علاج کا بیوپار!

ایک تواتر و تسلسل کے ساتھ، اٹھتے بیٹھتے ہمیں بتایا جاتا ہے کہ مقابلہ بازی کی غیر یقینی صورت حال اور منافعے کی ہوس ہی سائنس و ٹیکنالوجی کو نئی ایجادات اور دریافتوں کی طرف لے جانے کا باعث بنتے ہیں۔ہمیں بتایا جاتا ہے کہ آزاد منڈی کی معیشت ہی سماجی ترقی کا حتمی راستہ ہے۔حقیقت اس پروپیگنڈے سے مختلف ہی نہیں الٹ ہے۔جملہ حقوق یا رجسٹرڈ (Patents)، منافع خوری اور نجی ملکیت وہ سفاک رکاوٹیں ہیں جن کا سامناشاید ہی سائنس کو کبھی تاریخ میں کرنا پڑا ہو۔ سرمایہ دارانہ نظام انسانی ترقی کے ہر شعبے کے راستے کی سب سے بڑی رکاوٹ بن چکا ہے۔
سرمائے کی پیداکردہ لالچ اور ہوس کا ایک اہم شعبہ دواسازی ہے جو ایسے مریضوں کو دوائی دینے کی نیت اور ارادے سے محروم ہے جو سرمایہ داروں کی تجوریاں بھرنے کی اہلیت نہیں رکھتے۔تمام بڑی عالمی دواساز اجارہ داریاں ریسرچ اور ڈیویلپمنٹ کے حوالے سے انسان دشمن عزائم پر عمل پیرا ہیں۔مثلاً ایڈز کے مریض اپنے علاج پر ہر سال ہزاروں لاکھوں ڈالرخرچ کرنے پر مجبور ہیں۔2003ء میں جب Fuzeonنامی دوا متعارف کرائی گئی تو اس کی قیمت دیکھ کر ہی اس موذی مرض میں مبتلا لوگوں کی امیدوں پر پانی پھر گیا۔یہ دوائی ایڈزکے مریض کو سال بھر کے علاج کے لیے 20ہزار ڈالر (20لاکھ روپے)میں پڑتی تھی۔یہ دوا بنانے کی عالمی اجارہ داری جس کمپنی کے پاس تھی اس کے چیئرمین اور چیف ایگزیکٹو فرانز ہومر نے دوائی کی زیادہ قیمت کا جواز پیش کرتے ہوئے کہا:''ہم جو بھی نئی دواتیارکرتے ہیں،اس خدمت کامناسب معاوضہ بھی اپنا استحقاق سمجھتے ہیں‘‘۔ یہاں ''خدمت کا مناسب معاوضہ‘‘ سے مراد کئی سو فیصد شرح منافع ہے جو ادویات کو آبادی کی اکثریت کی پہنچ سے دورکر دیتی ہے۔ آبادی کا ایک قلیل سا حصہ اس ''خدمت‘‘ کو خریدنے کی اہلیت رکھتا ہے۔
دواساز کمپنیوں کا مقصد مرض کا علاج نہیں بلکہ منافع ہے۔ ایک دواسازکمپنی کے لیے مرض میں مبتلا انسان کسی طور ایک ''مریض‘‘ نہیں ہوتا بلکہ ایک ''گاہک‘‘ ہوتاہے۔مرض کی اذیت جتنی زیادہ ہوگی، گاہک کی مجبوری اور کمپنی کا منافع بھی اسی تناسب سے بلند ہو گا۔ادویات سازی کی عالمی صنعت کا یہ ہمیشہ سے مالیاتی مفاد رہا ہے کہ ان کا گاہک بار بار ان کی ادویات خریدنے پر مجبور ہو؛چنانچہ ایسی ریسرچ پر توجہ دی جاتی ہے جس کے ذریعے مرض کا مستقل علاج نہ ہوسکے۔ دوا ساز ادارے ایسی دوائیاں تخلیق کرنے پر زور دیتے ہیںکہ مریض انہیں ساری عمر استعمال کرنے پر مجبور ہو جائیں۔علاوہ ازیں ان شعبوں میں ریسرچ کی جاتی ہے جو زیادہ منافع بخش ہیں۔ مثلاً تب دق جیسی بہت سی بیماریاں دنیا میں عام ہیں جو سراسر غربت کی پیداوار ہیں۔ غریب چونکہ مہنگی ادویات نہیں خرید سکتے ؛ لہٰذا یسی بیماریوں کے موثر علاج یا پیشگی تدارک پر تحقیق منافع بخش نہیں ہے۔ اس کے برعکس''گوری رنگت‘‘ اور ''گھنے بالوں‘‘ جیسے امیر طبقے کے شوق پورا کرنے والی ادویات دن رات مارکیٹ میں آتی ہیں۔
کچھ عرصے سے ایڈزکے علاج کے لیے ایک ویکسین تیار کرنے کی ضرورت پر زور دیا جارہا ہے جوایک موثرمائیکرو بائیسائیڈ ہو۔ اس مقصد کے لیے زیادہ تر فنڈز حکومت یا پھر نان پرافٹ تنظیموں کی طرف سے مہیا کیے جا ر ہے ہیں۔دواساز صنعت اس مہلک بیماری سے نمٹنے کے لیے کوئی فنڈنگ نہیں کررہی ہے۔وہ ایسا کریں بھی کیوں؟ کرہ ارض پر کوئی بھی کمپنی کسی ایسے کام پر کبھی سرمایہ نہیں لگائے گی جس سے ان کا کاروبار ہی بند ہوجائے۔
اسی قسم کے مسائل ہمیں ادویات کی تحقیق کے دوسرے شعبوں میں بھی نظر آتے ہیں۔کینسر جیسے موذی مرض کے علاج کے لیے 2007ء کے شروع میں ایک بڑی پیش رفت سامنے آئی تھی۔یونیورسٹی آف البرٹا کے محققین نے دریافت کیا کہ ایک واحد اور اکلوتا مالیکیول ڈی سی اے کینسر کے خلیوں میں Mitochondria (جوخلیے کا پاورہاؤس ہوتا ہے)کو دوبارہ سرگرم کر سکتا ہے۔ لیبارٹری کے تجربات سے یہ بات ثابت ہوئی کہ ڈی سی اے کینسر کی بیشتر قسموں کے خلاف موثر وکارگر ہے۔یوں واضح اور یقینی امکانات سامنے آگئے کہ کینسر کا حقیقی علاج دریافت ہونا اب کوئی مسئلہ نہیں رہا۔ لیکن ڈی سی اے کو کلینیکل سطح پر سمجھنے، پرکھنے اور بروئے کار لانے کے لیے جو رکاوٹ سامنے آئی وہ ''فنڈز‘‘کی عدم فراہمی تھی۔ اس عدم دلچسپی یا عدم فراہمی کی وجہ سیدھی ہے کہ ڈی سی اے کے جملہ حقوق (Patent)محفوظ نہیں اور ایسا ہو بھی نہیں سکتا۔ اس وجہ سے عالمی دوا ساز کمپنیاں اس دوا کو بنانے کے لیے سرمایہ فراہم کرنے کا کوئی خطرہ اٹھانے کے لیے تیار نہیں ہیں کیونکہ یہ دوا کسی طور بھی ان کے لیے منافع بخش نہیں بن سکتی۔ انہیں اس سے کوئی دلچسپی نہیں کہ یہ دوا بنے یا نہ بنے،کینسرکا علاج اور خاتمہ ہویا نہ ہو۔اس حوالے سے تحقیق کرنے والوں سے معذرت کر لی گئی کہ اگر وہ اپنے کام کو جاری رکھنے کے اتنے ہی شوقین ہیں تو اس کے لیے درکار رقم کا بھی خودہی بندوبست کریں۔متعلقہ سائنسدان حکومت اورنان پرافٹ اداروں سے فنڈز کے لیے آج تک بھیک مانگ رہے ہیں۔
معروف آن لائن امریکی جریدے ''ہفنگٹن پوسٹ‘‘ پر کچھ دن پہلے ایک مضمون ''امریکہ کو دیوالیہ کر دینے والی دوائی‘‘ کے عنوان سے شائع ہوا ہے جس میں دواسازی سے وابستہ ملٹی نیشنل کمپنیوں کی دیوہیکل لوٹ مار سے متعلق ہوشربا انکشافات کیے گئے ہیں۔ مضمون میں ہیپاٹائٹس سی کے علاج کے لیے Gilead Sciences نامی کمپنی کی نئی دوا Solvadiکوکیس سٹڈی کے طور پر پیش کیا گیا ہے۔ امریکی حکومت کی منظوری کے بعد یہ دوا دسمبر 2013ء میں مارکیٹ میں آئی ہے جس کے 12ہفتوں کے کورس کی قیمت 84 ہزار ڈالر (84لاکھ روپے) ہے۔ یوں دوا کی ایک گولی کی قیمت ایک ہزار ڈالر بنتی ہے۔اس کے برعکس گولی کی پیداواری لاگت صرف 68 ڈالر ہے۔متعلقہ فارمولے پر اس کمپنی کے جملہ حقوق 2028ء تک برقرار رہیں گے یعنی اگلے 13سال تک یہ کمپنی منہ بولی قیمت وصول کرتی رہے گی۔ رپورٹ کے مطابق کمپنی صرف 2014ء میں اس دوا کی فروخت سے 12.4ارب ڈالر کا منافع کما چکی ہے۔دوا ساز کمپنیاں عام طور پر ریسرچ کی لاگت کو ادویات کی بلند قیمتوں کا جواز بنا تی ہیں جو سراسر جھوٹ ہے۔دوسری تمام معروف ادویات کی طرح اس دوائی پر بھی زیادہ تر ریسرچ سرکاری شعبے میںسرکاری فنڈنگ ، یعنی عوام کے پیسے سے ہوئی ہے۔ رپورٹ کے مطابق ''نجی شعبے کی تمام ریسرچ اینڈ ڈویلپمنٹ کی لاگت صرف 500 ملین ڈالر تھی جو دوا کے مارکیٹ میں آنے کے چند ہفتوں کے اندر ہی پوری ہوگئی‘‘۔
یہ صورت حال کسی ایک دوا یا مخصوص کمپنی تک محدود نہیں ہے۔ دنیا بھر میں ادویات پر زیادہ تر ریسرچ سرکاری یونیورسٹیوں میں عوامی پیسے سے ہوتی ہے جسے نجی شعبہ Patentکے ذریعے یرغمال بنا کر انسانی فلاح کے بجائے ہوشربا منافعوں کا ذریعہ بنا لیتا ہے۔منافع اور صحت ایک دوسرے سے متضاد ہیں۔''مقابلہ بازی‘‘ پر مبنی ''آزاد منڈی‘‘ کا ہی شاخسانہ ہے کہ امریکہ کا نظام صحت دنیا میں سب سے مہنگا ہونے کے باوجود سب سے نااہل اور غیر موثرہے۔ اس کے برعکس منافع کی ہوس سے پاک کیوبا کا ریاستی نظام صحت دنیا میں سب سے زیادہ موثر شمار ہوتا ہے جہاں اوسط عمر امریکہ سے زیادہ ہے۔ امریکہ اپنے جی ڈی پی کا 18فیصد صحت پر خرچ کرتا ہے جبکہ کیوبا صرف 7فیصد اخراجات کے ساتھ اس سے کہیں بہتر نتائج حاصل کر رہا ہے۔
آج سائنس اور ٹیکنالوجی جس مقام پر ہے وہاں نہ صرف کینسر اور ایڈز جیسی لا تعداد ''لاعلاج‘‘ بیماریوں کا علاج دریافت کرنا ممکن ہے بلکہ صحت اور علاج کی جدید ترین سہولیات کرہ ارض کے ہر انسان کو فراہم کی جاسکتی ہیں۔بیشتر امراض ایسے ہیں جن کا تدارک وقت سے بہت پہلے ہی کیا جا سکتا ہے بشرطیکہ مناسب نظام صحت وضع کیا جائے۔ لیکن مسئلہ منافع اور شرح منافع کا ہے جس کے تحت مالیاتی ترجیحات کا تعین ہوتا ہے۔ 20 ہزار ارب ڈالر ہر سال صرف اسلحہ سازی پر خرچ ہوتے ہیں۔ 32 ہزار ارب ڈالر ملٹی نیشنل کمپنیوں اور سرمایہ داروں نے آف شور بینکوں کی تجوریوں میں یرغمال بنا رکھے ہیں۔ یہ اتنا پیسہ ہے کہ اگر تباہی اور استحصال کے بجائے نسل انسان کی فلاح و بہبود پر خرچ کیا جائے تو ہر انسان کو جدید سائنسی علاج سمیت بلند ترین معیار کی خوراک، رہائش اور تعلیم فراہم کی جاسکتی ہے۔محرومی، لاعلاجی اور مانگ سے پاک انسانی معاشرے کا خواب تبھی شرمندہ تعبیر ہوسکتا ہے جب دولت اور ذرائع پیداوار کو مٹھی بھر حکمران طبقے کی جکڑ سے آزاد کر وا کے منافعوں کی بجائے نسل انسان کی ضروریات کے تحت بروئے کار لایا جائے!

روزنامہ دنیا ایپ انسٹال کریں