الیکشن کمیشن سپریم کورٹ سے رہنمائی لے

جب ہم اسلامی جمہوریہ پاکستان کو وفاق پاکستان کے نام سے یاد کرتے ہیںتو ہم نا دانستہ طور پر اپنی قومی شناخت کو منقسم کر دیتے ہیں۔ وفاق کی اصطلاح سوویت یونین یا یوگو سلاویہ کے لئے تو استعمال کی جا سکتی تھی‘ کیونکہ وہاں مختلف علاقوں میں مختلف قومیں آباد تھیں‘یہی وجہ ہے کہ جب وفاق کی بنیاد یوگو سلاویہ میں کمزور پڑی تو کروشیا الگ ہو گیا ‘ سربیا الگ ہو گیا اور بوسنیا الگ ہو گیا ۔ اسی صورتحال کا سامنا سوویت یونین کو بھی کرنا پڑا ۔جب سو ویت یونین اور یو گو سلاویہ کا حشر یاد آتا ہے تو لفظ وفاق‘ پاکستان کے لئے مناسب معلوم نہیں ہوتا۔ پاکستان کی نظریاتی اساس پر ضرب کاری اٹھارہویں ترمیم کے ذریعے لگائی گئی‘ جس میں صوبائی خود مختاری کے نام پر اسلامی جمہوریہ پاکستان کو چار علاقائی شناختوں میں تقسیم کر دیا گیا‘اس طرح ہم نے پاکستان کوبے حد نقصان پہنچا یا ہے۔اگر پاکستان کو ایک مخصوص انداز میں وفاق بنانا مقصود ہے تو اسے 20انتظامی یونٹوں کا وفاق بنایا جانا چاہئے‘ تاکہ اقتدار کے فوائد نچلی سطح تک پہنچ سکیں ۔

پاکستان اب تک فنانشل ایکشن ٹاسک فورس کے 40میں سے 33 نکات پر مکمل عمل در آمد نہیں کر سکا‘ گو کہ حکومت کے دعوے مختلف ہیں مگر تمام اشارے بتا رہے ہیں کہ آئندہ سال اکتوبر میں ہم فنانشل ایکشن ٹاسک فورس کی بلیک لسٹ میں شامل ہو سکتے ہیں‘ اس کے جو فوری نتائج بر آمد ہوں گے‘ ان میں سے پہلا یہ ہو گا کہ ہماری بر آمدات کی رفتار انتہائی سست ہو جائے گی ۔ جو اشیا ہم چند دنوں میں بیرون ملک بھیج رہے ہیں وہ چھ چھ مہینوں تک نگرانی کے عمل سے گزرنے کے بعد اپنی منزل تک پہنچ سکیں گی ۔

آصف علی زرداری اور شریف برادران کی قسمت کا فیصلہ ہونے کے بعد اور وزیر اعظم عمران خان کی حکومت کے نشیب و فراز دیکھنے کی جو سہولت جون 2019ء تک ملی ہوئی ہے اس کے بعد جو اثرات ملک میں دیکھنے کو ملیں گے‘ اس کے بعد ایک ایسی ہی محب وطن عظیم شخصیت کوسامنے لایا جائے گی جو پاکستان کو صفِ اول کا اسلامی ملک بنانے کے لئے اٹھ کھڑی ہوگی۔ ملک کے موجودہ پارلیمانی نظام کی بساط اپنے ہی بوجھ تلے دب جائے گی اور ان سب کو وعدہ خلافی ‘فریب اور جھوٹے دعوے قومی احتساب بیورو کے کٹہرے میں کھڑا کر دیں گے اور ان سے اسی طرح حساب لیا جائے گا جیسا کہ شاہ ایران کی رخصتی کے بعد ایران کی عوامی احتساب عدالت نے شاہ کے وفا داروں سے لیا تھا۔ پاکستان کی عوام نے ہر رنگ کے سیاست دان آزمائے ہیں ۔اب اس عوام کو مزید فریبی نعروں کی زد میں نہیں رکھا جا سکتا ۔ میں ایک ایسے شخص کے اقتدار میں آنے کا منظر دیکھ رہا ہوں ‘جس کو ملک کا اقتدار سپرد کر کے تین سال تک صفائی کے لئے دئیے جائیں گے اور ملک کے پارلیمانی نظام میں اہم تبدیلیاں لانے کے لئے ان تمام سیاست دانوں کو نا اہل قرار دے دیا جائے گا جو 1985ء سے پاکستان کی عوام پر سواری کئے ہوئے ہیں ۔پارلیمانی نظام میں اہم تبدیلیاں لائی جائیں گی اور یہ پرکھا جائے گا کہ موجودہ پارلیمانی نظام کے تحت ارکانِ پارلیمنٹ نے پاکستان کو کیا دیا ؟کیا ان کی قانون سازی نے پاکستان کو ایک فلاحی ریاست بنایا ؟ کیا پارلیمنٹ کے ارکان نے آرٹیکل تین کے تحت پاکستان کے عوام کے دکھوں کا مداوا کیا ؟ ان ارکان نے صریحا ً آئین کے آرٹیکل تین کی خلاف ورزی کی ہے ‘ ان کے خالف آرٹیکل چھ کے تحت مقدمات درج کرائے جا سکتے ہیں۔ آئین عوام کی فلاح و بہبود کی ضمانت دیتا ہے ۔اس صورتحال پر نیشنل ڈیموکریٹک فائونڈیشن ریسرچ کر رہاہے کہ ارکان پارلیمنٹ جو1985ء سے اقتدار میں آتے رہے‘ انہوں نے آرٹیکل تین پر عمل در آمد کیوں نہیں کیا اور کسی پارٹی نے بھی پارلیمنٹ میں قرار داد پیش نہیں کی کہ ارکان پارلیمنٹ آرٹیکل تین پر عمل در آمد نہیں کر رہے ۔ ان حالات کے حوالے سے لندن میں بھی ایک تھنک ٹینک کام کر رہا ہے اور اسی تھنک ٹینک میں یہ قومی مسئلہ بھی زیر غور ہے کہ پاکستان میں ڈیموں کی ضروریات کو پورا کرنے کی راہ میں کس پارٹی یا حکومت نے مجرمانہ غفلت کر کے پاکستان کو صحرا بنانے کی سازش کی۔ جون 2019ء کی آمد سے پیشتر میں نے پاکستان کے مستقبل کا نقشہ اپنی معلومات کے مطابق کھینچ دیاہے اور اسی منظر نامے میں نیشنل ڈیمو کریٹک فائونڈیشن ایک انٹر نیشنل کانفرنس کی پلاننگ کر رہی ہے‘ جس میں پاکستان اور بیرون ممالک سے الیکٹورل ماہرین مدعو کئے جائیں گے جو پاکستان کو مربوط ‘ مضبوط اور صحیح معنوں میں انتخابی نظام کا پلان بنا کر قوم کے سامنے پیش کریں گے ۔

الیکشن کمیشن آف پاکستان کے موجودہ چار میں سے تین ارکان کی تعیناتی غیر آئینی ہونے کا انکشاف ہوا ہے ‘کیونکہ آئین کے تحت اعلیٰ عدلیہ کے ججز کی ریٹائرمنٹ کے بعد دو سال تک کسی بھی عہدے پر تعیناتی پر پابندی ہے ۔ قومی ترقی کے لئے آئین و قانون کی حکمرانی کے ناگزیر ہو نے پر اگرچہ ہمارے سارے قومی رہنما اور ادارے اتفاق کرتے ہیں لیکن عملی کیفیت بیشتر حوالوں سے خاصی مختلف ہے۔ اسی ضمن میں ایک تازہ نشاندہی الیکشن کمیشن جیسے آئینی ادارے کے ارکان کے تقرر سے متعلق ہے‘ جس کے مطابق ملک میں انتخابات کرانے کے ذمہ دار ‘اس اہم ادارے کے چار معزز ارکان میں سے تین کا تقرر آئین کے آرٹیکل 207کی شق دو کے بر خلاف عمل میں آیا ہے ۔ اس آرٹیکل کے مطابق سپریم کورٹ یا ہائی کورٹ کا کوئی جج منصب سے فارغ ہونے کے دو سال مکمل ہونے سے پہلے الیکشن کمیشن آف پاکستان کی رکنیت سمیت کسی منفعت بخش سرکاری عہدے پر فائز نہیں کیا جا سکتا ۔ اس میں تمام عدالتی مناصب بھی شامل ہیں ۔ الیکشن کمیشن کے مذکورہ تین ارکان میں سے ایک بلوچستان ہائی کورٹ سے مستعفی ہونے کے محض پانچ دن بعد ‘ دوسرے پشاور ہائی کورٹ سے ریٹائرہونے کے محض 45دن بعد اور تیسرے لاہور ہائی کورٹ سے فارغ ہونے کے سات ماہ بعد الیکشن کمیشن کے رکن مقرر ہو گئے۔ الیکشن کمیشن کے چوتھے رکن سابق بیورو کریٹ ہیں۔رپورٹ کے مطابق تقرر کے وقت ان کا نام دو ارب روپے کی کرپشن میں ملوث ہونے کے الزام میں ایگزٹ کنٹرول لسٹ میں تھا ۔ اس سارے پس منظر کو بین السطور میں ملاحظہ کیا جائے تواس کے ذمہ دار حکومت اور اپوزیشن لیڈر ہیں ‘کیونکہ الیکشن کمیشن آف پاکستان کے ارکان کے تقرر سے پہلے ان کے ماضی کے ریکارڈ کی جانچ پڑتال کرنا وزارت پارلیمانی امور ‘وزیر اعظم پاکستان اور صدر پاکستان کی آئینی ذمہ داری تھی اور اس کے ساتھ ساتھ ہمارے معزز ارکان الیکشن کمیشن کے لئے بھی آئین کے آرٹیکل 207 کی روح کے مطابق کام کرنا فرائض منصبی میں شامل تھا ۔الیکشن کمیشن آف پاکستان آئینی ادارہ ہے ۔ الیکشن کمیشن کی انتظامیہ سروس آف پاکستان کے زمرے میں آتی ہے ‘تاہم معزز ارکان کا کام عدالتی نوعیت کے فیصلے کرنا ہوتا ہے‘ وہ سروس آف پاکستان کے زمرے میں نہیں آتے۔ اس حوالے سے سپریم کورٹ آف پاکستان کے فیصلے اس مؤقف کی تردید کرتے ہیں ۔ اسی طرح نگران حکومت میں صوبہ خیبر پختونخوا کے وزیر اعلیٰ کی مسند بھی آئین کے آرٹیکل 207کی زد میں آتی رہی اور پھر آرٹیکل 260کا سہارا لیا گیا ۔ بادی النظر میں ان کا تقرر آئین کے آرٹیکل207سے انحراف تھا اور ان کے لئے درمیانی راستہ نکالا گیا تھا ۔ میں نے نگران وزیر اعلیٰ کے تقرر کے حوالے سے نگران وزیر اعظم کی توجہ مبذول کروائی تھی ‘نگران وزیر اعظم نے چشم پوشی اختیار کئے رکھی ۔ اسی طرح نگران وزیر اعلیٰ صوبہ خیبر پختونخوا نے اپنے حلف میں تحریف کرتے ہوئے نگران وزیر اعلیٰ کا اضافہ خود اپنے قلم سے کر کے آئین کے آرٹیکل 65کی عبارت ہی تبدیل کر دی تھی ۔ان حالات میں ملک کے ایک اہم ترین آئینی ادارے میں آئین کی یہ پامالی ہمارے آئین کی بالادستی کے دعوئوں پر بڑا سوالیہ نشان ہے کہ ہمارے ادارے اب بھی نظریۂ ضرورت کا سہارا لیتے ہوئے حکومت کے کاروبار کو چلا رہے ہیں ۔الیکشن کمیشن آف پاکستان کو اپنے معزز ارکان کی تقرری کے حوالے سے سپریم کورٹ آف پاکستان کی راہنمائی حاصل کرنے کے لئے ریفرنس دائر کر کے ان کی تقرری کو آئینی قرار دینے کے لئے عملی قدم اٹھانا چاہئے ۔