وفائے جفا نما

علامہ محمد اقبال نے کہا ہے :

گلۂ وفائے جفا نما کہ حرم کو اہلِ حرم سے ہے

کروں بتکدے میں بیاں اگر ، تو کہے صنم بھی ہری ہری

سو'' وفائے جفا نما ‘‘کی مثالوں سے ہمارا گرد و پیش بھرا پڑا ہے۔ اسے ''دوست نما دشمن ‘‘سے بھی تعبیر کیا جا سکتا ہے۔ یہ نام نہاد محبین آفتِ جاں ہوتے ہیں ، ان سے بچ کر رہنے ہی میں سلامتی ہے ، لیکن بعض اوقات ان کی زد سے بچنا دشوار ہوجاتا ہے ۔ اسی مخلوق سے چیف آف آرمی اسٹاف جناب جنرل راحیل شریف کو واسطہ پڑا ہے ۔ ان اینکر پرسنز نے دکانیں سجائیں اوردانائے روزگار ماہرین کو اسٹوڈیوز میں بٹھا کر بحث شروع کردی کہ جنرل راحیل شریف کو توسیع دی جائے، ملک و قوم کی ضرورت ہے ، آپریشن ضربِ عضب کو درمیان میں نہیں چھوڑا جا سکتا وغیرہ ۔ بظاہر یہ ساری تگ و دو اور ذہنی کاوش چیف آف آرمی اسٹاف کی حمایت میں نظر آرہی تھی ، لیکن اس کے پیچھے حبِّ علی سے زیادہ بغضِ معاویہ کار فرما تھا اوراصل مقصدلرزتے ہوئے جمہوری نظام اور وزیرِ اعظم کو دباؤ میں لانا تھا ۔ چنانچہ سینیٹر چوہدری اعتزاز احسن جیسے لوگوں کوبیان دینے کی ضرورت محسوس ہوئی کہ توسیع نہیں ہونی چاہیے ۔ غالب نے کہا تھا:

یہ فتنہ آدمی کی خانہ ویرانی کو کیا کم ہے

ہوئے تم دوست جس کے ، دشمن اُس کا آسماں کیوں ہو

سوال یہ پیدا ہوتا ہے کہ چیف آف آرمی اسٹاف کے منصب کے دورانیے کے وسط میں یہ بحث چھیڑنے کی کیا ضرورت تھی؛ چنانچہ جناب جنرل راحیل شریف کو ان کی زبانوں کی زد سے اپنے آپ کو بچانے کے لیے کم و بیش ایک سال پہلے یہ اعلان کرنا پڑا کہ میں توسیع پر یقین نہیں رکھتا۔ انہوں نے اپنی حب الوطنی ، شجاعت اور اخلاص سے پوری قوم کے دلوں میں جو مقبولیت کا مقام بنایا ہے ، یہ ان کی پیشہ ورانہ زندگی کا سب سے قیمتی سرمایہ ہے اور انہوں نے سوچا ہوگا کہ اسے اٹھائی گیروں سے بچالیا جائے ۔

ہمارے عربی علوم و فنون میں یہ جملہ مختلف مواقع پر بکثرت استعمال ہوتاہے :''اَلنُّکْتَۃُ لِلْفَارِّ، لَا لِلْقَارِّ‘‘یعنی اگر کوئی چیز قاعدے ضابطے اور طے شدہ اصول کے مطابق چل رہی ہے ، تو اس کے لیے کسی نکتہ آفرینی اور تاویلات و توجیہات کی کوئی ضرورت نہیں ہوتی ۔ تاویلات و توجیہات اور نکتہ آفرینی کی ضرورت اس وقت پیش آتی ہے جب کسی حکمت کے تحت طے شدہ اصول سے عدول (Deviation) اور انحراف کیا جائے ۔ جیسے علم نحو کا ضابطہ یہ ہے کہ جملے میں مُبتدا مُقدَّم ہوتا ہے اور خبر مؤخَّر ہوتی ہے ۔پس جب خبر کو مبتدا پر مقدَّم کیا جائے ، تو اس کی حکمت ضرور معلوم کی جائے گی اور علمِ معانی میں اس کی حکمتیں مذکور ہیں۔ اسی طرح ضرورتِ شعری کی بنا پر اور وزنِ شعر کو قائم رکھنے کے لیے لفظ میں تھوڑا سا تغُیّر و تبَدُّل کر لیا جاتا ہے اور یہ فنِّ شاعری میں قابل ِ قبول ہے۔

پس جب چیف آف آرمی اسٹاف اپنے منصب کے دورانیے کو ضابطے کے مطابق گزار رہے تھے اور اس کے برعکس نہ کوئی مطالبہ ہوا اور نہ ہی حکومت کی طرف سے کوئی اقدام ہوا ، تو یہ بحث غیر ضروری اور ان کی ذات کے لیے یقینا تکلیف دہ ہوگی ۔ ہاں ! اگر کسی مرحلے پر ان کے منصب کے دورانیے میں توسیع کا فیصلہ ہوتا تو لازماً اس کا جواز بھی متعلقہ اتھارٹی کی طرف سے پیش کیا جاتا ۔ جیسا کہ سابق وزیرِ اعظم سید یوسف رضا گیلانی نے جب جنرل اشفاق پرویز کیانی کی مدتِ ملازمت میں ایک مکمل دورانیے کا اضافہ کر دیا ، تو خواہ پسِ پردہ اس کے اسباب کچھ بھی ہوں ، انہیں یہ جواز پیش کرنا پڑا کہ دورانِ جنگ سپہ سالار کو تبدیل نہیں کیا جاتا ۔ لہٰذا قبل از وقت واویلا مچانے کی کیا ضرورت تھی ، پھر جو لوگ فطرتاً بد گمان ہوتے ہیں ، وہ قیاس آرائیاں کرتے ہیں کہ کسی کے اشارے پر میڈیامیں یہ تحریک چلائی جا رہی ہے ۔ اس لیے جناب جنرل راحیل شریف کو خود اس مہم کو بریک لگانے کی ضرورت محسوس ہوئی ۔جو لوگ کسی ایجنڈے کے تحت اس طرح کی مہم جو ئی کرتے ہیں ، ان کے عزائم کو پہچاننا کچھ زیادہ دشوار نہیں ہوتا ، بقولِ شاعر :

بہر اندازِ کہ خواہی جامہ می پوش

من اندازِ قدت را می شناسم

یعنی کوئی بھی خوش نما ، دل کش اور آنکھوں کو خیرہ کردینے والا لباس پہن کر سامنے آؤ ، میں تمہاری قامت کی بلندی کو خوب جانتا ہوں اور اس طرح کے حربوں سے حقیقت تبدیل نہیں کی جا سکتی ۔ آدم علیہ السلام کے سفر کا آغاز ہی ''دوست نما دشمن ‘‘یعنی ابلیس کے دَجَل و فریب اور حیلہ سازیوں سے ہوا ۔ اللہ تعالیٰ کا ارشاد ہے : ''اور اے آدم ! تم اور تمہاری بیوی (دونوں ) جنت میں رہو ، سو جہاں سے چاہو تم دونوں کھاؤ ( اور پیو) اور (خبر دار !) اس درخت کے قریب نہ جانا ورنہ تم دونوں حد سے تجاوز کرنے والوں میں سے ہو جاؤ گے ۔ پھر شیطان نے دونوں کے دلوں میں وسوسہ ڈالا تاکہ ان دونوں کی شر م گاہوں کو ، جو ان سے چھپائی ہوئی تھیں ، ظاہر کردے اور اس نے کہا : ''تمہارے رب نے تم کو اس درخت سے اس لیے روکا ہے کہ مباداتم فرشتے بن جاؤ یا ہمیشہ رہنے والوں میں سے ہو جاؤ ‘‘ اور اس نے قسم کھا کر ان دونوں سے کہا : ''بے شک میں تم دونوں کا خیر خواہ ہوں ‘‘۔ پھر فریب سے انہیں اپنی طرف مائل کر لیا۔ پس جب ان دونوں نے اس درخت کو چکھا ، تو ان کی شرم گاہیں ان کے لیے ظاہر ہو گئیں اور وہ اپنے اوپردرخت ِ جنت کے پتے چپٹانے لگے ، (الاعراف : 19-22)‘‘۔

آپ نے غور فرمایا کہ ابلیس نے دوست نما دشمن کے روپ میں آدم علیہ السلام کوبہکایا ۔ اس سے معلوم ہوتاہے کہ کھلے دشمن کو پہچاننا اور اس کے وار سے بچنا آسان ہوتا ہے ، لیکن آستین کے سانپ کی زد سے بچنا دشوار ہوتا ہے ۔ شیطان نے آدم علیہ السلام کو یقین دلانے کے لیے جھوٹی قسمیں بھی کھائیں ، اپنے آپ کو خیر خواہ کے روپ میں پیش کیا اور یہ بھی باور کرایا کہ اس ممنوعہ درخت کوکھانے سے آپ کو حیاتِ دوام مل جائے گی یا فرشتے بن جاؤ گے ۔ سو بنی آدم کو چاہیے کہ اپنے جدِّ اعلیٰ حضرت آدم علیہ السلام اور جدّۂ ِ عُلیا حضرتِ حوّا علیہا السلام کی آپ بیتی کا مطالعہ کر لیا کریں اور ان کے تجربے سے استفادہ کریں ، کیونکہ آدم و ابلیس کی جو جنگ آدم علیہ السلام کے جنت سے نکلنے کے وقت شروع ہوئی ہے، وہ تاقیامت جاری رہے گی۔ علامہ محمد اقبال نے کہا :

ستیزہ کار رہا ہے ازل سے تا امروز

چراغِ مصطفوی سے شرارِبو لہبی

پس نوشت : امریکی صدر باراک اوباما کے اسٹیٹ آف دی یونین خطاب کو میں نے آسان الفاظ میں قارئین کے سامنے پیش کیا تاکہ انہیں حقائق کا اندازہ بھی ہو اور درست معلومات بھی ملیں ۔ اسے قارئین ِ کرام نے دلچسپی سے پڑھا ، ان کا ازحد شکریہ ۔ میرے عرض کرنے کا مدّعا یہ تھا کہ تاریخِ انسانیت کے ہر فرعون کا کِبر و غرور اور اندازِ تَعَلّی یہی تھا ۔ فرعونِ موسیٰ( علیہ السلام ) نے کہا : '' میں تمہارا سب سے بڑا رب ہوں ، (النٰزعٰت : 22 )‘‘یعنی: "I am your supreme Lord"۔ قومِ عاد نے کہا : ''ہم سے زیادہ طاقت والا کون ہے ، (حٰم السجدہ : 15)‘‘۔ یہی دعویٰ امریکی صدر اوباما نے کیا ، اللہ تعالیٰ نے جواب دیا : ''جس قادر ِ مطلق نے انہیں پیدا کیا ہے ، وہی سب سے زیادہ طاقت والا ہے ،(حٰم السجدہ : 15)‘‘۔ نمرود کا دعویٰ بھی یہی تھا کہ جب میں کسی کی جاں بخشی بھی کر سکتا ہوں اور کسی سے جینے کا حق چھین بھی سکتا ہوں ، تو مجھے خدا مانو ، خدائی او ر کیا ہے ۔ لیکن آج وہ سب قصۂ پارینہ اور نشانِ عبرت ہیں ۔ آج کے فرعون کی مہلت کی رسی کتنی دراز ہے ، اس کا علم صرف اللہ تعالیٰ کے پاس ہے ، لیکن بہر حال یہ ایک حقیقت ہے کہ لمحۂ موجود میں امریکہ کا جادو سر چڑھ کر بول رہا ہے اور یہ دعویٰ کوئی معمولی تو نہیں ہے کہ : ''کائنات میں ہم جیسی رسائی کسی کو حاصل نہیں ہے ‘‘۔ یہ دعویٰ تو خالقِ حقیقی ہی کو سزا وار ہے : ''سنو! انہیں اپنے رب کے حضور پیش ہونے کے بارے میں کوئی شک ہے ، سنو! بے شک وہ ہر چیز پر محیط ہے ، (حٰم السجدہ : 54)‘‘۔نمرود ہر ایک سے جینے کا حق چھیننے کا دعوے دار تھا ، لیکن اس مچھر سے نہ چھین سکا جو اس کے دماغ میں چڑھ کر اسے بے چین کیے رکھتا تھا ۔ فرعون سمندر کی ان موجوں کے آگے بند نہ باندھ سکا جو اسے بہا لے گئیں اور قیامت تک کے لیے نشانِ عبرت بنا دیا ۔ لیکن ماورائے عقل اور ما فوق الاسباب احکام جاری اور نافذ کرنا قادرِ مطلق کا اختیار ہے۔ ہمیں تو اپنا جواز عالَمِ اسباب میں ثابت کرنا ہے۔ اُمّتوں کے لیے تاریخ کے ہر دور میں قانون ِ قدرت یہی رہا ہے اور اللہ تعالیٰ کا ارشاد ہے: '' یہ اللہ کا دستور ہے جو شروع سے چلا آرہا ہے اور آپ اللہ کے دستور میں کوئی تبدیلی نہ پائیں گے ، (الفتح : 23)‘‘۔''پس جب ان کے پاس کوئی ڈرانے والا آگیا تو اس کی آمد نے صرف ان کی نفرت، زمین میں ان کے تکبر اور ان کی بری سازشوں ہی کو زیادہ کیا اور بری سازشوں کا وبال (آخرِ کار ) ان سازشیوں پر ہی پڑتاہے ، وہ صرف پہلے لوگوں کے دستور کا انتظار کر رہیں ہے ، سو آپ اللہ کے دستور میں ہر گز کوئی تبدیلی نہیں پائیں گے اور نہ آپ اللہ کے دستور کو کبھی ٹلتا ہوا دیکھیں گے ، (الفاطر : 43)‘‘۔

روزنامہ دنیا ایپ انسٹال کریں