حصارِ ستم

9 اکتوبرکو کوئٹہ میں پچھلے 18 سال سے جاری درندگی کے معمول نے ایک بار پھر اپنا احساس دلایا۔ پانچ ہزارہ سبزی فروشوں کو بے دردی سے کاسی روڈ پر قتل کر دیا گیا۔ 1999ء میں اس خونیں کھلواڑ کے شروع ہونے کے بعد سے اب تک 1400 سے زائد حملوں میں ہزارہ آبادی کے 550 سے زائد معصوم انسانوں کا قتل عام کیا گیا۔ اس بہیمانہ قتل کی واردات کے بعد 'چوک شہدا‘ پر ماضی میں درجنوں مرتبہ ہونے والے احتجاجوں کی طرح ایک مرتبہ پھر احتجاج ہوا۔ ہزارہ کمیونٹی کے سینکڑوں مرد و خواتین نے پھر باہر نکل کر آہ و بکا کی۔ وزیر اعلیٰ بلوچستان نے ''شدید مذمت‘‘ کی اور صوبائی وزیر داخلہ سرفراز بگٹی چوک شہدا پہنچے، جہاں انہوں نے متاثرین سے اظہارِ ہمدردی کیا اور ان کی حمایت کا اعادہ کرتے ہوئے کہا کہ ''میں آپ کو یقین دلاتا ہوں کہ صوبائی حکومت تمام دہشت گردوں کے خلاف اُس وقت تک لڑے گی جب تک کہ ہم ان کو اپنی پُرامن سرزمین سے نکال باہر نہیں کرتے۔‘‘ اگر غور کریں تو کتنے وزیر اعلیٰ اور کتنے وزیر داخلہ بدلے‘ لیکن یہ مذمتیں اور بیان نہیں بدلے۔ لیکن ان بیان بازیوں کی حقیقت یہ ہے کہ نہ تو ان دہشت گردوں کو 'نکال باہر‘ کرنے کے کوئی ٹھوس اقدامات ہوئے ہیں اور نہ ہی یہ سرزمین پچھلے 70 سال سے کبھی 'پرامن‘ رہی ہے۔ کبھی کبھی بلوچستان کی اِس مظلوم سر زمین پر اسلام آباد سے آ کر بھی کچھ لوگ تعزیت کا اظہار کرتے ہیں‘ لیکن ہزارہ کمیونٹی کی نسل کشی کا سلسلہ جاری و ساری ہے۔ ہزاروں ہزارہ کوئٹہ سے اپنی جان بچا کر دنیا بھر کے کتنے دور دراز ممالک میں دربدر ہونے پر مجبور ہیں۔ ہزاروں پاکستان کے مختلف شہروں میں بھٹک رہے ہیں‘ لیکن یہ بے رحم نسل کشی جاری ہے۔
ہزارہ کمیونٹی کی تہذیب، ثقافت اور رہن سہن کو قریب سے دیکھنے والے جانتے ہیں کہ ان کا معیار کس قدر بلند ہے۔ ان میں کیسے کیسے با کمال لڑکیاں اور لڑکے ہیں اور عمومی طور پر ان کا اخلاق اور رویے کتنے لطیف ہیں۔ لیکن المیہ یہ ہے کہ مسلسل قتل عام سے دوچار اِس پرامن آبادی کے لئے حکمران صرف تعزیت ہی کر سکتے ہیں۔ نہ آج تک نہ کوئی قاتل پکڑا گیا ہے اور نہ ہی اس نسل کشی میں ملوث کسی دہشت گرد گروہ کو ختم کیا گیا ہے۔ وہ سب دندناتے پھر رہے ہیں۔ سیاست میں ان کے سیاسی ونگ متحرک ہیں، ریاست میں ہمدرد موجود ہیں اور وہ جس طرح بے دریغ اور سر عام وارداتیں کر رہے ہیں اُسے دیکھ کر یہی لگتا ہے کہ کوئی پوچھنے والا نہیں ہے۔ میڈیا کو پاناما سے فرصت نہیں ہے۔ ایک خبر چلتی ہے، کسی ٹاک شو میں ذکر ہو جاتا ہے اور پھر پاناما اور ایک دوسرے پر کرپشن کی الزام تراشیوں کا لامحدود سلسلہ شروع ہو جاتا ہے۔ ''تجزیہ کاروں‘‘ کی بھرمار ہے لیکن نہ کسی کو غربت کا احساس ہے، نہ عوام کے سلگتے ہوئے مسائل کا کوئی تذکرہ ہے اور نہ ہی اس نظام کے ناقدین کو یہ میڈیا برداشت کرنے کو تیار ہے۔ ایک طرف معاشی تو دوسری طرف بارود کی دہشت گردی لوگوں کو زندہ درگور کر رہی ہے۔ سرکار صرف اہم مواقع پر جلوسوں کے تحفظ کی ذمہ داری تک ہی محدود نظر آتی ہے۔ روہنگیا مسلمانوں پر ڈھائے جانے والے مظالم اور نسل کشی کی درندگی، جو مغربی سامراجیوں کی ہیروئن آنگ سان سوچی کی حمایت سے برما کی فوج نے جاری رکھی ہوئی ہے، پر پچھلے چند ہفتوں سے 'قوم‘ اور مذہب کے ٹھیکیداروں نے بہت شور مچایا ہے۔ امت مسلمہ کو اٹھ کھڑے ہونے کے وعظ کئے گئے‘لیکن یہاں بلوچستان میں ہونے والی ہزارہ آبادی کی نسل کشی پر اِن دانشوروں، سیاست دانوں نے مسلسل چپ سادھ رکھی ہے۔ انسانی ضمیر کو یہ حقائق اور واقعات جھنجھوڑ کر رکھ دیتے ہیں۔ ایسے سوال اٹھتے ہیں کہ کیا ہزارہ مسلمان نہیں ہیں؟ اگر ہیں تو پھر ان کی نسل کشی پر درد کیوں غائب ہو جاتا ہے؟ لیکن یہ خاموشی، بے نیازی اور بے حسی بے سبب نہیں ہے۔ یہ زہر پچھلی چند دہائیوں کے دوران معاشرے میں اتنا گہرا سرایت کر گیا ہے، یہ وحشت اتنی شدت اختیار کر گئی ہے کہ اب مخالف مسالک کے ملا کفر اور قتل سے کم فتوے نہیں لگاتے۔ یہ فرقہ واریت اس بوسیدہ سماج کی ہر پرت، اس کی ریاست، سیاست اور رویوں میں گھس کر زہریلے تعصبات ذہنوں میں انڈیل رہی ہے اور انسانیت کا احساس مٹا رہی ہے۔ حقیقت یہ ہے کہ موجودہ نظام اتنی زیادہ معاشی بدحالی اور سماجی بیگانگی پیدا کر رہا ہے کہ قوم، ذات پات، رنگ، نسل، مذہب اور فرقے کے تعصبات کو معاشرتی بنیادیں ملتی ہیں۔ دوسری طرف منافرت اور دہشت ایک منافع بخش کاروبار اور صنعت کا درجہ اختیار کر چکی ہے‘ جس میں درجنوں گروہ ملوث ہیں۔ ہر روز نئے نئے فرقے معرض وجود میں آ رہے ہیں۔ ماضی میں 'پُرامن‘ سمجھے جانے والے فرقوں سے بھی اب بنیاد پرستانہ رجحانات اٹھ رہے ہیں۔
اِن تنظیموں کو جن ممالک سے فنڈنگ ہوتی ہے اُن کا نام لینا بھی میڈیا پر ممنوع ہے۔ دہشت گردی میں 'بیرونی ہاتھ‘ ملوث ہونے کے اتنے شور کے باوجود اِن مخصوص مداخلت کاروں اور سہولت کاروں کا ذکر کہیں سننے کو نہیں ملتا۔ بالخصوص جنوبی پنجاب اور بلوچستان جیسے پسماندہ خطوں میں قائم سینکڑوں ادارے فرقہ واریت اور دہشت گردی کی نرسریاں پروان چڑھا رہے ہیں جہاں غریبوں کے بچوں کو اِس آگ کا ایندھن بنایا جاتا ہے۔ اس فرقہ واریت کو حکمران طبقات اپنے مالی اور سماجی مفادات کے لئے استعمال کرتے ہیں۔ حکمران اِس تفریق کو محنت کش عوام کی طبقاتی جڑت توڑنے کے لئے بوقت ضرورت خود ہوا دیتے ہیں تاکہ استحصال زدہ طبقات باہمی تصادموں میں الجھے رہیں اور ان کی حاکمیت کو چیلنج نہ کر سکیں۔ دوسری جانب ہزارہ کمیونٹی کے بالا دست حصے بھی اس ظلم و بربریت کے خلاف جدوجہد کو صرف بنیادوں پر احتجاج تک محدود کر دیتے ہیں۔ لیکن یہ ہزارہ سب سے پہلے انسان ہیں اور ہر ذی شعور انسان کو اس فرقہ وارانہ نسل کشی اور قتل و غارت پر رنج بھی ہے اور غم و غصہ بھی پیدا ہوتا ہے۔ اگر غور کریں تو ہزارہ آبادی کو جس طرح مری آباد اور ہزارہ ٹائون میں محصور ہونے پر مجبور کر دیا گیا ہے‘ اس کے پیش نظر یہ علاقے شاید کھلے آسمان تلے دنیا کی دوسری بڑی جیل میں تبدیل ہو چکے ہیں، جہاں تقریباً پانچ لاکھ لوگ مقید ہیں۔ اس حصار سے باہر نکلتے ہی ان کی زندگی کو مسلسل خطرہ لاحق ہو جاتا ہے اور ان کے قتل عام کی خبریں آتی ہیں۔ لیکن یہ خبریں بھی جلد ہی دبا دی جاتی ہیں۔ جب ٹیلی ویژن پر ہزارہ آبادی کے لوگ حکمرانوں کی جانب سے ''دہشت گردی کی کمر توڑنے‘‘ کے بیانات سنتے ہوں گے تو ان پر کیا گزرتی ہو گی؟ اپنی کمیونٹی تک جبراً محدود کر دیا جانا کتنی بڑی اذیت اور سزا ہے، یہ مری آباد کے باسیوں سے بہتر کون بتا سکتا ہے۔
ضیا الحق نے جس فرقہ واریت کے بیج اِس سماج میں بوئے تھے وہ ایک ناسور بن کر پورے معاشرے کو برباد کر رہی ہے۔ لیکن بعد میں آنے والی فوجی اور جمہوری حاکمیتوں میں اِس ناسور کی جراحی کرنے کی خواہش تھی نہ صلاحیت‘ کیونکہ یہ سب کی سب اِسی بحران زدہ نظام کی پیداوار اور محافظ تھیں‘ جو اِس دہشت گردی کی جڑ ہے۔ اس نظام کے تسلط میں رہتے ہوئے بھلا اس عفریت سے نجات کیسے ممکن ہے!

روزنامہ دنیا ایپ انسٹال کریں