قانونی لوٹ مار

پاکستان جیسے تیسری دنیا کے ممالک میں سیاست کے ناخدائوں اور معیشت کے ماہرین کے پاس معاشی شرح نمو میں اضافے کے لئے بیرونی سرمایہ کاری یا فارن ڈائریکٹ انویسٹمنٹ (FDI)کا نسخہ ہی بچا ہے۔ سماج کے سب سے اہم پہلو، یعنی معیشت کے بارے میں سیاسی افق پر مسلط تمام سیاسی جماعتوں کی پالیسی مشترک ہے۔ لبرل اور سیکولر سیاستدان ہوں، شریعت کے نفاذ کی بات کرنے والی مذہبی پارٹیاں یا پھر دائیں بازو کے اصلاح پسند رجحانات، سب نیو لبرل سرمایہ داری، آزاد منڈی کی معیشت اور بیرونی سرمایہ کاری کے ذریعے معیشت کو چلانے پر یقین رکھتے ہیں۔ عمران خان ''ڈالروں کی بارش‘‘ کروانے کے چکر میں ہیں تو جماعت اسلامی جیسی مذہبی پارٹیاں امیر اسلامی ممالک کے حکمرانوں سے ''اسلامی سرمایہ کاری‘‘ کروانے کی خواہاں ہیں۔دیگر پارٹیاں چین جیسے ''پاکستان کے دوست ممالک‘‘ کو اکٹھا کر کے سرمایہ کاری اور اقتصادی امداد کی بھیک مانگنے کا پروگرام پیش کرتی ہیں۔ اس کے علاوہ بہت سے ایسے لبرل سرمایہ دار اور سیاستدان ہیں جو بھارت سے تجارت میں اضافے کا مطالبہ کررہے ہیں۔امریکی اور یورپ کی سامراجی اجارہ داریوں کو سرمایہ کاری کے لئے ''سازگار حالات‘‘ فراہم کرنے پر بھی کم و بیش سب متفق ہیں۔

2008ء کے تاریخی کریش کے بعد عالمی سطح پر شدید بحران کے شکار عالمی سرمایہ دارانہ نظام میں اتنی سکت نہیں بچی کہ بیرونی سرمایہ کاری کے ذریعے غریب اور ترقی پذیر ممالک کی معیشتوں کو نحیف اور وقتی سہارا ہی دے سکے۔بڑی سامراجی اجارہ داریاں اور سرمایہ دار مزید سرمایہ کاری کرنے سے خوفزدہ ہیں۔اس وقت یورپ، امریکہ اور چین جیسے ممالک سے وابستہ ملٹی نیشنل اجارہ داریوں نے ہزاروں ارب ڈالر آف شور بینکوں اور ٹیکس ہیونز میں چھپا رکھے ہیں۔ ایک مستند اندازے کے مطابق یہ رقم 32ہزار ارب ڈالر سے زیادہ ہے۔ یہ کمپنیاں سرمایہ کاری سے اس لئے کترا رہی ہیں کہ منڈی میں قوت خرید ہی موجود نہیں ہے۔ترقی یافتہ ممالک کا درمیانہ طبقہ، جو بحران سے پہلے قرضوں اور کریڈٹ فنانسنگ کی بنیاد پر وسیع منڈی فراہم کرتا تھا‘ اب رفتہ رفتہ سکڑتا اور مٹتا جارہا ہے۔ مظاہرے، ہنگامے اور ہڑتالیں یورپ کا معمول ہیں۔زائد پیداوار کا بحران آج کے ترقی یافتہ عہد میں اپنا اظہار ''زائد پیداواریت‘‘ کی شکل میں کررہا ہے۔ منڈی کی مندی کی وجہ سے امریکہ اور چین جیسے ممالک میں صنعتی سیکٹر کی ایک چوتھائی پیداواری صلاحیت زیر استعمال ہی نہیں ہے۔دونوں ممالک کی حکومتیں معیشت کو مسلسل اربوں ڈالر کے انجیکشن لگا رہی ہیں تاکہ کھپت اور طلب کا توازن مصنوعی طور پر برقرار رکھا جاسکے ۔اس عمل کوبورژوا معیشت کی پُرفریب زبان میں Quantitative Easingکہا جاتا ہے جس میں ریاست بڑے پیمانے پر نوٹ چھاپ کر یاقرض لے کر منڈی کو مصنوعی طور پر سرگرم رکھتی ہے۔دوسرے الفاظ میں سرمایہ داری کا حال منشیات کے عادی اس مریض کا سا ہوچکا ہے جو مارفین کا ٹیکہ لگائے بغیر دو قدم بھی نہیں چل سکتا۔

ان حالات میں جب ملٹی نیشنل کمپنیاں پہلے سے موجود پیداواری صلاحیت کو ہی بروئے کار نہیں لاپارہی ہیں تو مزید سرمایہ کاری کی کیا منطق بنتی ہے؟ سرمایہ دارانہ معیشت کے سنجیدہ ماہرین بھی بحران سے نکلنے کی قریب ترین تاریخ 2019ء کو قرار دے رہے ہیں۔جن ممالک میں تھوڑی بہت بحالی ہوئی بھی ہے وہاں نہ تو روزگارپیدا ہورہا ہے اور نہ ہی عام لوگوں کی آمدن میں کوئی اضافہ ہوا ہے کہ منڈی میں کھپت بڑھ سکے۔ان حالات میں سرمایہ کاری بہت کم اور ''قیمتی‘‘ ہوجاتی ہے۔ ملٹی نیشنل کمپنیاں تھوڑی سی سرمایہ کاری کی شرائط بھی انتہائی ظالمانہ اور سخت کردیتی ہیں جس سے محنت کا استحصال کئی گنا بڑھ جاتا ہے۔

پاکستان میں سرمایہ کاری کے امکانات دہشت گردی، بدعنوانی، عدم استحکام اور توانائی کے بحران کے باعث اور بھی مخدوش ہیں‘لہٰذا یہاں انتہائی کڑی شرائط پر ہی سرمایہ کاری ہوسکتی ہے۔حکمران ان تمام شرائط کے آگے جھکنے کے باوجود سرمایہ کاری میں کمی کے مسلسل رجحان کو روکنے میں ناکام ہیں۔آئی ایم ایف، ایشیائی ترقیاتی بینک اور ورلڈ بینک جیسے سامراجی مالیاتی ادارے ہر حکومت سے ملٹی نیشنل اجارہ داریوں کے استحصال کو فروغ دینے اور ان کی شرح منافع میں تیز تر اضافہ یقینی بنانے والی شرائط منواتے ہیں۔یہ شرائط منظر عام پر نہیں آتی ہیں۔عام طور پر ملٹی نیشنل اجارہ داریوں کی شرائط میں مزدوروں کی اجرتوں میں من مانی کٹوتی، مستقل ملازمتوں کی جگہ ٹھیکیداری نظام کا اجرا، تمام منافعوں اور دولت کی بنا کسی ریاستی روک ٹوک کے ملک سے باہر منتقلی اور ٹیکسوں میں چھوٹ جیسی شقیں شامل ہوتی ہیں۔ آج تک کسی حکومت نے عوام کو نہیں بتایا ہے کہ کس ملٹی نیشنل نے کتنا منافع کمایا اور ملک سے باہر کتنا سرمایہ منتقل کیا ۔تاہم سامراجی ڈاکہ زنی اور لوٹ مار کی شدت کا مبہم سا اندازہ سرکاری خانہ پُری کے لئے پیش کئے گئے اعداد و شمار سے لگایا جاسکتا ہے۔اس ہفتے شائع ہونے والی ایک رپورٹ کے مطابق جولائی 2013ء سے فروری 2014ء کے درمیانی عرصے میں ملٹی نیشنل کمپنیوں نے 728ملین ڈالر کے منافعے ملک سے باہر منتقل کئے ہیںجبکہ اسی عرصے کے دوران بیرونی سرمایہ کاری کی مد میں آنے والی کل رقم صرف 606ملین ڈالر ہے۔یعنی کل سرمایہ کاری ان اجارہ داریوں کے ملک سے باہر جانے والے منافعوںسے بھی کم ہے۔ دلچسپ بات یہ ہے کہ پچھلے مالیاتی سال کے اسی عرصے کے دوران بیرون ملک منتقل ہونے والی رقم 548ملین ڈالر تھی۔یہ صرف چند مہینوں کا حال ہے تو پورے سال میں کتنا سرمایہ ملک سے باہر جاتا ہوگا؟ اور پچھلے 30سال میں منافع بخش شعبوں پر حاوی اجارہ داریوں نے کتنے ارب یا کھرب ڈالر لوٹے ہوں گے؟اور پھر پچھلے 67سال میں؟ بیرونی قرضہ 60ارب ڈالر ہے، یہ جتنا ادا ہوتا ہے اس سے کہیں زیادہ بڑھ جاتا ہے۔محنت کش عوام کی ہر آنے والی نسل سرمائے کے اس بڑھتے ہوئے بوجھ تلے دبتی جارہی ہے۔غریب، غریب تر اور امیر، امیرتر ہوتا جارہا ہے۔ کروڑوں انسانوں کی ذلت کتنی سستی اور سرمایہ کتنا مقدس ہے۔

اس سامراجی استحصال اور لوٹ مارکے بارے میں سیاستدان، اسمبلیاں، کارپوریٹ میڈیااور ''دانشور‘‘، سب خاموش ہیں۔ان سرمایہ کاریوں پر سیاسی حکمران اور افسر شاہی کتنا کمیشن کماتے ہیں؟ یہ بھی انتہائی خفیہ راز ہے۔ 8سال کے دوران جنہوں نے اربوں ڈالر کمانے کے باوجود قلیل سی واجب الادا رقم بھی ادا نہیں کی‘ ان کے کاروبار نہ صرف چل رہے ہیں بلکہ منافعے مسلسل بڑھ رہے ہیں۔الٹا انہوں نے ریاست کے ذمے کئی قسم کے قرضے اور واجبات ڈال دئیے ہیں۔لیکن جب چور سپاہی ایک ہی کھیل کا حصہ ہوں تو کون کسے پوچھتا ہے؟ کہانی یہاں ختم نہیں ہوتی۔ پتہ چلا ہے کہ نجکاری کمیشن نے ایشیائی ترقیاتی بینک سے 20ملین ڈالر ''ماہرین‘‘ کی خدمات حاصل کرنے کے لئے مانگ لئے ہیں۔یہ ''ماہرین‘‘ کہاں سے آئیں گے اور کس اثاثے کا کیا بھائو لگائیں گے، یہ سب کو پتاہے۔

لیکن یہ تو سامراجی لوٹ مار کا صرف ایک پہلو ہے۔سامراجی قرضوں پر شرح سود، خام مال کی قیمتوں کا تعین، مقامی حکمرانوں کی مدد سے زمینوں پر قبضے، منافع بخش شعبوں کو دانستہ طور پر برباد کروانا اور پھر مٹی کے بھائو خریدنا، کرنسی کی قیمت میں اتار چڑھائو کے ذریعے لوٹ مار، کارٹل بنا کے منڈی پر قبضہ... غرضیکہ واردات کے طریقوں اور ہتھکنڈوں کی طویل فہرست ہے۔ اس نظام زر پر یقین رکھنے والی ہر پارٹی، ہر سیاستدان، ہر حکومت اور ہر حکمران، خون نچوڑنے والی اس مشین کا ایک پرزہ ہے۔لینن نے کہا تھا کہ ''سرمایہ داری کی درندگی کا کوئی انت نہیں ہے۔‘‘جب تک سرمائے کا یہ راج قائم رہے گا ، محنت رسوا ہوتی رہے گی اور یہاں کے باسی محرومی، غربت اور ذلت کی اتھاہ گہرائیوں میں گرتے چلے جائیں گے۔