قانون مؤثر بہ ماضی نہیں ہو سکتا! (2)

جنرل پرویز مشرف نے بھی 12 اکتوبر 1999ء کو آئین معطل کیا تھا۔ منسوخ کی بجائے آئین معطل کرنے کی وجہ یہ تھی کہ آرٹیکل 6 کے تحت یہ جرم نہیں بنتا تھا۔ یہ گنجائش آئین بنانے والوں سے دانستہ یا پھر آئین ساز کمیٹی کے ارکان سے اوجھل ہو گئی تھی یا پھر بے دھیانی میں چھوڑ دی گئی تھی۔ جس سے آرمی چیف کے قانونی ماہرین نے استفادہ کیا۔ اس طرح جنرل ضیاالحق اور جنرل پرویز مشرف قانونی اور آئینی طور پر آرٹیکل 6 کی خلاف ورزی کے مرتکب ہوتے بادی النظر میں نظر نہیں آتے۔

اب آئین کی 18ویں ترمیم میں کی گئی تبدیلیاں دیکھیں اور اسی حوالے سے آئین کے آرٹیکل 6(1)، (2-A)، (2) اور (3) کا گہری نظر سے اصل آئین کے آرٹیکل سے موازنہ کریں۔ 18ویں ترمیم کے تحت آئین کی معطلی کو بھی جرم میں شامل کر لیا گیا ہے۔ قانون کو جاننے والے بخوبی علم ہیں کہ جس وقت کوئی جرم سرزد ہو تو اس کی سزا اس وقت نافذ قانون کے تحت ہی دی جا سکتی ہے۔ بعد میں بننے والا قانون مؤثر بہ ماضی نہیں ہو سکتا۔ اس لئے میری ناقص رائے میں سابق صدر پرویز مشرف کو کسی صورت مجرم قرار نہیں دیا جا سکتا۔ اگر اب کوئی فرد آئین معطل کرے تو اُسے غداری کا مجرم ضرور قرار دیا جا سکتا ہے لیکن اب اگر آرمی چیف کو ملک کے اندرونی امن و امان اور قومی وحدت کو شدید خطرات لاحق ہونے کی بنا پر ملک کا نظم و نسق سنبھالنا پڑے اور اس سلسلے میں آئین کو پسِ پشت ڈالنا مقصود ہو تو پھر وہ آئین کو معطل کرنے کی بجائے اسے منسوخ کرنا بہتر سمجھے گا کیونکہ ایک کے بعد ایک آئین میں اس قدر پیوند کاری ہو چکی ہے کہ اب 1973ء کا آئین عملاً ترمیمی آئین کی شکل اختیار کر چکا ہے۔ مارشل لاء لگا تو اسے ختم کرنے سے پہلے ملک میں اسی انداز کے انتخابات کرانے پڑیں گے جیسے جنرل ضیاالحق نے 3 فروری 1985ء کو کرائے تھے اور نئی آئین ساز اسمبلی سے نیا آئین مرتب کر کے اس کو نافذ کرنا پڑے گا اور اس میں آرٹیکل 6 قسم کا کوئی آرٹیکل شامل نہیں ہو گا۔ منسوخ شدہ آئین کی خلاف ورزی نئے آئین کے تحت جرم نہیں ہو گی۔ اٹھارہویں ترمیم شدہ آرٹیکل 6 میں یہاں تک کہا گیا ہے کہ کوئی عدالت ایسی کارروائی کی توثیق نہیں کرے گی جو آرٹیکل 6 کے تحت آتی ہو۔ اس طرح یقینی بنا دیا گیا ہے کہ کبھی ملک بچانے کے لئے مارشل لا نافذ کرنا پڑا تو آئین معطل نہیں بلکہ منسوخ ہی ہو گا۔ اب اٹھارہویں ترمیم کے تحت آرٹیکل 270-AA کے ذریعے آئین کی معطلی کے دوران کئے گئے تمام اقدامات کو آئینی تحفظ حاصل ہو گا یعنی اس دوران ملک میں قومی انتخابات اور اس کے نتیجہ میں قائم کی گئی حکومتیں، وزیر اعظم اور صدر سے حلف لینے کے تمام اقدامات آئینی تصور کئے جائیں گے۔ گویا 31 مارچ 2008ء کو صدر پرویز مشرف نے وزیر اعظم اور ان کی کابینہ کا جو حلف لیا تھا وہ بھی آئینی تصور کیا جائے گا‘ اور نگران سیٹ اپ میں نگران وزیر اعظم محمد میاں سومرو کی سفارش پر آرمی چیف کا جو تقرر کیا گیا وہ بھی آئینی سمجھا جائے گا۔

یہ کہنے کا بھی جواز نہیں کہ جسٹس عبدالحمید ڈوگر قانونی طور پر چیف جسٹس نہیں تھے۔ انہیں وزیر اعظم سید یوسف رضا گیلانی نے 16مارچ 2009ء کے ججوں کی بحالی کے لانگ مارچ کے دوران اپنے ایگزیکٹو آرڈر کے تحت برطرف نہیں کیا تھا بلکہ وہ 65 سال کی عمر کو پہنچنے کے بعد آئین کے تحت 22 مارچ کو ریٹائر ہوئے تھے۔ یہ فیصلہ کہ جسٹس عبدالحمید ڈوگر چیف جسٹس نہیں تھے‘ بادی النظر میں کئی سوالات کو جنم دیتا ہے کیونکہ جس بینچ نے یہ فیصلہ کیا تھا اس میں چیف جسٹس افتخار محمد چوہدری اور دوسرے جج صاحبان بھی شامل تھے۔ میری ناقص رائے میں جج ایسا فیصلہ عمومی طور پر نہیں کرتے جس کا فائدہ ان کو پہنچے۔ جن دانشوروں کا کہنا ہے کہ 3 نومبر 2007ء کو نافذ کی جانے والی ایمرجنسی کے فیصلے کی توثیق اُس وقت کے چیف جسٹس عبدالحمید ڈوگر والی سپریم کورٹ سے ضروری تھی‘ انہیں معلوم نہیں کہ عدالتِ عظمیٰ کے فیصلے حتمی ہوتے ہیں۔ ملک کی اعلیٰ ترین عدالت کے فیصلوں کی پارلیمنٹ سے توثیق کے بارے میں آئین میں کوئی آرٹیکل موجود نہیں ہے‘ نہ ہی اُس کے فیصلہ کو پارلیمنٹ منسوخ کر سکتی ہے کیونکہ یہ آئین کے تحت عدالتِ کے اختیارات میں مداخلت تصور کی جاتی ہے۔

16 مارچ 2009ء کو لانگ مارچ کے نتیجے میں‘ جس کی قیادت نواز شریف کر رہے تھے‘ جنرل اشفاق پرویز کیانی کی مداخلت سے ججوں کی بحالی بھی بادی النظر میں آئین کے مطابق نہیں ہوئی تھی۔ جج مقرر کرنے اور سپریم جوڈیشل کے ذریعہ ہٹانے کا طریقہ بھی آئین کے آرٹیکل 209 میں درج ہے۔ جوڈیشل کمیشن کے ذریعے سبکدوشی کا طریقہ واضح طور پر آئین میں درج ہے لیکن ججوں کو بحال کرنے کا کوئی طریقہ نہیں دیا گیا۔ یہی وجہ ہے کہ بحالی کے ایگزیکٹو آرڈر میں کہیں بھی یہ نہیں کہا گیا کہ اسے آئین کے کس آرٹیکل کے تحت جاری کیا گیا ہے۔ آئینی اور قانونی طریقہ یہ ہے کہ وزیراعظم‘ ہر ایگزیکٹو آرڈر کی ابتدا ہی میں واضح کرتا ہے کہ وہ یہ آرڈر آئین کے فلاں آرٹیکل کے تحت حاصل اختیار کے تحت جاری کر رہا ہے؛ چنانچہ جب صدر آصف علی زرداری نے مذکورہ ایگزیکٹو آرڈر منسوخ کرنے کی بات کی تو رات گئے اس امکان کے خلاف حکم دے دیا گیا۔ یہ معمولی سی بات بھی نظر انداز کر دی گئی کہ کوئی عدالت محض مفروضہ یا خدشہ کی بنا پر حکم جاری نہیں کر سکتی صرف حکومت کے کسی حکم کے جاری ہونے کے بعد ہی اس کے خلاف فیصلہ دے سکتی ہے‘ وہ بھی حکومت کا مؤقف سننے کے بعد۔ جب عدالت عظمیٰ نے ہنگامی حالات کی توثیق کر دی تھی تو اس کے تحت جاری کردہ حکومت کے احکامات کی بھی توثیق ہو گئی تھی۔ (ختم)