کرپشن کا الزام اور عمران خان

عمران خان نے پنجاب کے وزیر اعلیٰ شہباز شریف پر کینیڈین شہریت کے حامل جاوید صادق کے ذریعے ساڑھے چھبیس ارب روپے کمیشن کا الزام لگایا جس کے جواب میں شہباز شریف نے عمران خان کو اتنی ہی مالیت کے ہرجانے کا نوٹس بھیج دیا اور یہ اعلان بھی کیا کہ اگر ان پر یہ الزام ثابت ہوگیا تو وہ خاندان سمیت سیاست چھوڑ دیںگے۔ یوں تو چیف جسٹس آف پاکستان بھی ملک کے تمام اداروں کی کارکردگی کے بارے میں تحفظات کا اظہارکر چکے ہیں کہ پاکستان کرپشن کے حوالے سے تباہی کے دہانے پرکھڑا ہے۔ عمران خان نے اپنے الزامات میں کہا ہے کہ جاوید صادق وزیر اعلیٰ کے فرنٹ مین کے طور پر چار منصوبوں میں 15ارب کمیشن وصول کر چکا ہے جن نیو اسلام آباد ایئر پورٹ، سافٹ ویئر پارک، قائداعظم سولر پارک، ملتان سکھر موٹر وے شامل ہیں۔ سوال یہ ہے کہ الزام ثابت ہونے پر شہباز شریف کے سیاست چھوڑنے سے قوم کو کیا فائدہ ہوگا۔ یہ اعلان قوم کو بے وقوف بنانے کی روایت کا اعادہ ہے۔ میاں شہباز شریف ترکی اور چین کے نظام حکومت سے بہت متاثر ہیں، انہیں چاہیے تھا کہ وہ اعلان کرتے کہ رشوت ثابت ہونے پر ان کو چین اور ترکی کے قوانین کے مطابق سزا دی جائے، ان کی منقولہ و غیر منقولہ جائیداد ضبط کر لی جائے اور انتخابی فہرست سے ان کا نام خارج کر کے ان کو دوسرے درجے کا شہری قرار دیا جائے، جاوید صادق کے ریڈ وارنٹ جاری کر کے انہیں پاکستان لایا جائے۔ اگرچہ شہباز شریف انہوں نے سانحہ ماڈل ٹاؤن کے حوالے سے جو وعدے کیے اور آصف زرداری سے لوٹی ہوئی دولت واپس لینے کے لیے جو وعدے کیے تھے انہیں پورا نہیں کیا۔

ریاست حکمران طبقے کی طرف سے اربوں ڈالر کی مبینہ کرپشن کی وجہ سے غیر یقینی صورت حال سے دو چار ہے۔ آنے والے ہفتے فیصلہ کن ہیں جو ملک کے آئندہ سیاسی نظام کے مستقبل کا تعین کریںگے۔ وزیر اعظم نواز شریف کو سیاسی زندگی میں اپنی بقا کے سب سے بڑے چیلنج کا سامنا ہے۔ عمران خان نے ایک طرف حکومت پر دبائو بہت زیادہ بڑھا دیا لیکن اس کے ساتھ اپنے لیے آپشن بھی محدود کر لیے ہیں۔ اب وہ پوائنٹ آف نو ریٹرن کی جانب بڑھ چکے ہیں۔ سپریم کورٹ اور لاہور ہائیکورٹ کی جانب سے میاں نواز شریف کی نااہلیت کے ریفرنسز اور پاناما لیکس پر سماعت شروع ہو چکی ہے۔ ان مقدمات کی بنا پر حکومت اور اس کے حامی صحافی کہہ رہے ہیں کہ عمران خان عدالتوں کے فیصلوں کا انتظار کریں اور احتجاجی مہم ملتوی کر دیں۔

دراصل ہمارے ہاں کا عدالتی نظام انتہائی پیچیدہ ہے جس میں انصاف کے حصول کے لیے کئی دہائیاں لگ جاتی ہیں۔ ایئر مارشل اصغر خان کے کیس کا بیس سال بعد فیصلہ نہیں ہوا۔ خواجہ سعد رفیق اور خواجہ آصف حکم امتناعی پر حکومتی منصب سنبھالے ہوئے ہیں۔ اسی طرح پاناما لیکس کا معاملہ حل ہونے میں بھی طویل عرصہ لگ سکتا ہے۔شاید سماعت کے دوران آئندہ انتخابات کا وقت آ جائے۔ انڈین ہائی کورٹس نے تو یہ فیصلہ دے رکھا ہے کہ جس امیدوار کے خلاف کرپشن کے مقدمات زیر سماعت ہیں وہ انتخابات میں حصہ لینے کی اہلیت نہیں رکھتے، لیکن ہمارے ہاں اٹھارویں ترمیم کے ذریعے یہ پابندی ختم کر دی گئی؛ چنانچہ جن کے خلاف کرپشن کے مقدمات زیر سماعت ہیں وہ انتخابی عمل میں حصہ لے سکتے ہیں۔

وزیر اعظم نواز شریف نے پاناما لیکس کے معاملہ کو حل کرنے کے بجائے تاخیری حربے استعمال کیے اور اپوزیشن کے مقابلے کے لیے محاذ آرائی کو تقویت دی۔ اس طرح حکومت نے قیمتی مواقع ضائع کر دیے۔ اب بھی وزیر اعظم کے پاس آخری موقع ہے کہ وہ زمینی حقائق کو دیکھتے اور ماضی کے واقعات کو مد نظر رکھتے ہوئے اقتدار سے دستبرداری کا اعلان کرکے نیا لیڈر آف دی ہاؤس منتخب کرا دیں اور خود پارٹی کے سربراہ کی حیثیت سے بالواسطہ ملک پر حکومت کریں۔

اس طرح کی صورت حال 2005ء میں جب انڈونیشیا کے صدر سہارتوکو پیش آئی تو انہوں نے اقتدار سے دستبرداری کا اعلان کر دیا تھا۔ 1969 ء میں ایوب خان بھی اقتدار سے علیحدہ ہو گئے تھے۔ عوامی دبائو پر شہنشاہ ایران رضا شاہ پہلوی1951ء اور پھر 1979ء میں اقتدار سے سبکدوش ہو کر جلا وطن ہو گئے تھے۔ میاں نواز شریف کا معاملہ اس لحاظ سے مختلف ہے کہ ملک میں ان کا ووٹ بنک موجود ہے، لہٰذا اقتدار سے دستبرداری کے بعد بھی وہ پاکستان مسلم لیگ (ن) کی قیادت سنبھال رکھیں گے اور اپنی مرضی کا لیڈر آف دی ہائوس آگے لا سکیں گے۔

عمران خان کی مہم کے باعث ملک کے اندر اور بیرون ملک پاکستان کے حکمرانوں کا تاثر کرپشن میں ملوث ہونے کا بن چکا ہے۔ ذرائع کے مطابق چین اس صورت حال کا گہری نظروں سے جائزہ لے رہا ہے کیونکہ جس طرح عمران خان نے جاوید صدق کے چینی کمپنیوں کے ساتھ رابطوں کی بات کی ہے اس سے ان کمپنیوں اور چینی حکومت کو نقصان پہنچنے کا احتمال ہے۔ شہباز شریف کو چاہیے تھا کہ وہ عمران خان کو ہرجانے کا نوٹس دینے کے بجائے جاوید صادق کو نیب کے حوالے کر کے آزادنہ انکوائری کرواتے۔

وزیر اعظم نواز شریف کو بھی اپنے میڈیا سیل کے سہارے حکومت نہیں کرنی چاہیے۔ اگر عمران خان کی تحریک کا تیسرا کنارہ سامنے آگیا تو یہی صحافی اسی کا رخ کریں گے۔ میڈیا بھی اپنے کاروباری مفادات کی خیال رکھے گا۔ عسکری ایسٹیبلشمنٹ نے صبر اور حوصلے کا مظاہرہ کیا ہے۔ اس نے آصف علی زرداری کے تند و تیز ریمارکس اور اب روزنامہ ڈان کے حوالے سے خبر کے سلسلے میں تحمل سے کام لیا ہے۔ اگر وہ روایت سخت رویہ اختیار کرتی تو ڈان کی اشاعت بند اور وزیر اعظم کو مستعفیٰ ہونا پڑتا۔

اب بھی یہی راستہ ہے کہ وزیر اعظم اپنی غلطیوں کی تلافی کریں۔ اپنے حامیوں کو عسکری ادارے کے خلاف غیر محتاط گفتگو کرنے سے روکیں، غیر منتخب مشیر اور معاون خصوصی کو فارغ کریں، پارٹی کے ایسے افراد کو سامنے لائیں جن کا دامن صاف ہو، خواجہ سعد رفیق اور خواجہ آصف کو جو عدالتی حکم امتناعی پر ہیں، وزارت سے فارغ کریں اور ڈان اخبارکوخبر فیڈ کرنے والی شخصیت کا دفاع نہ کریں۔ اگر عمران خان نے ملک گیر احتجاج کی کال دے دی تو حکومت کے لئے حالات سنبھالنا مشکل ہو جائے گا اور عسکری قیادت کو مجبوراً کوئی قدم اٹھانا پڑے گا جس کے نتیجے میں نئی سیاسی قیادت منظر عام پر آئے گی۔ مارشل لاء کا دورختم ہو چکا، اب مذاکرات کی میز پر ہی مستقبل کے فیصلے ہوں گے اور مذاکرات میں نیب، الیکشن کمیشن اورایف بی آرکے نمائندے موجود ہوںگے۔