزایبل‘‘ ہوتا ہے۔ سامراجی اپنے مالیاتی اور سٹریٹجک مفادات کے لئے بڑے سے بڑے ظلم اور خون ریزی سے بھی گزیر نہیں کرتے۔ تاریخ شاہد ہے۔ مغربی لبرل ازم کے ثنا خواں سول سوسائٹی کے خواتین و حضرات یا تو اصل کھیل کو ہی نہیں سمجھتے یا پھر سب کچھ جانتے بوجھتے ہوئے مال بنانے میں مصروف ہیں۔

یہ بھی حقیقت ہے کہ مذہبی بنیاد پرستی کا گڑھ سمجھے جانے والے اس ملک میں عوام نے مذہبی پارٹیوں کو کبھی 5فیصد سے زائد ووٹ نہیں دئیے۔ محنت کشوں کی روایتی قیادت نے غداریاں کی ہیں،معاشی حملوں نے محنت کش عوام کو گھائل کر رکھا ہے لیکن وہ مرے نہیں ہیں۔ اس ملک کی تاریخ گواہ ہے کہ عوامی تحریکوں کے سیلاب رجعت پرستی اور مذہبی تعصبات کو تنکوں کی طرح بہا لے جاتے ہیں۔ جس نسل نے 1989-69ء کی انقلابی تحریک اور 1970ء کے انتخابات دیکھے ہیں‘ وہ اس حقیقت کی گواہی دے سکتی ہے۔

روزنامہ دنیا ایپ انسٹال کریں