غیر انسانی وی آئی پی کلچر اور کرپشن کی انتہا

گزشتہ ہفتے کے روز سندھ میں حکمران پیپلز پارٹی کے چیئر مین اور کراؤن پرنس بلاول زرداری کراچی میں سول ہسپتال کے نئے قائم کردہ ٹراما سینٹر کے افتتاح کے لیے تشریف لائے۔ ان کی سکیورٹی اور پروٹوکول کے باعث لیاری کی بیمار بچی بسمہ کی موت واقع ہو گئی ۔اس کی وجہ بلاول ہوں یا سکیورٹی اور پروٹوکول کا انتظام کرنے والے عملدار، یہ ایک انتہائی افسوسناک واقعہ بلکہ جرم ہے اور اس سنگین جرم پر نثار کھوڑو نے جو لب و لہجہ اختیار کیا، وہ انتہائی شرمناک ہے۔ نثار کھوڑو بسمہ کی المناک موت پر بلاول کو پاکستان کی سلامتی قرار دے رہے ہیں ۔ پاکستان اتنا کمزور اور نحیف نہیں ہے کہ وہ کسی شخصیت کے عدم تحفظ کی بنا پر ٹوٹ جائے۔سوال یہ ہے کہ کیا پاکستان کے عام لوگوں اور ان کے بچوں کی زندگیاں ان کے جانوروں جتنی بھی اہم نہیں؟۔صرف بلاول ہی نہیں ان جیسے دیگرنام نہاد وی آئی پی پاکستان کے عوام کو محترم شہری نہیں تو انسان تو سمجھیں۔ان حکمرانوں کے پروٹوکول کے دوران رکشے میں بچے پیدا ہوتے رہے اور حکمرانوں نے ایسے واقعات کوہنسی و مذاق میں اڑا دیا۔

وی آئی پی کلچر ہمارے معاشرے میں کینسر کی طرح پھیل چکا ہے۔اگر نام نہاد عوامی نمائندگی کے دعویداروں کی کارچیکنگ کے لئے روک لی جائے تو ان کا استحقاق مجروح ہو جاتا ہے اور وہ تحریک استحقاق پیش کر دیتے ہیں، لیکن لیاری کی بیٹی کے غریب والدکو تو ایف آئی آر درج کرانے کی ہمت بھی نہیں ہوئی۔ اگر سول سوسائٹیوں کے دباؤ میں آکر کوئی ایسا قدم اٹھائے تو اس غریب کو جان کے لالے پڑ جائیں گے۔کیا نام نہاد سول سوسائٹی کی تنظیمیںغیر ملکی امداد حاصل کرنے کے لئے اس واقعہ پر ملالہ کی طرز کا ہنگامہ کھڑا کر سکتے ہیں؟ بین الاقوامی فنڈز حاصل کرنے والی ایک نام نہاد تنظیم جمہوریت کے پھیلاؤ کے لئے نام نہاد سروے کروانے کی شہرت کی حامل ہے ۔کیا اس تنظیم نے لیاری میں حکمرانوں کے بارے میں سروے کرانے کی زحمت کی؟

پاکستان میں پروٹوکول کو ختم کرنے کا عملی اور جرأت مندانہ قدم مرحوم ذوالفقار علی بھٹو نے اٹھایا تھا۔ انہوں نے اپنے دور میں وفاقی، صوبائی وزراء اور مشیران کی کاروں پر قومی پرچم لگانے کی ممانعت کر دی تھی۔ صرف صدر، وزیر اعظم ، گورنر اور وزیر اعلیٰ کو اس کا استحقاق تھا اور چیف جسٹس آف پاکستان صرف سپریم کورٹ کا ہی جھنڈا لگانے کے مجاز تھے۔ اسی طرح مسٹر بھٹو نے 1973 ء کے آئین میں ایک شق متعارف کرائی تھی کہ صرف سائنس، کھیل، نرسنگ اور شجاعت پر ہی کسی کو قومی ایوارڈ دیے جائیں گے ۔ مرحوم بھٹو نے 1950 ء سے 1970ء تک جاری کئے گئے سول ایوارڈ اور مراعات جو بیوروکریٹس کو دی گئیں انہیں منسوخ کر دیا تھا۔ لیکن بد قسمتی سے جنرل ضیاء الحق کے دور یہ سلسلہ پھر شروع کر دیا گیا ۔ اسی طرح وزیر اعظم محمد خان جونیجو مرحوم نے وی آئی پی کلچر کے خاتمہ کے لئے بڑی گاڑیوں کے استعمال پر پابندی عائد کر دی تھی۔بھارت میں وی آئی پی کلچر کا خاتمہ 1950ء سے ہی کر دیا گیا تھا اور وزراء کو چھوٹے گھروں تک محدود کر دیا گیا تھا۔ پنڈت جواہر لال نہرو نے 16 اگست 1947 ء کو اپنی کابینہ کے پہلے اجلاس میں فیصلہ صادر کر دیا تھا کہ مرکزی اور صوبائی وزراء آٹھ سو سی سی کی گاڑیاں استعمال کریں گے ا ور چھوٹے اور سادہ گھروں میں رہیں گے، عام لباس زیب تن کریں گے، اور گھروں میں ڈرائینگ رومز بھی انتہائی سادہ ہوں گے۔

پاکستان میں نام نہاد وی آئی پیز اور وی وی آئی پیز کی تعداد میں گزشتہ 20 برسوں کے دوران 300 فیصد اضافہ ہوا ہے ‘اور وی آئی پیز نے نام نہاد سکیورٹی کے خوف سے عوام کا جینا حرام کر دیا ہے۔ ہمارے ہاں ہر وزیر اعلیٰ نے سپیشل سکیورٹی کو متعارف کرا یا ہوا ہے جو قانون سے بالا تر ہے۔ بلاول کے لئے سکیورٹی ایس ایس یو کمانڈوز فراہم کر رہے ہیں۔ یہ غیر قانونی فورس سندھ میں جون 2008 ء میں آصف علی زرداری کے خصوصی حکم کے تحت ان کے صوبائی وزیر داخلہ ذوالفقار مرزا نے قائم کی تھی جس کا سربراہ شاید ایک ریٹائرڈ کرنل ہے‘ حتیٰ کہ آئی جی پولیس سندھ کو بھی آصف علی زرداری اور ان کے خاندان کی سکیورٹی کے معاملے میں اسی فورس کی ہدایات پر عمل کرنا پڑتا ہے۔ فورس کی تعداد اور بجٹ کا علم بھی آئی جی سندھ کو نہیں ہے ۔ اس فورس کے اخراجات شاید عسکری قیادت کے بھی علم میں نہ ہوں۔ سندھ ہائی کورٹ کو از خود نوٹس لینے کی استدعا ہے کہ بلاول اور قائم علی شاہ کے روٹ کا ذمہ دار کون ہے اورجس نے سول ہسپتال اور ملحقہ علاقوں کے محاصرے کا حکم دیا تھا، وہی اس سانحہ کا ذمہ دار ہے۔ سندھ ہائی کورٹ بار ایسوسی ایشن کو اس فورس کے کرنل کے خلاف ایف آئی آر درج کرانی چاہیے کیونکہ انتہائی گنجان آبادی کے علاقے میں وی آئی پیز کی آمد سے ٹریفک جام ہو گئی اوربسمہ کے والد کسی طرح سول ہسپتال تک پہنچ گئے تو گیٹ پر روک دیا گیا ۔ اس سب میں ایک گھنٹہ لگ گیا اور بچی چل بسی! سول ہسپتال کے بے حس سپرنٹنڈنٹ کے ریمارکس بھی بڑے معنی خیز ہیں۔ سندھ ہائی کورٹ کے از خود نوٹس سے پاکستان میں ہمیشہ کے لئے وی آئی پی کلچر کی وباء ختم ہو جانے کا امکان ہے۔ اسی طرح شریف خاندان کے بھی وی آئی پیز روٹس ختم کئے جائیں۔حمزہ شہباز اور خاندان کے دیگر ارکان کو عام شہری ہی تصورکیا جائے ۔ سکیورٹی اور وی آئی پیز کے کلچر میں فرق کرنے کی ضرورت ہے۔ ہمارے ملک میں قانون ساز سب سے بڑے قانون شکن ہیں۔بسمہ کی موت سے ہمارے معاشرے اور حکمرانوں کو بیدار ہو جانا چاہیے وہ اس غیر انسانی وی آئی پیز کلچر میں تبدیلی لائیں۔

میرا خیال ہے کہ بلاول زرداری کو اس ٹراما سنٹر کا نام بسمہ کے نام پر رکھ دینا چاہئے جس کی المناک موت نے کروڑوں دلوں کو صدمے سے دو چار کر دیا ہے۔ بلاول زرداری اپنی والدہ محترمہ اور نانی محترمہ نصرت بھٹو کی ہی لاج رکھ لیں اور قائم علی شاہ اس وقت کو بھی یاد کریں جب نثار کھوڑو بھٹو خاندان کے بد ترین مخالف تھے۔ تب دادو لاڑکانہ روڈ پر محترمہ بیگم نصرت بھٹو ایک بچے کی لاش خود اٹھوا کر قریبی گاؤں میں بچے کے گھر پہنچی تھیں۔ گاؤں اورنزدیک و دور کے دیہات میں جب لوگوں کو معلوم ہوا تو بیگم نصرت بھٹو کو اپنے درمیان دیکھ کرلوگ اور بچے کے والدین اپنی اولاد کا غم بھول گئے تھے ۔بلاول زرداری کے حاشیہ برداروں کو اس تاریخی واقعہ کی رپورٹ بنا کر بلاول زرداری اور نثار کھوڑو کو پیش کرنی چاہئے۔ بلاول زرداری سوشل میڈیا اور پرنٹ اور الیکٹرانک میڈیا کے جاندار دباؤ کے تحت بسمہ کے گھر تشریف لے گئے اور ان کی دعائیں حاصل کر کے نثار کھوڑو کے طرزعمل کی تلافی کرنے کی کوشش کی۔

رینجرز کے اختیارات سے متعلق وفاقی اور صوبائی دونوںحکومتوں کی طرف سے تصادم کا راستہ اختیار کیا جا رہا ہے۔ سابق صدر آصف علی زرداری وفاق سے تصادم کا راستہ اختیار نہیں کر سکتے ۔وہ اندرونی طور پر ڈاکٹر عاصم حسین کو دوبئی بھجوانے کی راہ ہموار کر رہے ہیں۔وزیر اعظم نواز شریف اور آصف علی زرداری اس اہم آئینی اور قانونی بحران میں میثاق جمہوریت کو ڈھال بنانا چاہتے ہیں۔ اس حوالے سے رینجرز اختیارات کے معاملات میں مداخلت کرنا اور سندھ حکومت سے معاملہ فہمی کرنا سکرپٹ کا حصہ ہے ‘اس لئے وزیر اعظم نواز شریف سندھ کے وزیر اعلیٰ قائم علی شاہ سے رابطے میں ہیں۔ 18 فروری 2008 ء کے انتخابات کے نتیجہ میں بر سر اقتدار آنے کے بعد آصف علی زرداری اور ان کے مفاد پرست گروپس نے حکومت سندھ میں ہر اہم عہدے کی قیمت اور ٹائم فریم مقرر کر رکھا ہے۔ اکثر وزراء اہم عہدے میرٹ کے بجائے اپنے پسندیدہ لوگوں کو آمدنی کے لحاظ سے ایک عرصے کے لئے فروخت کرتے ہیں۔رقم ادا کرنے کے بعد بیورو کریٹس کرپشن کے لئے من مانی رقم وصول کرکے کام کرتا ہے اور کروڑوں روپے اوپر والوں کو ادا کر کے ملک سے فرار ہو جاتا ہے۔ اسی طرح رینجرز نے چند وزراء کے گھروں سے اربوں روپے نقد برآمدکئے تھے۔ کرپشن کی انتہا جتنی سندھ میں پیپلز پارٹی کے دور میں ہوئی ‘اس نے 60 سال کے ریکارڈتوڑ دیئے ۔اسی طرح پنجاب میں حکمران جماعت میں جرائم پیشہ ، ریپ کے شیدائی ، قبضہ گروپس، مافیا گروپس اور ٹھگ باز داخل ہو چکے ہیں ۔ عسکری قیادت کو کرپشن کے خلاف آپریشن شروع کرتے ہوئے اسے ملک گیر سطح پر بڑھانا ہو گا۔ اس میں کوئی شک نہیں کہ بد عنوانیوں کے بازار گرم ہیں۔ اب خرابی آخری کناروں کو چھو رہی ہے۔ کوئی بھی غلطی حکومت کے لئے خطرناک ثابت ہو سکتی ہے ۔آئین کے آرٹیکل 149-148 کے تحت عسکری اداروں کو مکمل تحفظ حاصل ہے ۔اس آرٹیکل کے تحت ان اداروں کو ہر کرپٹ محکمے میں مداخلت کا پورا اختیار ہے اور سپریم کورٹ بھی اپنی رولنگ کے تحت اس میں مداخلت نہیں کرے گی۔