نون لیگ کے دروازے پر شکست کی دستک

شکست ن لیگ کو چھو کر گزر گئی۔ سوچا جا سکتا ہے کہ اگر اسلام آباد کے میئر کا تعلق تحریکِ انصاف سے ہو تو اقتدار کا مزا کیسے کرکرا ہو جائے۔ پھر کیسے اسلام آباد ایک تماشہ گاہ میں بدل جائے۔ ن لیگ کی پیٹھ پر وقت نے ایک تازیانہ لگا کر چھوڑ دیا۔ شاید کہ وہ سنبھل سکے۔

نواز شریف صاحب کے دورِ حکومت میں جو چیز سب سے زیادہ نظر انداز ہوتی ہے، وہ ان کی اپنی جماعت ہے۔ وہ اقتدار کے ایوان میں پہلا قدم رکھتے ہی، پہلی ٹھوکر اُس سیڑھی کو لگاتے ہیں جو انہیں اس بلندی تک پہنچاتی ہے۔ جماعت پھر اس وقت یاد آتی ہے جب کسی انتخاب میں اس کی ضرورت پڑتی ہے یا پھر کوئی آ مر ان کے درپے ہوتا ہے۔ 30 نومبر کی شب ن لیگ کے گندے کپڑے جس طرح سر بازار دھوئے جاتے رہے، ٹی وی سکرین پر یقیناً حکومتی زعما نے دیکھا ہو گا۔ کیا اب بھی انہیں اندازہ نہیں کہ حکومت پارٹی کا متبادل نہیں ہو سکتی۔ اگر ایسا ہوتا تو ق لیگ کو کبھی زوال نہ آتا۔

ن لیگ جب اقتدار میں ہوتی ہے تو دو گروہوں میں بٹ جاتی ہے۔ ایک وہ جس کا تعلق ن لیگ سے نہیں، شریف خاندان سے ہوتا ہے۔ وہ رشتہ دار ہو سکتے ہیں اور ذاتی وفادار بھی۔ یہ کہنے کی ضرورت نہیں کہ اقتدار سے مستفید ہونے والے بھی یہی ہوتے ہیں۔ دوسرا گروہ وہ جسے اقتدار میں ذرا سا حصہ بھی نہیں ملتا۔ یہ گروہ ایک عرصہ اس سرخوشی اور زعمِِ باطل میں گزار دیتا ہے کہ ہماری حکومت ہے۔ جب ضمنی یا بلدیاتی انتخابات آتے ہیں تو اس گروہ کو حقائق کا اندازہ ہوتا ہے۔ انہیں پہلی بار احساس ہوتا ہے کہ وہ جسے اپنی پارٹی سمجھتے ہیں، اب اُس کی باگ کسی اور ہاتھ میں چلی گئی ہے۔ اب انتخابی امیدواروں کے فیصلے پارٹی کے دفاتر میں نہیں، اقتدار کے ایوانوں میں ہوتے ہیں۔ وہ گروہ اب پارٹی کے امور میں بھی دخیل ہوتا ہے جو پارٹی سے زیادہ شریف خاندان سے وابستہ ہوتا ہے۔ ایک مایوسی اِس گروہ کو گھیر لیتی ہے۔ پھر وہ بغاوت پر آمادہ ہوتا اور مقابلے میں کھڑا ہو کر اپنے غصے کا اظہار کرتا ہے‘ یا پھر سیاسی عمل ہی سے الگ ہو جاتا ہے۔ اسلام آباد میں، اس گروہ نے پہلا راستہ اختیار کیا۔ اسی وجہ سے شکست ن لیگ کو چھو کر گزر گئی۔

نون لیگ کو اقتدار کے اڑھائی سالوں میں بڑی محنت کے ساتھ ایک صوبائی جماعت بنا دیا گیا۔ میں آج تک یہ نہیں جان سکا کہ کے پی میں لیگ کو منظم کر نے میں کیا امر مانع ہے؟ دیہی سندھ میں تو کہا جا سکتا ہے کہ پیپلز پارٹی کے ساتھ کوئی ڈیل ہو گی‘ کے پی میں ایسی ڈیل کا تصور نہیں کیا جا سکتا۔ پھر کیا وجہ ہے کہ ن لیگ صوبائی حکومت کے لیے ایک دن بھی چیلنج نہیں بن سکی۔ اب ایسا تو نہیں ہے کہ کے پی میں سب کچھ ٹھیک ہو رہا ہے۔ وہاں کوئی مسئلہ ایسا نہیں‘ جس پر صوبائی حکومت کے خلاف کوئی آواز نہیں اٹھ سکتی۔ دوسری طرف عمران خان نے پنجاب کو ایک دن چین نہیں لینے دیا۔ پنجاب پر وہ ایک بیرونی حملہ آور کی طرح مسلسل تاخت کرتے رہتے ہیں۔ اس حوالے سے تو انہوں نے محمود غزنوی کا ریکارڈ بھی توڑ دیا۔ اب تو وہ اے این پی کے ساتھ ہم آواز ہیں کہ چین کے ساتھ اقتصادی معاہدے کے ثمرات میں پنجاب کا حصہ کیوں ہو۔ ان کی پوری کوشش رہی کہ یہاں کوئی ترقی کا منصوبہ آگے نہ بڑھنے پائے‘ جیسے وہ پنجاب کے عوام کو سزا دینا چاہتے ہیں کہ انہوں نے تحریکِ انصاف کا انتخاب کیوں نہیں کیا۔ لوگ کہتے ہیں کہ عمران خان نے پنجاب پر 'توجہ‘ نہیں دی‘ ورنہ وہ بلدیاتی انتخابات میں بہتر بتائج حاصل کرتے۔ کیا پنجاب پر مزید 'توجہ‘ کی ضرورت ہے؟ مزید توجہ تو یہی ہے کہ اس صوبے کی ہر سڑک پر تحریکِ انصاف کے جیالوں کو مستقل بٹھا دیا جائے تاکہ صوبے میں لوگوں کے لیے سانس لینا محال ہو جائے۔

ایک طرف پنجاب میں تحریکِ انصاف کے تحرک کا یہ عالم ہے اور دوسری طرف کے پی میں ن لیگ کا وجود ہی ثابت نہیں۔ میرے نزدیک اگر لاہور جیسے شہر میں، ان گنت نوازشوں کے باوجود، ن لیگ کو اتنی بڑی مخالفت کا سامنا ہے کہ اس کا امیدوار دو ہزار ووٹوں کی اکثریت سے کامیاب ہوتا ہے تو اس کی وجہ صرف یہ ہے کہ یہاں پارٹی کا کوئی وجود نہیں۔ اسی کا اعادہ اسلام آباد میں ہوا۔ پارٹی کو نظر انداز کرنا وہ بڑا عامل ہے جو ن لیگ کی شکست کا سبب بنا۔ دوسرا بڑا سبب امیدواروں کی اخلاقی حیثیت کو نظرانداز کرنا ہے۔ اسلام آباد میں مقابلہ سیاست دانوں کے مابین نہیں، پراپرٹی ڈیلرز کے درمیان تھا۔ یہ کام جب ایک بڑی سطح تک پہنچتا ہے تو قبضہ گروپس کے ہاتھ میں چلا جاتا ہے۔ یہی کچھ یہاں بھی ہوا۔ خود ن لیگ کے عہدے داروں نے پریس کانفرنس میں چار ایسے گروپس کی نشاندہی کی۔ میدان انہی کے ہاتھ رہا۔ ن لیگ اگر اخلاقی معیارات کو اہمیت دیتی تو اس کی ساکھ محفوظ رہتی اور شاید نشستوں میں بھی اضافہ ہو جاتا۔

ایک تیسرا عامل بھی ان نتائج پر اثر انداز ہوا۔ یہ اسلام آباد کے گرد و نواح میں آباد پٹھان آبادی ہے۔ انتخابی نتائج اور عمران خان کی سیاست سے 2013ء کے بعد یہ تاثر قائم ہوا ہے کہ تحریکِ انصاف پٹھانوں کی نمائندگی کر رہی ہے اور ن لیگ پنجاب کی۔ یہ تاثر پنجاب میں نہیں کیونکہ پنجاب، پنجابی شناخت کے حوالے سے کبھی حساس نہیں رہا۔ دوسری صوبائی قومیتوں میں شناخت کا یہ احساس بہت گہرا ہے۔ میرا تاثر ہے کہ خیبر پختون خوا میں ان نتائج کو اسی طرح سمجھا گیا۔ یہی وجہ ہے کہ پنجاب میں آباد پٹھان زیادہ تر تحریکِ انصاف کے ووٹر ہیں۔ مثال کے طور پر راولپنڈی ن لیگ کا گڑھ رہا ہے۔ یہاں پٹھانوں کی ایک بڑی تعداد آباد ہے۔ یہ روایتی طور پر مسلم لیگ کے ساتھ تھے۔ 2013ء کے انتخابات میں، رکشے والے سے لے کر کپڑے کے تاجروں تک، تحریکِ انصاف میں چلے گئے۔ اس سے ن لیگ کو نقصان اٹھانا پڑا۔ یہی پٹھان آبادی اسلام آباد کے نتائج کو بھی ایک رخ دینے میں بروئے کار آئی ہے۔

اسلام آباد کے بلدیاتی انتخابات میں شکست کی دستک صاف سنائی دی۔ معلوم نہیں، مرکزی قیادت کی قوتِ سماعت کیسی ہے؟ اگر اس نے سُن کر پارٹی کو منظم کر لیا تو یہ دستک اس کے لیے تذکیر بن سکتی ہے۔ اگر سنی ان سنی کر دی تو اسے یاد رکھنا چاہیے کہ سیاست کا سفر خواہشات کی وادیوں میں نہیں، حقائق کے سنگلاخ راستوں پر چل کر طے ہوتا ہے۔ جو حقائق سے نظریں چار نہیں کرتے، وہ راستوں کی دھول بن جاتے ہیں۔

(پس تحریر: شیریں مزاری صاحبہ کی صاحب زادی ایمان نے اپنا پہلا ووٹ ن لیگ کو دیا۔ اُن کا کہنا ہے کہ انہوں نے ن لیگ کو بھی تنقید کا نشانہ بنایا لیکن جواباً کبھی ان کی تضحیک نہیں کی گئی۔ میرے نزدیک یہ بات ن لیگ کے لیے تمغہء امتیاز ہے۔ یہ اعتراف ان کے لیے باعثِ مسرت ہونا چاہیے۔ میرا مشورہ ہو گا کہ ن لیگ والے ہمیشہ اپنی اخلاقی برتری پر اصرار کریں۔ کاش میں یہ مشورہ تحریکِ انصاف کے کارکنوں کو بھی دے سکتا۔ اُن کی قیادت کا سبق تو یہ ہے کہ جس سے جوابی حملے کا خطرہ ہو، اس سے معذرت کر لو۔ قیادت بھی ایسا ہی کرتی ہے۔ اگر کسی ایسے آ دمی سے پالا پڑ جائے جو جواباً گالی نہ دیتا ہو تو گالیوں میں اضافہ کر دو)