پارلیمنٹ کا وجوداورحکومت کا جارحانہ رویہ

جمہوری حکومتوں پر شخصی حکمرانی کی چھاپ ہمیشہ بڑی گہری رہی ہے ۔حکمران پارٹی اکثریت کے بل بوتے پر اپوزیشن کی کئی ایسی تجاویز اور تحریکوں کو اکثربلڈوز کردیتی ہے جن پر اگر پوری سنجیدگی سے عمل کیا جائے تو یہ ملک و قوم کے لئے زیادہ بہتر ہو۔دراصل ہمارے ہاں جمہوری اداروں کے قیام و استحکام کے تمام تر دعوؤں کے باوجود مشاورت کرنے اور مل جل کر آگے بڑھنے کی روائت نہیں؛چنانچہ ہمارے جمہوری اداروں میں مطلوبہ پختگی نہیں آ سکی نہ اس کے ثمرات ہی عوام تک پہنچ سکے ہیں۔ وزیر اعظم نے قومی اہمیت کے بعض بڑے بڑے فیصلے کرنے میں پارلیمنٹ اور اپوزیشن کو اعتماد میں لینے کی زحمت گوارا نہیں کی۔ پاک چین اقتصادی راہداری ہو، یا قطر سے ایل این جی درآمد کرنے کا مسئلہ یا خفیہ راہ و رسم کے ذریعے بھارتی وزیر اعظم نریندر مودی کی ذاتی رہائش گاہ پر یا ترا۔ انہوں نے قوم کو بیشتر مسئلوں پر اعتماد میں نہیں لیا۔ نتیجہ یہ نکلا ہے کہ کبھی ایک صوبہ پاک چین اقتصادی راہداری کے کسی روٹ کے خلاف احتجاج کرتا ہے تو کبھی دوسرے صوبے کوشکائت پیدا ہو جاتی ہے تو کبھی تیسرا صوبہ منصوبے پر تنقید کے نشتر برسانے لگتا ہے۔ کوئی یہ سوچنا گوارا نہیں کرتا کہ چین

اتنی بھاری سرمایہ کاری کر رہا ہے اس کے اپنے بھی مفادات ہیں اگر اس کی راہ میں رکاوٹیں کھڑی کی گئیں تو اس کے پاس متبادل راستے موجود ہیں ۔ یہی معاملہ ایل این جی کا ہے کہ اس کو بھی پارلیمنٹ میں لائے بغیر آخری شکل دے دی گئی اس کی خفیہ اور جلی تفصیلات کے بارے میں عوام تو درکنار خواص تک کو خبر نہیں، ملک میں گیس کے ذخائر تیزی سے کم ہو رہے ہیں ایران سے گیس کی درآمد پر تاحال قدغن اور تاپی گیس کے عملی شکل اختیار کرنے کی راہ میں افغانستان کی پُر اضطراب صورت حال حائل ہے ۔ان حالات میں قطر ایسے ممالک سے گیس درآمد کرنے کے سوا کوئی چارا نہیں، اگرچہ اس سے بھی ملک کی صرف بیس فیصد ضروریات ہی پوری ہونگی ، لیکن ان معاملات میں پارلیمنٹ سے مشاورت سے جس طرح گریز کیا گیا اس پر قومی اسمبلی اور سینیٹ نے بھی شدید احتجاج کیا نواز شریف کے قریبی دوست سید خورشید شاہ کوبھی مجبوراً پی آئی اے اثاثوں کی لوٹ سیل اور قیمتوں کی فہرستیں اسمبلی میں پیش کرنا پڑیں کہ کس طرح قیمتیں مارکیٹ کی قیمتوں سے حیران کن حد تک کم مقرر کی گئیں ۔

وہ بتاتے ہیں:نیو یارک کا فور سٹار ہوٹل پانچ کروڑ 93 لاکھ ڈالر دہلی کے پی آئی اے کے دفاتربیس کروڑ 41 لاکھ روپے میں فروخت کئے جائیں گے۔اسلام آباد پی آئی اے آفس کی قیمت صرف پانچ کروڑ روپے ، آئی الیون ویئر ہاؤس کی قیمت تین کروڑ 74 لاکھ روپے مقرر کی گئی ہے، اس طرح پی آئی اے کے اثاثوں کی لوٹ مار، قومی ائیر لائن کے اندرون ملک اور بیرون ملک دفاتر اور تمام اثاثے کوڑیوں کے دام پر فروخت کی جو سازش کی جارہی ہے، تفصیلات کے مطابق راولپنڈی میں مال روڈ پر پی آئی اے آفس کی قیمت صرف تین کروڑ 21 لاکھ لگائی

گئی ہے، گوادر میں سیلز آفس 52 لاکھ، ملتان میں پی آئی اے کے سیلز آفس کی قیمت پونے دو کروڑروپے مقرر کی گئی ہے۔ پی آئی اے مظفر آباد آفس 36 لاکھ میں پشاور آفس چھ کروڑ، سیدو شریف سوات آفس ایک کروڑ، سکردو آفس 70 لاکھ، تربت کا آفس صرف 31 لاکھ روپے میں فروخت کرنے کا منصوبہ ہے۔ آراے لینز کراچی میں پی آئی اے کے اندرونی سینٹر 31 لاکھ روپے میں جب کہ کار ساز کراچی میں ائیر کریو میڈیکل سینٹر پونے دو کروڑ روپے میں فروخت کیا جائے گا۔ لاہور میں پنجاب اسمبلی کے سامنے پی آئی اے دفتر کی قیمت صرف 14کروڑ روپے مقرر کی گئی ہے، فیصل آباد میں پی آئی اے آفس کی قیمت ایک کروڑ روپے مقرر کی گئی ہے حیدر آباد میں پی آئی اے کا سیلز آفس ساڑھے چھ کروڑ روپے میں بکنے والا ہے، اسی طرح نئی دہلی میں پی آئی اے کی قیمت بیس کروڑ مقرر کی گئی ہے، ممبئی میں پی آئی اے کی قیمت آٹھ کروڑ روپے مقرر کی گئی ہے، تاشقند میں پی آئی اے آفس کو 83 لاکھ روپے میں فروخت کیا جائے گا، نیدر لینڈ کے دارلحکومت امسٹرڈم میں پی آئی اے کے سیلز آفس کی قیمت انیس کروڑ روپے مقرر کی گئی ہے، امسٹرڈم میں پی آئی اے کے ایک اور آفس کی قیمت صرف ایک کروڑ مقرر کی گئی ہے، جب کہ تیسرے آفس کی قیمت پونے پانچ کروڑ رکھی گئی ہے، اسی طرح اپوزیشن لیڈر خورشید شاہ کی جانب سے پیش کی گئی دوسری فہرست میں پی آئی اے کے اندرون اور بیرون ملک 41 دفاتر اور دیگر اثاثے دکھائے گئے ہیں جن کی قیمتیں بھی اسی طرح ہی حیران کن حد تک کم ہیں۔

پارلیمنٹ کا وجود موجودہ حکومت کی جارحانہ طور طریقوں سے خطرے کی زد میں ہے، اسی لئے چیئر مین سینیٹ میاں رضا ربانی کو کہنا پڑا کہ جب تین ماہ کے اندر مشترکہ مفادات کونسل بلائی جانا ضروری ہے تو پھر ایک آئینی تقاضے کی خلاف ورزیاں کیوں کی جا رہی ہے؟ اسی تناظر میں انہوں نے 15 دن کے اندر اندر مشترکہ مفادات کونسل کا اجلاس بلانے کا مطالبہ کیا! حالات جس ڈگر پر جا رہے ہیں وہ صریحاً آئین کی مختلف دفعات کی خلاف ورزی ہیں۔ اپوزیشن اپنے مفادات میں ایسی گھری ہوئی ہے کہ ان کو قومی مفادات کے تحفظ کی فرصت ہی نہیں۔ غیر جمہوری سوچ رکھنے والوں نے پارلیمنٹ کا وقار مسخ کر دیا ہے ۔ حکومتی میڈیا پرسنز حالات کا یک طرفہ تجزیہ کر کے استدلالی سوچ کو پروان نہیں چڑھنے دے رہے۔ ملک آہستہ آہستہ تونس کی طرح آتش فشاں کی طرف جا رہا ہے۔