کراچی: سرکلر ریلوے کا ’’چکر‘‘۔۔۔۔۔۔۔!!

کراچی کے ساتھ وقت کا پہیہ تو اپنا ''چکر‘‘ چلارہا ہے لیکن۔۔۔۔۔۔۔ ٹرانسپورٹ مافیا بھی اپنا پہیہ گھمانے کیلئے دوسرے پہیے گھومنے نہیں دے رہا۔۔۔۔۔۔ اس کی سب سے بڑی مثال کراچی سرکلر ریلوے ہے۔۔۔۔۔۔۔کراچی سرکلر ریلوے پاکستان ریلوے کی جانب سے 1969ء میں شروع کی گئی ایک انقلابی ''سروس‘‘ تھی۔۔۔۔۔۔۔ شہریوں نے اسے پسند کیا اور پہلے ہی سال اس کا منافع پانچ لاکھ روپے تھا۔۔۔۔۔۔۔اس وقت روپے کی قدر کے اعتبار سے اسے بھاری منافع کہا جاسکتا ہے۔۔۔۔۔۔۔ 1970ء سے 1980ء کی دہائی میں کراچی سرکلر ریلوے اپنے '' جوبن‘‘پر تھی ۔۔۔۔۔۔۔روزانہ 104 ٹرینیں چلائی جاتیں جن میں 50مرکزی اور 24لوپ لائنوں پر اپنی مخصوص رفتار کے ساتھ رواں دواں رہتی تھیں۔۔۔۔۔۔۔لیکن وہ کراچی ہی کیا جس کے ساتھ ''ہاتھ‘‘ نہ کیا جائے۔۔۔۔۔۔۔ ٹرانسپورٹرز نے اپنا ''چکر‘‘ ایسا چلایا کہ سرکلر ریلوے کا ''چکر‘‘بند ہوگیا اور یہ اپنے عروج کیساتھ ہی زوال کی جانب چلا گیا۔۔۔۔۔۔۔ 1994ء میںسرکلر ریلوے کو ''مفلوج‘‘ اور 1999ء میں مکمل طور پر ''ناکارہ‘‘ قرار دے کر بند کردیا گیا۔

پچاس سال پہلے دنیا بھر میں سرکلر ریلوے غریبوں کے لیے چلائی جارہی تھی۔۔۔۔۔۔۔ لیکن اب سرکلر ریلوے امیروں اور سیاحوں کے لیے چلائی جاتی ہیں۔۔۔۔۔۔۔بھارت میں سرکلر ریلوے میں غریب آبادیوں کو شامل کیا گیا ہے لیکن وہ پورا نقصان کا سیکٹر ہے۔۔۔۔۔۔۔ دنیا بھر میں عام تاثر یہی ہے کہ سرکلر ریلوے غریبوں کو فائدہ پہنچاتی ہے۔۔۔۔۔۔۔لیکن اصل کہانی یہ ہے جو سنگاپور اور کوالالمپور کے ماہرین نے وضع کی ہے۔۔۔۔۔۔۔ان کی نظر میں سرکلر ریلوے شہر کی خوبصورتی میں اضافہ کرتی ہے اور سیاحوں کی کشش کا سامان فراہم کرتی ہے۔۔۔۔۔۔۔ دبئی میں عام قدیم بازاروں سے ہٹ کر سرکلر ریلوے بنائی گئی ۔۔۔۔۔۔۔اس کا مقصد بھی یہی تھا کہ دبئی نیو سٹی کے مہنگے فلیٹوں سے مختلف مقامات پر جانے والے دولت مند مسافروں اور دبئی نیو سٹی کے دفاتر جانے والوں کو سفری سہولت فراہم کی جائے ۔۔۔۔۔۔تاکہ وہ اپنی ذاتی کار یا ویگن سڑکوں پر نہ لائیں اور ٹریفک کا ہجوم سڑکوں پرنظرنہ آئے۔۔۔۔۔۔۔لندن اور نیویارک کی انڈرگرائونڈریلوے کی تعریف انہی الفاظ میںکی گئی ہے کہ ''انڈرگرائونڈ ریلوے نے نیویارک اور لندن کی سڑکوں پر ٹریفک کے 60فیصد دبائو کو اپنے اندر جذب کرلیا‘‘۔

کراچی سرکلر ریلوے کی بحالی کے لیے 1999ء سے لے کر اب تک بے شمار منصوبے بنائے گئے لیکن تمام منصوبے فائلوں میں ''شہادت‘‘کارتبہ پاگئے۔۔۔۔۔۔۔اسی دوران اس کی پٹڑیاں کسی ہندو ''بیوہ‘‘کے ماتھے کے سیندور کی طرح بے دردی سے مٹادی گئیں۔۔۔۔۔۔۔اس کے اسٹیشن چوڑیوں کی طرح ''توڑ‘‘ دئیے گئے۔۔۔۔۔۔اس کے دروازے ‘پنکھے ‘بجلی کی فٹنگ اور لوہے کے جنگلے ''ہیروئنچی‘‘اپنے نشے کے''سامان‘‘کے حصول کے لیے اکھاڑ کر لے گئے۔۔۔۔۔۔دو ڈھائی کلومیٹر کی پٹریوں کا تو یہ حال ہے کہ۔۔۔۔۔۔ وہاں پٹری تلاش کرنے کے لیے کسی ''کولمبس‘‘ کو ہی بلانا پڑے گا۔

انگریزوں کو کراچی سے پیار تھا ۔۔۔۔۔۔۔انہوں نے شہر کی خوبصورتی اور شہریوں کی سہولت کیلئے ٹرام سسٹم چلایا ۔۔۔۔۔۔۔ایک ٹرام کے 24دروازے ہوتے تھے ۔۔۔۔۔۔۔ہر چھ افراد کی سیٹ کے ساتھ دروازہ رکھا گیا ۔۔۔۔۔۔۔ٹرام آہستہ چلتی تھی لیکن اس کا سفر بڑا میوزیکل اور رومانٹک ہوتا تھا ۔۔۔۔۔۔۔پھر کراچی میں ٹریفک بڑھنا شروع ہوا۔۔۔۔۔۔۔ لیکن اس کے علاج اور ٹریفک کو کنٹرول کرنے کے بجائے یہ فیصلہ کیا گیا کہ ٹرام جیسی خوبصورت اور سستی سواری کو بند کردیا جائے۔۔۔۔۔۔ ۔ابتداء میں بھٹو صاحب نے کہا کہ ''ہم اس ٹرام کو کلفٹن کے ساحل پر چلائیں گے ‘‘۔۔۔۔۔۔۔لیکن بھٹو اپنے دیگر وعدوں کی طرح اس وعدے کو بھی پورا نہ کرسکے ۔۔۔۔۔۔۔چونکہ اہلیانِ کراچی اپنے اوپر ہونے والے ہر ستم پر چُپ رہنے کے عادی تھے۔۔۔۔۔۔۔اس لیے یہ پورا منصوبہ بھی فائلوں میں دب گیا اور عوام کے ذہنوں سے محوہوگیا۔

1880ء میںوہ ریل کی پٹری ہی تھی جس کے ذریعے کراچی کوباقی ہندوستان سے جوڑا گیا تھا اور 19سال بعد ہی کراچی مشرقی دنیا میں گندم کی درآمد کا سب سے بڑا مرکز بن چکا تھا۔۔۔۔۔۔۔ لیکن آج ان پٹریوں پر''قبضہ مافیا‘‘اور مسافروں پر''ٹرانسپورٹ مافیا‘‘نے اپنے قبضے کی ''مہر‘‘ لگادی ہے۔۔۔۔۔۔۔جن کے ''جبڑے‘‘ اس قدر مضبوط ہیں کہ ڈرائیور‘ کنڈیکٹر‘ کلینر نہ صرف یونیفارم کی پابندی سے مستثنیٰ ہیں۔۔۔۔۔۔ بلکہ ٹکٹ چھپوانے کی زحمت بھی گوارا نہیں کرتے ۔۔۔۔۔۔یہ تو خون چوسنے میں اتنا آگے ہیں کہ سی این جی پر چلنے والی بسیں ڈیزل کا کرایہ وصول کرکے ''دھوکہ دہی‘‘ کا عالمی ریکارڈ بنارہی ہیں اور ''محکمہ ٹرانسپورٹ‘‘ بھی شاید اس لئے خاموش ہے کہ اس کے ساتھ بھی لفظ ''ٹرانسپورٹ‘‘ آتا ہے۔

کراچی سرکلر ریلوے تو وہ بدقسمت منصوبہ ثابت ہوا کہ جاپان نے زیرو فیصد کے برابرکم مارک اپ پر 40 سال کے لیے ڈھائی ارب ڈالر کا قرضہ دینے کا اعلان کیا۔۔۔۔۔۔ لیکن کیا کریں کہ اس کا نام ''لاہور سرکلر ریلوے‘‘ نہیں۔

11جنوری 2014ء کو۔۔۔۔۔۔ مسلم لیگ ن کے رہنما اور وفاقی وزیر برائے منصوبہ بندی و ترقیات احسن اقبال کا یہ بیان بھلایا نہیں جاسکتا کہ ''کراچی سرکلر ریلوے جلد شروع ہونے والی ہے‘‘۔۔۔۔۔۔ ہم تو وزیراعلیٰ پنجاب میاں شہباز شریف کا وہ بیان بھی نہیں بھلاسکے کہ ''چھ ماہ میں لوڈشیڈنگ ختم نہ کردی تو میرا نام شہباز شریف نہیں‘‘ لوڈشیڈنگ تو ختم ہونے کے بجائے بڑھ گئی ۔۔۔۔۔۔لیکن میاں شہباز شریف نے اپنا نیا نام کیا رکھا ؟۔۔۔۔۔۔یہ ہم نہیں جانتے ۔

کراچی کے شہریوں کے ساتھ ایسا ''حسن سلوک‘‘ اچنبھے کی بات نہیں ۔۔۔۔۔۔یہ پہلی بار نہیں ہوا۔۔۔۔۔۔ سگے بیٹے جتنا کمانے والے شہر کے ساتھ سوتیلا رویہ معمول بنتا جارہا ہے۔۔۔۔۔۔۔کراچی سرکلر ریلوے کی پلاننگ کاروباری انداز میں نہیں ۔۔۔۔۔۔۔خواہشات کے ساتھ کی گئی۔۔۔۔۔۔۔ کراچی کا سب سے بڑا کمرشل ہب ٹاور اور اطراف میں ہے۔۔۔۔۔۔۔ جہاں سینکڑوں تجارتی دفاتر‘بڑی ہول سیل مارکیٹیں‘ اسٹاک ایکسچینج‘ کاٹن ایکسچینج اور دیگر ادارے ہیں ۔۔۔۔۔۔۔یہاں سے نکلنے والے کارکنوں کے لیے پہلا ریلوے اسٹیشن سٹی ریلوے اسٹیشن ہے۔۔۔۔۔۔۔ جو دفاتر سے دو کلومیٹر دور ہے۔۔۔۔۔۔۔ اب آپ سوچیے۔۔۔۔۔۔۔! ایک تھکا کارکن دو کلومیٹر

پیدل چل کر ریلوے اسٹیشن پہنچے ۔۔۔۔۔۔۔اور اپنی آنکھوں سے ''مِس ہوتی ٹرین دیکھے ‘‘۔۔۔۔۔۔۔پندرہ منٹ انتظار کرے تاکہ اگلی ٹرین میسر ہو۔۔۔۔۔۔۔ اور پھر اپنی مقررہ جگہ پہنچ کر تین کلومیٹر پیدل چلے اور گھر پہنچے۔۔۔۔۔۔۔ ضرورت اس بات کی ہے کہ ۔۔۔۔۔۔۔سرکلر ریلوے کو ایسے خطوط پر استوار کیا جائے ۔۔۔۔۔۔۔کہ تھکے ہوئے مسافر وںکو آرام دہ سفر میسر ہوسکے۔۔۔۔۔۔ ۔دوسرا اہم معاملہ سکیورٹی کا ہے ۔۔۔۔۔۔۔کیونکہ کراچی کے موجودہ حالات ماضی سے یکسر مختلف ہیں ۔۔۔۔۔۔۔سرکلر ریلوے کے اطراف کچی آبادیاں اور گوٹھ بن گئے ہیں ۔۔۔۔۔۔یوں یہ سفر اب خطرناک بن گیا ہے۔۔۔۔۔۔۔اہلیانِ کراچی چلتی پھرتی ۔۔۔۔۔۔۔جیتی جاگتی سڑکوں پر محفوظ نہیں۔۔۔۔۔۔۔اور منی بسوں ‘کاروں اور ویگنوں میں دن دیہاڑے لٹ جاتے ہیں ۔۔۔۔۔۔۔وہ ان ویران آبادیوں سے گزرتی ٹرین میں کیسے محفوظ رہیں گے؟۔۔۔۔۔۔۔ان کو کون بچائے گا؟

سرکلر ریلوے دنیا کے انہی شہروں میں کامیاب ہیں جو مختلف مارکیٹوں اور کمرشل ہب سے منظم طریقے سے بسائی گئی آبادیوں سے منسلک ہوں۔۔۔۔۔۔کئی شہروں میں سرکلر ریلوے کو بس سسٹم سے بھی جوڑ دیا گیا ہے۔۔۔۔۔۔اور سرکلر ریلوے کے ٹکٹ میں بس کا کرایہ بھی شامل ہوتا ہے ۔۔۔۔۔۔سرکلر ریلوے کو سب سے زیادہ کامیابی اُن شہروں میں ہوئی ۔۔۔۔۔۔جہاں خوشحال آبادیوں کولنک اور سفرکی سہولیات تھیں۔۔۔۔۔۔وہ لوگ ریلوے نظام پر اعتماد کی صورت میں اپنی کاریں سڑکوں پر نہیں لاتے ۔۔۔۔۔۔اس طرح سڑکیں ٹریفک جام کے عذاب سے بچ جاتی ہیں اور گنجان کاروباری علاقوں میں پارکنگ کا مسئلہ بھی پیدا نہیں ہوتا۔۔۔۔۔۔کراچی سرکلر ریلوے کا منصوبہ بغیر سروے شروع کیا گیا ۔۔۔۔۔۔جو فنڈز کا انتظار کرتے کرتے سوگیا۔

(باقی صفحہ 13 پر)

بقول شاعر۔۔۔۔۔۔

بڑے شوق سے سن رہا تھا زمانہ

ہمی سوگئے داستاں کہتے کہتے

میاں نواز شریف جب اقتدار میں آتے ہیں تو ۔۔۔۔۔۔کراچی والوں کو یہ امید ہوجاتی ہے کہ ''اب کچھ نہ کچھ کریں گے‘‘ لیکن ہربار کراچی کے ساتھ ''دھوکہ‘‘ ہوتا ہے۔۔۔۔۔۔ اس کا حق مارا جاتا ہے۔۔۔۔۔۔ کبھی موٹروے کراچی تک پہنچنے سے پہلے دم توڑ جاتی ہے۔۔۔۔۔۔ تو کبھی میاں صاحب کے پاس سرکلر ریلوے کے لئے ڈھائی ارب ڈالر لینے کا بھی وقت نہیں ہوتا۔۔۔۔۔۔ میاں صاحب آپ ایک کاروباری آدمی ہیں اگر آپ کچھ دیر کے لئے صرف کاروباری بن کر سوچیں ۔۔۔۔۔۔کہ جو منصوبہ 1969ء میں (جب آبادی ایک کروڑ سے بھی کم تھی) 5لاکھ روپے منافع کماسکتا تھا ۔۔۔۔۔۔وہ ڈھائی کروڑ کی آبادی میں کتنا منافع بخش ثابت ہوسکتا ہے۔۔۔۔۔۔میں دعویٰ کرتا ہوں کہ کراچی سرکلر ریلوے پاکستان ریلوے کی تمام ٹرینوں سے زیادہ منافع کماسکتا ہے۔۔۔۔۔۔کم فاصلہ۔۔۔۔۔۔ کم ایندھن۔۔۔۔۔۔ زیادہ مسافر۔۔۔۔۔۔ متواتر چکر... یہ سب دو جمع دو چار والا فارمولا ہے۔۔۔۔۔۔ کوئی ''راکٹ سائنس‘‘ نہیں۔۔۔۔۔۔ کول کتہ سرکلر ریلوے آج بھی سفر کررہی ہے۔۔۔۔۔۔ ہماری سرکلر ریلوے بھی ''سفر‘‘ کررہی ہے ۔۔۔۔۔۔لیکن یہ ''سفر‘‘ انگریزی والا ہے۔۔۔۔۔۔کراچی جتنا تیز رفتار شہر ہے۔۔۔۔۔۔ اس کے ترقیاتی منصوبوں کے لیے رقم اتنی ہی سست روی کے ساتھ جاری کی جاتی ہے۔

جاپانیوں نے ترقی اس لیے کی کہ وہ محنت اور ایمانداری کی ساتھ کام کرنا جانتے تھے۔۔۔۔۔۔ لیکن ہماری لیڈر شپ میں کہیں محنت کا فقدان ہے توکہیںایمانداری کا۔۔۔۔۔۔ دونوں خوبیاں ایک ساتھ ملتی ہی نہیں۔۔۔۔۔۔کراچی کو محنتی اور ایماندار لوگ ضرور ملے ۔۔۔۔۔۔یہی وجہ ہے کہ آج 2درجن فلائی اوور ۔۔۔۔۔۔کچھ انڈر پاس کراچی کے چہرے کے نقش و نگار بن کر اس کی خوبصورتی بڑھانے کی وجہ ہیں۔

کراچی والوں کو جس نے کچھ دیا ۔۔۔۔۔۔بدلے میں کراچی نے صدیوں بعد بھی اس کو یاد رکھا ۔۔۔۔۔۔وہ ایم اے جناح ہوں یا لیاقت علی خان... محمد بن قاسم ہوں یا شاہ فیصل...ایڈورڈ فریئرہوں یا چارلس نیپئر۔۔۔۔۔۔ابراہیم اسماعیل چندریگر ہوں یا خالق دینا۔۔۔۔۔۔ولیم میری ویدر ہوں یا ایمپریس آف انڈیا۔۔۔۔۔۔ شیورام موہتہ ہوں یا موتن داس۔۔۔۔۔۔کراچی ان ناموں کو صدیاں گزرنے کے بعد بھی نہیں بھولا۔۔۔۔۔۔ آج بھی ان ناموں کے بغیر کراچی مکمل نہیں ہوتا۔

ایم اے جناح روڈ‘ شاہراہ لیاقت‘ قاسم پورٹ‘ شاہراہ فیصل‘ فریئر ہال‘ نیپئر روڈ‘ آئی آئی چندریگر روڈ‘ خالق دیناہال‘ میری ویدر ٹاور‘ ایمپریس مارکیٹ‘ موہتہ پیلس‘ موتن داس مارکیٹ کے نام بسوں کے کنڈیکٹروں کو بھی یاد ہیں کیونکہ کراچی کسی کا احسان اپنے اوپر نہیں رکھتا ''سود در سود‘‘ واپس چکادیتا ہے‘ اسی لئے تو اسے کراچی کہتے ہیں۔

روزنامہ دنیا ایپ انسٹال کریں