لَا اَسْئَلُکُمْ عَلَیْہِ اَجْراً

''لَا اَسْئَلُکُمْ عَلَیْہِ اَجْراً‘‘کے معنی ہیں:''میں اس (دعوتِ حق) پرتم سے کوئی اجر نہیں مانگتا‘‘۔اس مضمون کی آیات قرآنِ مجید میں گیارہ مقامات پر آئی ہیں ۔ ان میں سے چار مقامات سیدنا محمد رسول اللہ ﷺ کے بارے میں ہیں اور سات مقامات حضراتِ نوح، ہود، صالح، لوط اور شعیب علیہم السلام کے بارے میں ہیں۔پہلے ہم دیگر انبیائے کرام کے حوالے سے آیات کا ترجمہ بیان کرتے ہیں: حضرت نوح علیہ السلام اپنی قوم سے مخاطِب ہوکر فرماتے ہیں:(1)'' اے میری قوم!میں اس (دعوتِ حق) پرتم سے کوئی مال طلب نہیں کرتا، میرا اجر تو فقط اللہ کے ذمۂ کرم پر ہے، (ہود: 29)‘‘۔ (2): ''اور میں اس (دعوتِ حق) پر تم سے کوئی اجر نہیں مانگتا ، میرا اجر تو فقط رب العالمین کے ذمے ہے ، (الشعرائ:109)‘‘۔حضرت ہود علیہ السلام فرماتے ہیں: (3)''اے میری قوم!میں اس (دعوتِ حق) پرتم سے کوئی اجر نہیں مانگتا، میرا اجر تو فقط اُس کے ذمے ہے جس نے مجھے پیدا کیا، کیا تم سمجھتے نہیں ہو ، (الانعام:51)‘‘۔ (4) ''بے شک میں تمہاری طرف امانت دار رسول ہوں ،پس اللہ سے ڈرو اور میری اطاعت کرو اور میں اس (دعوتِ حق )پرتم سے کوئی اجر نہیں مانگتا، میرا اجر تو صرف ربُّ العالمین کے ذمے ہے ، (الشعرائ:125-127)‘‘۔ (5) حضرت صالح علیہ السلام فرماتے ہیں: ''بے شک میں تمہاری طرف امانت دار رسول ہوں، پس اللہ سے ڈرو اور میری اطاعت کرو اور میں اس (دعوتِ حق) پرتم سے کوئی اجر نہیں مانگتا، میرا اجر تو صرف ربُّ العالمین کے ذمے ہے، (الشعرائ: 143-145)‘‘۔ (6)حضرت لوط علیہ السلام فرماتے ہیں: ''بے شک میں تمہاری طرف امانت دار رسول ہوں ،پس اللہ سے ڈرو اور میری اطاعت کرو اور میں اس (دعوت حق )پرتم سے کوئی اجر نہیں مانگتا، بس میرا اجر توربُّ العالمین کے ذمے ہے، (الشعرائ: 162-164)‘‘۔ (7)حضرت شعیب علیہ السلام فرماتے ہیں: ''بے شک میں تمہاری طرف امانت دار رسول ہوں، پس اللہ سے ڈرو اور میری اطاعت کرو اور میں اس (دعوتِ حق) پرتم سے کوئی اجر نہیں مانگتا، میرا اجر تو صرف ربُّ العالمین کے ذمے ہے، (الشعرائ:178-180)‘‘۔

تفسیر کا اعلیٰ درجہ تفسیر القرآن بالقرآن ہے۔ سورۂ ہود:29میں تو ہود علیہ السلام صراحت کے ساتھ فرماتے ہیں:''میں اس (دعوتِ حق) پرتم سے کوئی مال نہیں مانگتا‘‘۔اس سے معلوم ہوتا ہے کہ انبیائے کرام علیہم السلام نے جس اجر کی نفی فرمائی ہے، اس سے دنیوی اجر مراد ہے اور ظاہر ہے کہ انبیائے کرام علیہم السلام پیغامِ رسالت کو پہنچانے کے لیے کسی دنیوی صلے کی تمنا ہرگز نہیں کرسکتے۔ یہی وجہ ہے کہ تین مقامات پر نبی کریم ﷺ جب یہی بات اپنی قوم سے فرماتے ہیں تو آپ کوقوم کی جانب سے جو اجر یا جزا مقصود ہے ، وہ قبولِ حق ہے، اس لیے دو مقامات پرآپﷺفرماتے ہیں: ''یہ تو نصیحت ہے تمام جہان والوں کے لیے‘‘اور تیسرے مقام پر آپ فرماتے ہیں:''سوائے اس کے کہ جو چاہے اپنے رب کی طرف راستے کو اختیار کرلے‘‘۔ یہ معنی حدیث پاک کے بالکل مطابق ہے : آپ ﷺنے حضرت علی رضی اللہ عنہ سے فرمایا تھا:

سہل بن سعد بیان کرتے ہیں:انہوں نے نبی ﷺ کوغزوۂ خیبر کے دن یہ فرماتے ہوئے سنا: میں ضروریہ جھنڈاکل اُس شخص کودوں گاجس کے ہاتھوں پر اللہ تعالیٰ فتح عطا فرمائے گا،جو اللہ اور اس کے رسول سے محبت کرتا ہے اور اللہ اور اس کا رسول اس سے محبت کرتے ہیں، راوی بیان کرتے ہیں: لوگ شب بھر مضطرب رہے کہ (کل صبح )جھنڈا کسے عطا کیا جاتا ہے، پس جب صبح ہوئی تولوگ رسول اللہﷺ کے پاس آئے ،ہر ایک کی تمنا تھی کہ یہ اعزاز اُسے ملے۔ پھر آپ ﷺ نے فرمایا: علی بن ابی طالب کہاں ہیں؟، آپ کو بتایا گیا : انہیں آشوبِ چشم کی شکایت ہے ، آپ ﷺ نے فرمایا: اُسے بلا ئو، سو وہ بلائے گئے ، پھر آپ ﷺ نے اُن کی آنکھوں میں اپنا لعابِ مبارک لگایا اور اُن کے لیے دعائے صحت فرمائی، وہ ایسے صحت یاب ہوئے کہ گویا انہیں کبھی تکلیف ہوئی ہی نہیں تھی، سو آپ نے جھنڈا انہیں عطا کردیا۔ حضرت علی نے فرمایا: یارسول اللہ!کیا میں اُن سے لڑتا رہوں یہاں تک کہ وہ ہم جیسے ہوجائیں (یعنی اسلام قبول کرلیں)، آپ ﷺ نے فرمایا: نرم روی سے چلتے رہو یہاں تک کہ تم اُن کی سرزمین پر پہنچ جائو، پھر انہیں اسلام کی دعوت دواور انہیں یہ بتائو کہ اُن پر اللہ کا کیا حق واجب ہے، پس اللہ کی قسم! اگر تمہاری وجہ سے ایک شخص بھی ایمان لے آئے، تو یہ تمہارے لیے سرخ اونٹوں (کے ریوڑ) سے بہتر ہے ، (بخاری:4210)‘‘۔

''حُمُرُ النَّعَم‘‘یعنی سرخ اونٹوں کا ریوڑ ،دولتِ دنیا کی کثرت سے استعارہ ہے ،گویا رسول اللہﷺ نے فرمایا:جہاد کا مقصد کشور کشائی اور مالِ دنیا کا حصول نہیں ہے ،بلکہ دعوتِ دین کو پھیلانا ہے،اس لیے آپ ﷺ نے ایک شخص کے ایمان لانے کو بھی دنیا کی دولت سے بڑی نعمت قرار دیا ۔ پس معلوم ہوا کہ انبیائے کرام علیہم الصلوٰۃ والسلام کا مقصود دنیا کا مال جمع کرنا نہیں تھا بلکہ عالَمِ انسانیت کو نعمتِ ایمان سے سرفراز کر کے ان کی عاقبت کو سنوارنا تھا۔

جوچار مقامات رسول اللہ ﷺ کی ذاتِ گرامی سے متعلق ہیں، اُن میں سے تین یہ ہیں: حضرات ابراہیم ،اسحاق ، یعقوب ، نوح ،داوٗد، سلیمان ، ایوب، یوسف، موسیٰ، ہارون، زکریا ،یحییٰ، عیسیٰ، الیاس، اسماعیل ،الیَسَع، یونُس اور لوط علیہم الصلوٰۃ والسلام کاذکر فرمانے کے بعد اللہ تعالیٰ فرماتا ہے: (1) ''(اے نبی!)یہی وہ لوگ ہیں، جنہیں اللہ نے ہدایت دی، سو آپ بھی ان کے طریقے پر چلیں، آپ کہیے! میں اس (دعوتِ حق) پرتم سے کوئی اجر نہیں مانگتا ،یہ تو صرف تمام جہان والوں کے لیے نصیحت ہے، (الانعام:90)‘‘۔ (2) ''اور ہم نے آپ کو فقط بشیر ونذیر بناکر بھیجا ہے،آپ کہیے! میں تم سے اس (دعوتِ حق)پر کوئی اجر نہیں مانگتا ، سوائے اس کے کہ جو چاہے اپنے رب کی طرف راستے کو اختیار کرلے،(الفرقان:56-57)‘‘۔ (3)''آپ کہیے! میں تم سے اس (دعوتِ حق )پر کوئی اجر نہیں مانگتا اور میں تکلّف کرنے والوں میں سے نہیں ہوں، یہ تو فقط نصیحت ہے تمام جہان والوں کے لیے ،(ص: 86-87)‘‘۔ ان تین مقامات پر رسول اللہ ﷺ طلبِ اجر کی نفی فرمائی ہے ، دومقامات پرفرمایا:یہ تو تمام جہانوں کے لیے نصیحت ہے اور ایک مقام پر فرمایا: سوائے اس کے کہ جو چاہے اپنے رب کی طرف راستے کو اختیار کرلے، الغرض ان تینوں آیات میں بنیادی مقصد دعوتِ دین کا ابلاغ اور لوگوں کو اللہ کی طرف بلانا بتایا گیا ہے۔

چوتھے مقام پر اللہ تعالیٰ آپ کو حکم فرماتا ہے: (4) ''آپ کہیے! میں اس (دعوتِ حق) پرتم سے کوئی اجر نہیں مانگتا،سوائے قرابت داروںکی محبت کے،(الشعرائ:23)‘‘۔ دیگر دس مقامات کے برعکس یہاں بظاہر اسلوب تبدیل ہوجاتا ہے اور اس لیے اس پر اشکالات پیدا ہوئے اور مفسرینِ کرام کے ذہن میں یہ سوال پیدا ہوا کہ ہر نبی تو اپنی قوم سے یہ کہے :''میں اس (دعوتِ حق) پرتم سے کوئی اجر نہیں مانگتا‘‘ اورآپ ﷺ بھی تین مقامات پریہی بات کریں ،مگرایک مقام پر یہ کہیں:''سوائے (میرے) قرابت داروں کی محبت کے ‘‘۔ پس اس کے تین معنی بیان کیے گئے ہیں،ایک میں عموم ہے:

''حضرت عبداللہ بن عباس بیان کرتے ہیں :کفارِ مکہ نے کہا:اگر آپ یہ سب کچھ دولت کی خاطر کر رہے ہیں تو ہم آپ کو اتنا مال دیں گے کہ آپ مکہ کے امیر ترین شخص ہوجائیں گے اور آپ جس عورت سے شادی کرنا چاہیں، ہم اس کا بھی انتظام کردیں گے ، بس آپ ہمارے معبودوں کو برا کہنا چھوڑ دیں۔ انہوں نے ایک درمیانی راستہ بھی تجویز کیا کہ ایک سال ہم آپ کے معبود کی عبادت کرلیں گے اور ایک سال آپ ہمارے معبودوں لات وعُزّّیٰ کی عبادت کرلیں، یعنی سودے بازی کی بھی پیشکش کی۔ اس کے رد میں اللہ تعالیٰ نے سورۃالکافرون نازل فرمائی، (جامع البیان، رقم الحدیث: 29563)‘‘۔ الغرض کفار کو واضح پیغام مل گیا :

باطل دوئی پسند ہے ،حق لاشریک ہے

شرکت میانۂ حق وباطل نہ کر قبول

چنانچہ علامہ پیر کرم شاہ الازہری لکھتے ہیں:

متعدد مقامات پر مختلف انبیائے کرام کے یہ اعلانات مذکور ہیں:''میں تم سے کسی اجر کا سوال نہیں کرتا، میرا اجر تو رب العٰلمین کے ذمے ہے‘‘۔جب دیگر انبیاء اپنی قوموں سے نہ کوئی اجر طلب کر رہے ہیں اور نہ کسی دنیوی اور مالی منفعت کی خواہش کر رہے ہیں، تو سید المرسلین کے متعلق یہ کیسے باور کیا جاسکتا ہے کہ آپ ﷺ نے کسی قسم کی منفعت کی خواہش کی ہو۔دنیا کی کوئی بڑی سی بڑی نعمت، کسی قارون کے بھرے ہوئے خزانے،ارضِ خدا کی فرماں روائی، ان دعاہائے نیم شبی اور گریہ ہائے سحر گاہی کا صلہ نہیں ہوسکتی، جن سے رحمۃ للعالمین ﷺ نے نوع انسانی کو مشرف فرمایا۔ سچ تو یہ ہے کہ اس مُرقع دلربائی وزیبائی کی نوکِ مژگاں پر لرزتا ہوا ایک آنسو سارے عالم سے زیادہ قیمتی ہے۔اگر حضور اپنی اِس دل سوزی واشکباری کے معاوضہ کی تمنا بھی کرتے ،تو آپ ﷺ کی شان رفیع سے بہت فروتر ہوتا، دشمنوں کو انگشت نمائی کا موقع مل جاتا، یہودی اور عیسائی ہمیں طعنہ دے دیتے کہ ہمارے رہنمائوں نے تو یہ اعلان کیا: '' میں تم سے اس (دعوتِ حق پر)کوئی اجر نہیں مانگتا ، میرا اجر توبس رب العالمین کے ذمے ہے ‘‘اور تمہارے رسول نے ''مَوَدَّۃِ قُرْبٰی‘‘ یعنی اپنے اہل بیت کی محبت کاسوال کر کے اپنی ساری محنت کا معاوضہ طلب کرلیا، العیاذ باللہ!۔حالانکہ اسی سورت کی آیت: 02 میں اللہ تعالیٰ نے فرمایا: ''اور جو شخص آخرت کی کھیتی کا ارادہ کرتا ہے ،ہم اس کی کھیتی میں اضافہ کردیتے ہیں اور جو شخص دنیا کی کھیتی کا ارادہ کرتا ہے ،ہم اُس کو اُس میں سے کچھ دے دیتے ہیں اور اُس کے لیے آخرت میں کوئی حصہ نہیں ہے‘‘،(ضیاء القرآن، ج: 4، ص: 377،بتصرف)‘‘۔یہ مضمون آئندہ کالم کے ساتھ مربوط ہے۔