ایک سوال

اپنی قوم سے ،سیاسی کارکنوں اور دانشوروں سے یہ ناچیز ایک سوال کی جسارت کرتاہے ۔ کب تک ؟ آخر کب تک آزمائے ہوئوں سے امید وابستہ کی جائے گی ۔ ایک نئی سیاسی جماعت نہیں تو صاحبِ درد اور ہوش مند لوگ کم از کم ایک پریشر گروپ ہی کیوں قائم نہیں کردیتے ؎

جہانِ تازہ کی افکارِ تازہ سے ہے نمود

کہ سنگ و خشت سے ہوتے نہیں جہاں پیدا

یہ جو بہت بے چینی ہے ،کنفیوژن کے طفیل ہے ۔ مفروضے بے حساب ، خلط مبحث بے پناہ ۔ قرآن کریم یہ کہتاہے : تمہیں صبر کیسے آئے ، تم جانتے جو نہیں ۔

حکمرانوں کو ہم کوستے اور روتے ہیں کہ لیڈر شپ کا بحران ہے۔ دانشور نرگسیت کے مارے ہوئے ۔ کہیں سے کوئی فصیح آواز سنائی دیتی ہے ، جس میں منطق کا بگھار بھی ہو تو لپک اٹھتے ہیں ؛حتیٰ کہ طاہر القادری کی طرف ؎

چمن کے رنگ و بو نے اس قدر دھوکے دئیے مجھ کو

کہ میں نے ذوقِ گل بوسی میں کانٹوں پہ زباں رکھ دی

انیسویں صدی کے وسط سے لگ بھگ ایک سو سال تک مسلم برصغیر یہی تھا۔ غالبؔ نے سر سیّد کو سفّاک زمینی حقائق کی طرف مائل کیا۔کہا: دنیا بدل چکی ، ریل کی پٹڑیاں بچھ رہی ہیں اور بھاپ سے انجن چل رہے ہیں ۔سر سید مخلص تھے ؛چنانچہ وہ نتیجہ خیز رہے وگرنہ مسلم برصغیر افغانستان کی طرح ہوتا۔ تاریخ اورشریعت کو البتہ وہ نہ سمجھ سکے ۔ یہ ان کا میدان ہی نہ تھا۔ دیوبندآج بھی قدیم زمانوں میں زندہ رہنے پہ مصر ہے۔ باغی اور اقتدار کا خواہاں کہ 1857ء کی بغاوت میں اقتدار کا مزہ علماء نے چکھا تھا اور نشہ اس کا یاد رہا ۔ شاعر نے دیکھا تو یہ کہا ؎

چلتاہوں تھوڑی دور ہر ایک تیز رو کے ساتھ

پہچانتا نہیں ہوں ابھی راہبر کو میں

پھر اقبالؔ اور جناح اٹھے ۔ دردمندی اور خلوص ہی نہیں ، جذباتی توازن بھی ۔ تنِ تنہا اقبالؔ نے ایک فکری انقلاب برپا کیا ۔جناح بھی تنہا تھے ؛حتیٰ کہ محمد علی جوہر کی گواہی اور اقبالؔ کی پیہم پشت پناہی سے وہ قائد اعظم ہو گئے ۔ اقبالؔ مشرق و مغرب سے آشنا ۔ جب وہ دنیا سے اٹھے تو ان کی مساعی سے مسلم برصغیر بدل چکا تھا۔ سیاسی انقلاب ان کے نظریے پہ برپا ہوا اور اس نے برپا کیا جو اخلاقی اعتبار سے اپنے عہد کا بہترین آدمی تھا۔ سچا ، دیانت دار ، وعدے کا پابند ، امت سے محبت کرنے والا ، سیاسی مدبّر مگر روادار اور شائستہ ، مظلوموں کا ہمدرد اور حیرت انگیز حد تک متوکّل ۔ ڈسپلن میں سخت مگر رجائیت پسند۔

حالات کتنے ہی ابتر ہوں ، ہمیشہ کچھ نہ کچھ کیا جا سکتاہے ۔کفر ہی نہیں، مایوسی موت بھی ہے ۔ قومیں زوال آشنا ہوتی ہیں اور رفعت پذیر بھی ۔ صدیوں تک انگریز اجنبی اقتدار کے جبر سے گزرے ۔ صلیبی جنگوں ، سپین اور ترکوں کے عروج سے انہوںنے سیکھا ۔ہمارے پڑوسی بھارتیوں کی طرح ، جو سات سو سال تک مسلمانوں اور پھر انگریزوں کے غلام رہے ۔ سات آٹھ سو برس پہلے برطانوی علم کی طرف مائل ہوئے ۔ آکسفرڈ میں ڈیکارٹ کے نام سے امام غزالیؒ پڑھائے گئے ۔ ہندوستان میں فاتح مغل علمی زوال کوبڑھے ۔ ترک ابھی ترقی پذیر تھے ۔ سلیمان ذی شان سے ملکہ الزبتھ نے تحریری طور پر سرپرستی کی درخواست کی تھی ۔

سہل کوشی نے مسلمانوں کو قدامت پسند بنا دیا۔ چیلنج نے مغربی ذہن کو سائنس اور جدوجہد کی طرف مائل کیا۔ علمی تحریک اٹھی اور اخلاقی بھی ۔صرف صنعتی انقلاب نہیں ، عوام کی مرضی سے حکمران کا انتخاب ۔ مسلمانوں کو ملوکیت نے مارا کہ انسانی صلاحیت آزادی میں فروغ پاتی ہے ۔پونے دو سو برس پہلے خانہ جنگی میں امریکیوں نے دریافت کیا کہ وہ خود کو تباہ کر لیں گے ؛چنانچہ عوامی اقتدار، رواداری ، مہذب اور شائستہ سیاسی جماعتوں کا قیام ان کا ہدف ہوا۔ ایک صدی تک مڈل کلاس کی لیڈر شپ انہیں نصیب ہوئی ۔ افراد یا اقوام ، امن اور ترقی ، فقط فہم اور فلسفے کی نہیں ، پیہم جدوجہد کی پیداوار ہوتی ہے ۔ جدید زندگی ، سائنسی علم کے ساتھ ہے ۔ سائنسی ترقی تخلیقی اندازِ فکر چاہتی ہے ، اقدار کی موت نہیں ، اللہ اور اس کے رسولؐ سے بغاوت نہیں ، جس کا ہمارے مرعوب سیکولر اور لبرل طبقات واویلا کرتے رہے۔

حکمران اقتدار اور دولت کے بھوکے، مولوی صاحبان ماضی پرست ۔ حماقت کی حد ہے کہ شکوہ سنج ذہین لوگ سیاست اور مذہبی اداروں کو خود سنبھالنے کی بجائے ،فقط آسودگی چاہتے ہیں ۔ یہ کیسے ممکن ہے ؟ کنفیوشس اور افلاطون ہی نہیں ، حیاتِ اجتماعی پہ جب، جہاں کہیں بحث تھی ، ہر صاحبِ فکر نے جتلایا : اچھے لوگ گھروں میں بیٹھ رہیںگے تو ادنیٰ ان پر حکومت کریں گے ۔ المیہ یہ نہیں کہ غنڈے مسلط ہو جاتے ہیں بلکہ یہ کہ شرفا ادب ، موسیقی، مصوری ، شاعری اور کاروبار میں پناہ لیتے ہیں ۔ زندگی علت و معلول کے رشتے میںبندھی ہے اور قدرت کے قوانین کی پابند ۔

قانون توڑنے پر مغرب میں آئے دن کوئی حکمران پکڑا جاتاہے ۔ کبھی ہم ان سے بہتر تھے ۔خاتون نے مہر مقرر کرنے پر فاروقِ اعظمؓ کو ٹوکا توانہوں نے کہا : بڑھیا نے عمر کو بربادی سے بچا لیا۔ نون لیگ ہو یا تحریکِ انصاف، پیپلز پارٹی، ایم کیو ایم، جماعتِ اسلامی یا اے این پی والے، کس ڈھٹائی سے اپنے لیڈروں کی غلطیوں کا دفاع کرتے ہیں ؎

ابنِ مریم ہوا کرے کوئی

مرے دکھ کی دوا کرے کوئی

رئوف کلاسرہ اہلِ اقتدار کی کہانیاں لکھتے اور آزردہ رہتے ہیں۔ کل بولے : رزق کی مجبوری نہ ہوتی تو میں اسلام آباد کے مئیر کا الیکشن لڑتا۔نادرا کے سابق چیئرمین طارق ملک کو بھی کل رنجیدہ پایا۔کاہے کو؟میں نے ان سے کہا : جس سمت کو چاہے صفتِ سیلِ رواں چل۔رسوا تو ظالم اور منافق ہوں گے ۔ ڈاکٹر ادیب رضوی اسی معاشرے کا حصہ ہیں ، ڈاکٹر امجد ثاقب بھی ۔ انہی پاکستانیوں کے عطیات سے شوکت خانم ، ایدھی اور تعمیرِ ملت فائونڈیشن اور ریڈ کارپوریشن قائم ہے۔ یہی توانائی اور یہی وسائل سیاست میں کیوں بروئے کار نہیں آسکتے؟ تحریکِ انصاف کے کارکن بہت مخلص ہیں مگر سفلہ پروری پر وہ اپنے لیڈر کا محاسبہ کیوں نہیں کرتے۔

ایک عجیب شعر یاد آتا رہا ؎

اس کے بندے ہیں سو اس کی طرف دیکھتے ہیں

وہ شہہ چارہ گراں کس کی طرف دیکھتا ہے؟

اس سوال کا جواب یہ ہے کہ کپتان خوشامدیوں کی طرف دیکھتا ہے۔ادھر نواز شریف مسلسل مخمصے کا شکار ۔ راتوں کو چپ چاپ دبئی چلے جاتے ہیں ۔ چوہدری نثار سے ناراض ہوئے تو مولانا سمیع الحق کو یاد کیا۔ چوہدری نے ان کے سیکرٹری سے فریاد کی اور پھر اظہارِ ناراضی کے لیے مولانا فضل الرحمٰن سے ملنے گئے ۔ ایک باخبر کے مطابق چوہدری کی وزارت اب شہباز شریف کی وجہ سے قائم ہے ۔مریض شہبازشریف اب وزارتِ عظمیٰ کی امید پال رہے ہیں ، جس کے لیے کبھی انہوںنے ایک پیر صاحب سے تعویز بھی لیا تھا ۔ نواز شریف خاندان کے بارے میں قدرے کشادہ مزاج ہیں لیکن بالاخر محترمہ مریم نواز کو لے کر آئے کہ گھر میں فضیحتی نہ ہو۔ پنجاب بتدریج حمزہ کے حوالے جو بے چارا نفسیاتی عوارض کا شکار ہے ۔ پوری ذمہ داری سے عرض ہے کہ طالبان سے مذاکرات میں کوئی پیش رفت نہیں ۔ فوج کی مداخلت نہیں مگر وہ حیران اور پریشان ضرور ہے ۔ ڈار صاحب کو خود پہ ناز ہے اور زعمِ تقویٰ بھی ۔معیشت کا کچھ پتہ نہیں ۔ ناکامیوں پہ چڑتے ہیں اور افسروں کو برا کہتے ہیں ۔ اپنی حکمت پہ بھروسہ ہے تو خود اپنی دولت دبئی سے واپس کیوں نہیں لاتے ؟

اپنی قوم سے ، دانشوروں سے یہ ناچیز ایک سوال کی جسارت کرتاہے ۔ کب تک ؟ آخر کب تک ان لوگوں سے امید وابستہ کی جائے گی ۔ ایک نئی سیاسی جماعت نہیں تو صاحبِ درد اور ہوش مند لوگ کم از کم ایک پریشر گروپ کیوں قائم نہیں کردیتے ؎

جہانِ تازہ کی افکارِ تازہ سے ہے نمود

کہ سنگ و خشت سے ہوتے نہیں جہاں پیدا

روزنامہ دنیا ایپ انسٹال کریں