سندھ پولیس کو ’’پاک صاف‘‘ کرنے کا منصوبہ۔۔۔!

آخر کار کراچی کا اصل مرض پکڑ لیاگیااور اِس کے علاج کے لیے ''اپیکس کمیٹی‘‘ کو ''اینٹی بائیوٹک‘‘ کے طور پر استعمال کیا جائے گا۔آخری ہچکیاں لینے والے اِس بیمار شہر پر''آپریشن تھیٹر‘‘ میں کئی تجربات کیے گئے کہ شاید کوئی ''دوائی‘‘ کام کرجائے،لیکن جب تشخیص ہی غلط ہو تو علاج کیسے صحیح ہوگا؟کراچی آپریشن شروع کرنے سے پہلے سندھ پولیس میں آپریشن ضروری تھا لیکن ایسا نہ ہوا اور کراچی آپریشن کا نتیجہ سب کے سامنے ہے۔سندھ پولیس کے کانسٹیبل سے لے کر اعلیٰ ترین سطح تک تمام ملازمین کسی نہ کسی طرح کرپشن کی بیماری کا شکار ہیں۔کانسٹیبل پچاس‘ سو روپے لیتا ہے تو اعلیٰ افسر 5کروڑ کی بکتر بند 17کروڑ روپے میں خریدنے کا سودا کرتے ہیں، اسی لیے تو قومی اسمبلی کی قائمہ کمیٹی برائے دفاعی پیداوار نے موجودہ آئی جی سندھ (جو مبینہ طور پر ایک یا دو روز میں تبدیل ہونے والے ہیں )کو بھی نیب کا سامنا کرنے کے لیے الرٹ رہنے کا کہہ دیا ہے۔ قائمہ کمیٹی کے چیئرمین خواجہ سہیل منصور نے آئی جی سندھ سے استفسار کیا کہ 5 کروڑ کی بکتر بند گاڑیاں 17 کروڑ میں کیوں خریدیں؟ انہوں نے وارننگ بھی دی کہ آئی جی سندھ یا تو مستعفی ہو جائیں یا نیب کوبھگتنے کو تیار رہیں۔ خواجہ سہیل نے سندھ کے آئی جی اور ہوم سیکرٹری کی عدم موجودگی پر برہمی کااظہارکیا اورکہاکہ بکتر بند گاڑیوں کے معاملے پرایک آئی جی سندھ تو عہدہ چھوڑگئے ہیںاب کیا دوسرے کی باری ہے؟ کمیٹی ارکان نے پوچھا، بکتر بند گاڑیوں کی تیاری کے لیے دنیا بھرمیں صرف سربیا کا چنائو ہی کیوں کیا گیا؟ کیاصرف سربیا کی یہی کمپنی سب سے کم وقت اورکم قیمت میں گاڑیاں مہیا کر سکتی تھی؟ قائمہ کمیٹی کے اس اجلاس میں ایڈیشنل ہوم سیکرٹری نے اپنا ملبہ ہیوی انڈسٹری ٹیکسلا پر ڈالا کہ بکتر بندگاڑیوں کے معاملے میں ہیوی انڈسٹریز ٹیکسلا کے ساتھ اچھا تجربہ نہیں رہا۔۔۔۔اِن سے 17 گاڑیاں خریدیں جو ناقص ثابت ہوئیں اِس لیے مجبوراًسربیا سے معاہدہ کیا، جس پر چیئر مین ہیوی انڈسٹریز ٹیکسلا لیفٹیننٹ (ر) جنرل واجد حسین سید برہم ہوگئے کہ سندھ پولیس نے گاڑیاں درآمد کرنے سے پہلے نہیں پوچھا،ہم ہر قسم کی بکتر بندگاڑیاں تیار کرسکتے ہیں۔اس معاملے پر سیکرٹری دفاعی پیداوار اور ایڈیشنل ہوم سیکرٹری سندھ کے درمیان تلخ جملوں کا تبادلہ بھی ہوا۔ ایڈیشنل آئی جی سندھ نے کہا کہ اب معاہدے سے پیچھے ہٹے توملک کونقصان ہوگا، جس پرچیئرمین کمیٹی بھی غصے میں آئے اورکہاکہ اُس وقت سندھ اور مرکز میں ایک ہی حکومت تھی اور سارا کھیل مل ملا کرکھیلا گیا۔
روزنامہ ''دنیا‘‘نے بکتر بند گاڑیوں کا معاملہ تواتر کے ساتھ اُٹھایااور جب بہت بدنامی ہوئی تو اُس وقت کے آئی جی سندھ نے کرسی سے اترنے میں عافیت جانی،لیکن وہ پیپلز پارٹی ہی کیا جو بیوروکریسی کو اپنے ''قابو‘‘ میں نہ رکھے۔چند روز ہی گزرے تھے کہ نیا'' من پسند‘‘ آئی جی مل گیااور بکتر بند گاڑیوں کا معاملہ ہاتھ سے نکلتے نکلتے رہ گیا۔
سندھ پولیس، پیپلز پارٹی حکومت میںریڑھ کی ہڈی کی حیثیت رکھتی ہے ۔۔۔۔تقرریاں‘تبادلے‘ ترقیاں اور تنزلیاں، یہ سب وہ ''لاٹھیاں‘‘ہیں جن کے ذریعے سندھ پولیس کو بھیڑ‘ بکریوں کی طرح ہانکا جاتا ہے۔ جو ایس ایچ او''بات ‘‘ نہ مانے، ڈی پی او ''من مانی‘‘ کرے، ڈی آئی جی ''جوش و ولولہ‘‘ دکھائے یا آئی جی ''دستخط‘‘ کرنے سے انکار کرے، پیپلز پارٹی کے ''منشور‘‘کے مطابق اس کی سزا صوبہ بدری ہے۔ آج بھی سلطان خواجہ اور بشیر میمن جیسے ایماندارافسران وفاق کے ''ریگستانوں‘‘ میں '' تلاشِ آب‘‘ میں مصروف ہیں۔
سندھ کا ''سیاسی پولیس کلچر‘‘ پنجاب سے زیادہ مختلف نہیں بلکہ کئی علاقوں میں تو وہاں سے بھی چار ہاتھ آگے ہے۔کراچی میں تعینات کئی غیر مقامی پولیس افسران تو ایسے ہیں جو مبینہ طور پر آئی جی سندھ کے بجائے آصف زرداری کو جوابدہ ہیں۔ ایک ایس ایس پی تو ایسے ہیں کہ آئی جی سندھ بھی اُس ضلع کے ایس ایچ اوزکو ہٹا نہیں سکتے۔ ''کمائی‘‘ کے اعتبار سے بھی سندھ پولیس کا کو ئی ثانی نہیں۔۔۔۔ایک ایس ایچ او کی کرسی 5 لاکھ سے 10لاکھ روپے میں ''نیلام ِعام ‘‘کے ذریعے فروخت ہوتی ہے جس کی ''گارنٹی‘‘ایک دن کی بھی نہیںہوتی۔ اسی طرح ڈی ایس پیز ‘ایس ایس پیزاور دیگر عہدوں کے لیے بھی ''برائے فروخت‘‘کے بورڈ لگاکر بیچے جاتے ہیں۔کراچی کے صحافی‘دانشوراورتاجر برادری نے چیخ چیخ کر اپنے گلے خشک کرلیے لیکن مجال ہے کہ آواز ''زرداری ہائوس‘‘ تک پہنچ جائے۔کراچی آپریشن ڈیڑھ سال سے ''سیاسی پولیس‘‘ کے ساتھ جاری رہا، اصلی سے زیادہ نقلی مجرم پکڑے گئے ، فوج کو پکارا جاتا رہا لیکن نتیجہ وہی'' ڈھاک کے تین پاٹ‘‘ ۔
واقفانِ حال کہتے ہیں کہ پی پی اور ایم کیو ایم کے درمیان اتحاد ہونے کے بعد پی پی حکومت کو'' وٹامن بی کمپلیکس‘‘ مل گیا تھا اوراس اتحاد کو سندھ میں کرپشن بڑھنے کا ''فارمولا‘‘قرار دیا جارہا تھا کہ اچانک آرمی چیف اور وزیراعظم نے کراچی پر ''چھاپہ‘‘ مارااور طویل عرصے سے بیمار شہر کا نہ صرف حال دریافت کیا بلکہ اس کا موثر علاج بھی شروع کر دیا۔ اپیکس کمیٹی اس سلسلے کی پہلی کڑی ہے اور اب کراچی کے شہریوں اور تاجروں کو امید کی ایک کرن ضرور دکھائی دے رہی ہے کہ اپیکس کمیٹی کے دھماکے دار فیصلے ہی بتائیں گے کہ کمیٹی کتنی جاندار ہے۔نقاد کہتے ہیں کہ پیپلز پارٹی سے پولیس ''چھن‘‘ گئی تو اُس کی ''کمائی‘‘ اور ''رعب و دبدبہ‘‘ ختم ہوجائے گا۔ چند ''بڑے ‘‘ایماندار افسران آ گئے تو چھوٹے تو خود ہی تسبیح ہاتھوں میں پکڑلیں گے۔ ایجنسیوں کی ''این او سی‘‘کی اہمیت کا اندازہ اب ہوگا کہ واقعی اصل ''نو آبجکشن‘‘ کسے کہتے ہیں؟
اپیکس کمیٹی کے قیام کے لیے جو اجلاس گورنر ہائوس اور فائیو کورمیں ہوئے ان میں وزیر اعظم ‘آرمی چیف ‘ڈی جی آئی ایس آئی سمیت اعلیٰ شخصیات شریک تھیں۔باخبر حلقے کہتے ہیں کہ اجلاس میں آئینی حیثیت نہ ہونے کے باوجود ''کمزور‘‘وزیر اعلیٰ کی جگہ ''طاقتور‘‘ شریک چیئرمین آصف زرداری کو طلب کرنا ماضی کے تجربات کی روشنی کی بنیاد پر تھا۔ سیاسی مداخلت ختم کرنے کی ''گارنٹی‘‘ بھی مانگی گئی کیونکہ کراچی آپریشن کے آغاز سے قبل بھی ایک ایکشن کمیٹی بنی تھی۔ یہ بھی طے ہوا تھا کہ پولیس کے تبادلے و تقرریاں حساس اداروں کے ساتھ رینجرز انٹیلی جنس (فیلڈ سکیورٹی ونگ) کی جانب سے این او سی کے اجرا پر کئے جائیں گے، لیکن پھر پیپلز پارٹی کی سندھ حکومت نے طے شدہ معاہدے سے انحراف کیا اور سیاسی بنیادوں پر پولیس اور دیگر انتظامی افسران کی تقرریاں اور تبادلے اسی طرح ہوئے جیسے ماضی میں ہوتے آرہے ہیں۔
سندھ پولیس کے غلط استعمال کا اندازہ اس بات سے لگایا جاسکتا ہے کہ چیف منسٹر ہائوس سے اعلان ہوا کہ ایک ڈی ایس پی سمیت 46 پولیس اہلکار ذوالفقار مرزا کے فارم ہائوس سے ہٹالیے گئے اور کراچی میں ان کی رہائش گاہ کے باہر پہرہ دینے والے پولیس کے لشکر کو بھی واپس بلالیاگیا۔ زرداری صاحب کے خلاف ذوالفقار مرزا کی ''بیانیہ گولہ باری‘‘سے سندھ کی سیاست میں کوئی ہلچل مچی ہو یا نہیں، ایک راز منصۂ شہود پر آگیاکہ سندھ پولیس کو کس بے دردی سے استعمال کیا جارہا ہے اور پولیس کی طاقت اور لشکر کو اپنے دوستوں‘ساتھیوں اور پارٹی رہنمائوں کے ''بھرم‘‘ دکھانے کے لیے ڈیوٹی پر تعینات کیا جاتا ہے۔ شہر میں موبائل چھینے جارہے ہیں، بینک لوٹے جارہے ہیں، ٹارگٹ کلنگ ہورہی ہے، ڈاکٹر اور علماء قتل کئے جارہے ہیں، زمینوں پرقبضے دھڑلے سے جاری ہیں لیکن پولیس ''غیر حاضر‘‘ رہتی ہے۔ اب پتا چلا کہ پولیس تو وی آئی پی ڈیوٹی پر تھی۔ سندھ پولیس کو یہ فیصلہ کرنا پڑے گا کہ وہ عوام کی محافظ ہے یا سیاستدانوں کی نوکر؟

روزنامہ دنیا ایپ انسٹال کریں