کشمیر کی تحریک اور حکمرانوں کی بوکھلاہٹ

بھارتی مقبوضہ کشمیر میں حالیہ تحریک کے اہم مرکز کلگام سے مسلسل پانچویں بار منتخب ہونے والے 'کمیونسٹ پارٹی آف انڈیا (مارکسسٹ)‘ کے رہنما اور رکن کشمیر اسمبلی محمد یوسف تاریگامی نے ہندوستان کے کثیرالاشاعت اخبار اور میڈیا نیٹ ورک 'دی وائر‘ کو انٹرویو دیتے ہوئے 19جولائی کو کہا تھا کہ ''کشمیر میں پہلے بھی تحریکیں چلتی رہی ہیں لیکن حالیہ سرکشی کی جو شدت ہے وہ پہلے کبھی دیکھنے میں نہیں آئی‘‘۔آج تقریباً 65 دن گزر گئے ہیں لیکن یہ بغاوت تھمنے کا نام نہیں لے رہی۔ اس میں جان دینے والے کشمیریوں کی تعداد 80 تک پہنچ چکی ہے اور اب تک 7550 افراد زخمی ہوئے ہیں جن میں کئی ایک کی بینائی فورسز کی جانب سے پیلٹ گن کے استعمال کی وجہ سے جا چکی ہے۔

ایسا محسوس ہوتا ہے کہ کشمیر کی پوری نسل بغاوت پر اتر آئی ہے۔ یہ کارپوریٹ میڈیا کے زور پر چلنے والے ارب پتی سرمایہ داروں کے گماشتہ سیاستدانوں کے دھرنے اور ریلیاں نہیں ہیں جن میں شرکا کو صبح کا ناشتہ اور دوپہر اور شام کا پرتکلف کھانا پیش کیا جاتا ہے اور تمام تر بیان بازیوں کے باوجود ریاست میزبان بنی ہوتی ہے۔ یہ ایک دیوہیکل اور جابر ریاست کے ساتھ کشمیری عوام کا بے رحم ٹکرائو ہے، ننگے جبر سے ٹکرا جانے والی تحریک۔ کشمیرکے نوجوانوں اور محنت کشوں کے لئے زندگی موت کی لڑائی ہے، آگ اور خون کا کھیل ہے۔

یہ تاریخی حقیقت ہے کہ جبر و استحصال کے خلاف جب عوام کی بغاوت پر مبنی ایسی وسیع تحریکیں ابھرتی ہیں تو بظاہر ناقابل شکست نظر آنے والی ریاستیں اور حکمران بھی بوکھلاہٹ، ذلت اور شرمناک پسپائی کا شکار ہو جاتے ہیں۔ عزم اور قربانیوں کے جذبے سے سرشار چھوٹی سی وادی کی تحریک نے 'دنیا کی سب سے بڑی جمہویت‘ اور اس پر برا جمان ہندو بنیاد پرستی کی سرکارکو ہلا کے رکھ دیا ہے۔ مودی سرکار کی ساری شان و شوکت، امریکی سامراج سے گہرے یارانے، بیرونی دوروں کی''سیلفی سفارتکاری‘‘ اور چمک دمک، سب کچھ ماند پڑ گیا ہے۔

مودی سرکار کے برے دن آ گئے ہیں۔ کشمیر بھڑک اٹھا ہے اور اس دوران 18کروڑ محنت کشوں کی عام ہڑتال نے طبقاتی جدوجہد کا ایک نیا آغاز کر دیا ہے۔ کشمیر میں بھارتی حکمرانوں کے تمام ہتھکنڈے ذلت آمیز شکست سے دوچار ہوئے ہیں۔ جبر جب کام نہ کر سکا تو آئینی، قانونی اور سیاسی فریب سے تحریک کو زائل کرنے کی کوشش کی گئی لیکن یہ واردات بھی ناکام رہی۔ جو پارلیمانی وفد کشمیر بھیجا گیا اس کا سربراہ کٹر ہندو بنیاد پرست اورکرپشن کے لئے بدنام زمانہ راجناتھ سنگھ تھا۔ یہ پارلیمانی فریب اپنے آغاز سے ہی ناکام تھا۔ عوام نے جب دہائیوں تک ستم برداشت کئے ہوں، نسلیں قربان ہوئی ہوں تو ایسے میں مصالحت بھلا کیسے ہو سکتی ہے اور مفاہمت کون برداشت کر سکتا ہے؟ اس لئے کشمیر میں جہاں پی ڈی پی کی حکومت کو عوام کٹھ پتلی سے زیادہ کچھ نہیں سمجھتے وہاں ''علیحدگی پسند‘‘ رہنمائوں کے لئے بھی مذاکرات سیاسی خود کشی سے کم نہ تھے۔ لیکن اصل مسئلہ یہ ہے کہ اس تحریک میں کشمیر کے عام باسیوں کی نمائندگی کون کر رہا ہے؟

اس سرکشی کو ہندوستان کا کارپوریٹ میڈیا اور دائیں بازوکے سیاستدان پاکستان کی تخریب کاری قرار دے رہے ہیں۔ پچھلے ستر سال کا تجربہ یہ ثابت کرتا ہے کہ بیرونی تخریب کاریوں سے تحریکیں نہیں ابھرتیں۔اس کے برعکس حکمران آپسی لڑائی میں جب قومی آزادی کی تحریکوں کا استعمال کرنے کی کوشش کرتے ہیں تو اس سے تحریک کمزور ہوتی ہے۔ گھاگ ترین خفیہ ایجنسیاں بھی بٹن دبا کر تحریکوں کو چلا اور بند نہیں کر سکتیں۔ علاوہ ازیںکسی کی گماشتگی میں پنپنے والی سیاست، تنظیم یا جعلی تحریک میں اتنی سچائی، جرأت اور ہمت نہیں ہو سکتی کہ وہ اتنی دیوہیکل ریاست سے ٹکرا سکے اور وسیع حمایت حاصل کر سکے۔

ہندوستان اور پاکستان کے کئی ملا اور دائیں بازوکے رجحانات کشمیر کی قومی آزادی کی تحریک کو مذہبی رنگ بھی دینے کی کوشش کرتے ہیں۔ یہ درست ہے کہ کسی بھی مذہب کے لوگوںکے عقیدے کی تضحیک کی جائے یا زچ کرنے کی کوشش کی جائے تو وہ اس کے خلاف رد عمل ضرور کرتے ہیں۔ لیکن کشمیر کی تحریکوں میں حصہ لینے والوں کے مطالبات دیکھیں، ان کے لباس اور گفتگو دیکھیں، ان کی ثقافت کی تاریخ اور موجودہ کیفیت کا جائزہ لیں تو کہیں بھی اس کے مذہبی ہونے کا شائبہ تک نہیں ملتا۔اسی طرح جو اس کو صرف سیکولر قوم پرست تحریک سمجھتے ہیں وہ بھی کشمیر کے موجودہ بحران، معاشی اور سماجی گھٹن اور محرومی سے نابلند دکھائے دیتے ہیں۔

حریت کانفرنس کا جائزہ لیا جائے تو اس میں متضاد نظریات اور افکار رکھنے والے لیڈر ہیں جو اسلامی بنیادپرستی سے لے کر سیکولر قوم پرستی تک کے رجحانات کی نمائندگی کرتے ہیں۔ ان کو کس نے، کب اور کیسے 'لیڈر‘ بنا دیا ہے؟ یہ سوال غور طلب ہے۔ جہاں تک انتخابات میں ووٹ دینے کا تعلق ہے تو اس تحریک میں بھی بہت بڑی تعداد میں ایسے افراد موجود ہیں جو اپنے فوری مسائل اور مطالبات کے پیش نظر ووٹ دے کر رائج الوقت سیاست سے کچھ حاصل کرنے کی کوشش کرتے رہے ہیں۔ لیکن یہ نظام جہاں اس پورے خطے کو بھوک، بیروزگاری اور محرومی کے سوا کچھ نہیں دے پایا وہاں کشمیر میں عام لوگوں کے مسائل بھلا کیسے حل ہو سکتے ہیں۔روٹی، کپڑا، مکان اگر لوگوں کو باعزت طور پر مل پاتا اور روزگار، تعلیم، رہائش، بجلی، پانی، ٹرانسپورٹ وغیرہ کے مسائل حل ہوئے ہوتے تو شاید ''مسئلہ کشمیر‘‘ ہی حل ہو جاتا۔ اس پس منظر میں دیکھا جائے تو کشمیر کی حالیہ تحریک کے پیچھے کوئی ایک وجہ کارفرما نہیں ہے۔ بی جے پی حکومت کی سرپرستی یا شہ میں ہندو بنیاد پرستوں کا باقی ماندہ ہندوستان میں مذہبی جبر اور مسلمانوں سمیت مذہبی اقلیتوں کے خلاف منافرت پھیلانے کی زہریلی مہم اس تحریک کو بھڑکانے کا عامل تھا۔ لیکن زیادہ اہم اور بنیادی وجہ بڑھتی ہوئی بیروزگاری اور معاشی مسائل ہیں۔ لائن آف کنٹرول کے دونوں طرف کے کشمیری نوجوانوںکا دوسرے خطوں میں روزگارکے لئے انخلا سارے برصغیر سے زیادہ ہوگیا ہے۔ لیکن دنیا بھر میں معاشی بحران کی وجہ سے اب یہ راستے بھی بند ہو رہے ہیں۔ اس لئے لوگوں کی معاشی محرومی، سماجی و ثقافتی بیگانگی اور ریاستی جبر اس بغاوت کے محرکات ہیں۔

بہت سے تاریخی عوامل بھی کارفرما ہیں لیکن تحریک کو مذہبی قرار دینا اس کی تضحیک کے مترادف ہے۔

یہ بھی حقیقت ہے کہ بالفرض حق خود ارادیت مل جاتا ہے تو ضروری نہیں کہ کشمیری دونوں میں سے کسی ایک ریاست کے ساتھ الحاق کا ووٹ دیں گے۔ زیادہ امکانات ہیں کہ وہ ایک علیحدہ کشمیر چاہیںگے۔ لیکن نام نہاد ''عالمی برادری‘‘ اور اقوام متحدہ جیسے لاٖغر، بے معنی اور عالمی طاقتوں کے گماشتہ ادارے محض سراب اور فریب ہیں۔ میڈیا، حکمران اور بعض اوقات قومی آزادی کی تحریکوں کی قیادتیں بھی ایسے اداروں سے جو امیدیں وابستہ کرواتے ہیں وہ تحریک کے خلاف جرم ہے۔ آج تک ایسا کون سا سنجیدہ یا کلیدی مسئلہ ہے جو اقوام متحدہ حل کروا پائی ہے۔ آج تو یہ ادارہ ماضی کی نسبت کہیں زیادہ نحیف ہو چکا ہے۔

10 ستمبر کو بھارتی فوج کے سربراہ جنرل دلبیر سنگھ سہاگ نے کشمیر کا دورہ کر کے وہاں مزید افواج بھیجنے کا اعلان کیا ہے۔ یہ اقدام طاقت کی بجائے بھارتی ریاست کی کمزوری اور خوف کی غمازی کرتا ہے۔کشمیر میں پہلے ہی چھ لاکھ سے زیادہ فوجی موجود ہیں۔ لیکن موجودہ تحریک کو اگر انقلابی قیادت، واضح پروگرام اور برصغیر کے دوسرے خطوں سے عملی یکجہتی اور حمایت حاصل نہیں ہوتی تو یہ تحریک بھی بکھر سکتی ہے۔ تاہم اس سرکشی نے صرف کشمیر ہی نہیں بلکہ پورے برصغیر کے نوجوانوں کو جبر اور استحصال کے اس نظام سے ٹکرا جانے کا پیام دیا اور درخشاں مثال قائم کی ہے۔ آنے والے دنوں میں یہ احساس شکتی حاصل کرے گا اور بڑھے گا۔ طبقاتی جدوجہد اور ٹکرائو پھر کہیں نہ کہیں جلد ابھرے گا۔ کسی بھی خطے میں انقلابی فتح پورے جنوبی ایشیا کے محنت کشوں اور نوجوانوں کے لئے مشعل راہ بنے گی اور عالمی منظر نامہ تبدیل کر ڈالے گی۔

روزنامہ دنیا ایپ انسٹال کریں