غریبوں کی حالت سدھارنے کا چیلنج

سابق وزیر اعظم نواز شریف کی گرفتاری اور مقدمے کی کارروائی پر لاہور میں رد عمل برائے نام رہا‘ اس کا عملی ثبوت یہ ہے کہ کوٹ لکھپت جیل میں قید کے دوران مسلم لیگی کارکنوں نے ان سے اظہار یکجہتی کے لیے جیل کے باہر جو احتجاجی کیمپ لگایا اس میں شرکا کی تعداد نہ ہونے کے برابرتھی۔ لاہور میں قومی اسمبلی کی 14 نشستوںمیں سے11 اورصوبائی اسمبلی کی 30 میں سے 21 مسلم لیگ ن کے پاس ہیں اور 1985ء سے مسلم لیگ لاہور میں بلا شرکت غیرے ایک بڑی جمہوری قوت چلی آرہی ہے‘ مگر نواز شریف سے اظہار یکجہتی کے لیے دو درجن سے بھی کم لوگ جیل کے باہر بیٹھے ۔ مسلم لیگ ن کے سیاسی حلقے شہبازشریف کی ضمانت کے بعد سے مختلف تبصرے کرتے دکھائی دیتے ہیں‘ جن میں ان کے بارے میں نرم گوشہ رکھنے کا بھی تذکرہ ہے ‘کیونکہ نواز شریف اپنی گیم پوری کرچکے ہیں ۔مگرشہباز شریف کو مستقبل قریب میں نواز شریف کے سحر سے نکلنا ہوگا اور چوہدری نثار علی خان کو پاکستان مسلم لیگ ن کا سیکرٹری جنرل بنانے کے سوا کوئی چارہ نہیں ۔نواز شریف کا صحت کی بنیاد پر ضمانت کی خواہش رکھنا درست نہ تھا‘ وہ مقدمہ ہار چکے ہیں اور سعودی پرنس کی طرف سے ان کے حق میں کوئی اشارہ نہیں آیا‘ جس کی نواز شریف توقع کئے ہوئے تھے۔ نواز شریف کے بھارتی اشرافیہ سے گہرے تعلقات تھے اور ان کے بارے میں اہم دستاویزات مرتضیٰ پویا کے پاس موجود ہیں جو انہوں نے جنرل ضیا الحق کو پیش کی تھیں ‘ مگراس کے کچھ عرصے بعد ضیا الحق المناک حادثے کا شکار ہو گئے۔ بقول آغا مرتضیٰ : اگر جنرل ضیا الحق حیات ہوتے تو ان کا ارادہ ان کے خاندان کے بارے میں تحقیقات کروانے کا تھا۔

آغاسراج درانی کو جو سیاسی حلقے قریب سے جانتے ہیں وہ اس بات سے آگاہ ہیں کہ خاندانی طور پر وہ آصف علی زرداری سے زیادہ پختہ سیاسی پس منظر رکھتے ہیں ۔ شکارپور میں ان کا اچھا خاصا ذاتی اور خاندانی اثر ہے ‘ مگر آغا سراج درانی کی گرفتاری کے خلاف ان کا قبیلہ اور عزیز واقارب اور پارٹی مل کر بھی دو چار سو افراد سے زیادہ لوگوں کو احتجاج کے لیے جمع نہ کرپائے‘ ایسی صورتحال میں آصف علی زرداری کے لیے خوف کی فضا پیدا ہونا فطری بات ہے ۔آصف علی زرداری ‘فریال تالپور‘ بلاول اور خورشید شاہ کے حلقوں میں بھی خوف پر پھیلارہا ہے کہ سراج درانی گرفتار ہو گیا ہے اور آصف علی زرداری کی گرفتاری کے بعد سندھ کے وزیر اعلیٰ کے بھی قانون کے احتسابی عمل کی زد میں آنے والے ہیں تو سندھ میں پیپلز پارٹی کی حکومت قائم رہنا بے حد مشکل ہوجائے گا۔ زرداری اور سندھ اسمبلی کے ارکان کو ان کمزوریوں کا احساس ہے کہ فریال تالپور نے لاڑکانہ کی تعمیر و ترقی کے 90 ارب روپے خفیہ جعلی اکاؤنٹس کے ذریعے غائب کر وائے۔اس لیے ان کی گرفتاری پر پیپلزپارٹی کی سٹریٹ پاور غائب رہے گی ۔اب پیپلز پارٹی جیل کا بوجھ برداشت نہیں کر سکتی کیونکہ داخلی کمزوری اور کرپشن کے باعث اس پارٹی کے حقیقی ورکر لاتعلق ہو چکے ہیں۔ آغا سراج درانی کی گرفتاری پیپلز پارٹی کے لیے لمحۂ فکریہ ہے۔

دوسری جانب سندھ میں گورنر ہاؤس میں مہنگی موٹر سائیکلوں کے شو منعقد کروائے جارہے ہیں‘ جس سے تحریک انصاف کے سنجیدہ حلقوں میں اچھا تاثر نہیں۔ ایسی شوخیاں وزیر اعظم بھٹو کے وزیر مملکت جی الانہ بھی کیا کرتے تھے اور وزیر اعظم بھٹو نے ان کو وزارت سے فارغ کر دیا تھا۔ مسٹر بھٹو کی قید کے دوران موصوف جنرل ضیا الحق کے ساتھی بن گئے ۔ وزیراعظم عمران خان کو بھی اپنے شوقین مزاج دوستوں سے گریز کرنا ہوگا۔بھارتی جارحانہ بیان بازی کے خلاف سخت مؤقف اپنا کر عمران خان داخلی طور پر ایک مضبوط سربراہ حکومت بن چکے ہیں۔پاکستان میں یک جماعتی نظام کی بنیاد پر نیا سیاسی نظام سامنے آ رہا ہے‘ عالمی سطح پر باور کرایا جارہا ہے کہ پاکستان میں پہلی بار ایک ایسی قابل قبول حکومت تشکیل دی گئی ہے جو پاکستان اور عالمی اسٹیبلشمنٹ کے لئے پوری طرح قابل قبول ہے اور اداروں کے مابین مکمل ہم آہنگی ہے۔ وزیراعظم عمران خان کو عالمی اسٹیبلشمنٹ کی مکمل حمایت حاصل ہے ۔اس حمایت کو پاکستان کی معاشی حالت مضبوط بنانے کے لیے صرف کریں‘ کیوں کہ پاکستان اور چین دُہرے ٹیکسوں کے خاتمے کے معاہدے میں حالیہ ترامیم میں چینی کمپنیوں کوشپنگ سروسز پر سو فیصد ٹیکس کی چھوٹ دینے سے پاکستان اربوں ڈالر کی آمدن سے محروم ہو چکا ہے ۔ یہ درست ہے کہ چائنا پاکستان اکنامک کوریڈور کے تحت حکومت نے چین کے سرکاری بینکوں کی جانب سے پاکستان میں ترقیاتی منصوبوں کے لئے فراہم کردہ قرضوں سے آمدن پر پہلے ہی چھوٹ دے رکھی تھی اور چینی کمرشل بینکوں کے مطالبے پر نواز حکومت کے دور میں چین کے کمرشل بینکوں کی جانب سے پاکستان میں سی پیک کے ترقیاتی منصوبوں کے لئے فراہم کردہ قرضوں پر ہونے والی انٹرسٹ آمدن پر بھی انکم ٹیکس کی چھوٹ دی گئی۔ اسی چھوٹ کو دیتے ہوئے پاکستان نے پاک چین شپنگ سروسز پر انکم ٹیکس کی چھوٹ بھی دے دی۔ ایف بی آر حکام کے مطابق چینی سرکاری اور نجی کمپنیوں اور بینکوں کو پہلے ہی دی گئی ٹیکسوں اور ڈیوٹیوںکی چھوٹ کے سبب پاکستان اربوں روپے مالیت کے ٹیکسوں کی آمدن سے محروم ہوگیا ہے‘ جبکہ اقتصادی امور کے ماہرین کامؤقف ہے کہ چینی شپنگ سروسز پر ٹیکسوں کی چھوٹ کا فائدہ یک طرفہ طور پر چینی کمپنیوں کو ہوگا ۔ اس کا سارا فائدہ چین کو ہوگا اور پاکستان جس کی بندرگاہ اور لینڈ چینی برآمدات کے لئے کئی دہائیوں تک استعمال ہونی ہے‘ سالانہ ہزاروں بحری جہاز پاکستان کی بندرگاہوں سے سامان لے کر روانہ ہوں گے‘ مگر ان کی آمدن پر پاکستان کو کوئی ٹیکس وصول نہیں ہو سکے گا۔

وزیراعظم عمران خان اپنے اگلے پروگرام میں اس طرف دھیان دیں‘ ان کے اردگرد جو معاشی ماہرین موجود ہیں وہ اس مؤقف کے حامی ہیں‘ جن کا ذکر اس کالم میں کیا گیا ہے۔ وزیر اعظم عمران خان ریاست کے مفاد میں چین کے ساتھ شپنگ سروسز کا ایک الگ پروٹوکول سائین کریں اور اصل ٹیکس کی بجائے کم از کم اس کا 25 فیصد ٹیکس بھی وصول کیا جائے تو آئندہ سالوں میں پاکستان کو نہر سویز کی طرز پر اربوں ڈالر آمدن ہوگی۔ یہی تجویز ایف بی آر نے نگران حکومت کو پیش کی تھی جو انتخابی لہر کی نذر ہوگئی۔ وزیراعظم عمران خان کی حکومت گزشتہ کچھ ماہ سے اپوزیشن کی کرپشن کو بے نقاب کر رہی ہے ۔ پاک چین اقتصادی راہداری پر جس طرح قومی مفاد کو نظر انداز کیا اس کو بھی بے نقاب کرنے کی گھڑی آ چکی ہے۔ اسی معاہدے کے مضمرات سے قوم کو آگاہ کرنا ضروری ہے۔ نواز شریف نے پاک چائنا راہداری میں اپنے خاندان اور سیاسی اتحادیوں کے مفاد کو مد نظر رکھتے ہوئے پاکستان کے عوام کا مفاد عزیز نہیں رکھا۔ اس معاہدے پر نظر ثانی کرنا چاہئے اور عمران خان شاہراہ گوادر پر بھی گہری نظر رکھیں ۔ بین الاقوامی معاشی دہشت گرد اس پر اپنی نگاہیں گاڑے ہوئے ہیں اور پاکستانی عوام کو ان معاہدات سے کچھ حاصل نہیں ہو رہا ہے ۔پاک چین اقتصادی راہداری سے حالات جوں کے توں ہیں ‘ سٹاک مارکیٹ بدستور خسارے میں ہے‘ ہر نوح کے خسارے بڑھتے جا رہے ہیں ۔ اسد عمر کے ہاتھ خالی ہیں ۔ 30ہزار ماہانہ کمانے والے کو 20ہزار ماہانہ گیس کے بل آ رہے ہیں اور دس ہزار روپے بجلی کا بل بھی آ رہاہے ۔ خط غربت سے نیچے پچیس فیصدکے لگ بھگ لوگ ہیں ۔ وزیر اعظم عمران خان اپنے وزرا کی ٹیم کو اس غریب لوگوں کی معاشی حالت بہتر بنانے کا ٹاسک دیں ۔