فدائیانِ ختم ِنبوت کی توجہ کے لیے

الحمد للہ! قانونی ترمیم کے ذریعے پارلیمنٹ کے امیدواروں کی رکنیت فارم کے ساتھ لازمی ڈیکلریشن میں اقرارِ ختم نبوت کی شق کے شروع میں''حلفیہ اقرار کرتا ہوں‘‘ کے الفاظ دوبارہ شامل کردیے گئے ہیں اور قانون سازی کی حد تک اس دانستہ فعل یا غفلتِ مجرمانہ کا ازالہ ہو چکا ہے۔ اب یہ ترمیم ''الیکشن ریفارمز ایکٹ‘‘ کا حصہ بن چکی ہے، جن دینی وسیاسی جماعتوں، تنظیموں اور افراد نے اس پر خالصتاً رضائے الٰہی، سید المرسلینﷺ کی محبت اور عقیدۂ ختم نبوت کے تحفظ کے لیے ہر سطح پر احتجاج کیا، وہ یقینا عند اللہ ماجور ہوں گے اور اپنے آقا خاتم النبیین سیدنا محمد رسول اللہﷺ کی بارگاہ میں سرخرو ہوں گے۔ مسلم لیگ (ن) کی سطح پرجناب راجا ظفر الحق کی سربراہی میں قائم کمیٹی کی تحقیقات کا شدت سے انتظار رہے گا تاکہ معلوم ہوسکے کہ اس مجرمانہ فعل کا ذمہ دارکون ہے اور اُسے کیا سزا دی گئی۔ اس وقت حکومتِ وقت معتوب بلکہ مغضوب ہے، اپوزیشن اگرچہ باہم منقسم ہے لیکن سب حکمراں جماعت مسلم لیگ (ن) اور اس کی قیادت پر چاند ماری کرکے ثواب کمانے میں ایک دوسرے پر سبقت لینے میں مصروف ہیں۔ اس شور و غوغا میں پوری صورتِ حال کا صحیح ادراک نہیں کیا جا رہا ،چنانچہ مجھے انگلینڈ سے مولانا نصیر اللہ نقشبندی نے فون کیا کہ علماء ومشائخِ اہلسنت کی خواہش ہے کہ آپ اس مسئلے کے تمام پہلوئوں کو اجاگر کریں۔

یہاں یہ بھی ریکارڈ پر لانا ضروری ہے کہ پارلیمنٹ کے دونوں ایوانوں میں جو پُر زور احتجاج ہوا‘ وہ ختم نبوت کے اقرار نامے میں ''حلف ‘‘ کے حذف کرنے پر نہیں تھا‘ بلکہ وہ صرف اُس دفعہ کے حذف کرنے پر تھا جس کے تحت قومی اسمبلی کی رکنیت کے لیے نااہل قرار دیا ہوا شخص کسی سیاسی جماعت کا سربراہ نہیں بن سکتا،کیونکہ اس کا براہِ راست فوری فائدہ نواز شریف صاحب کو پہنچانا مقصود تھا۔ صرف اِس دفعہ کوخلافِ دستور قرار دینے کی بابت کئی افراد نے سپریم کورٹ آف پاکستان میں پٹیشنز دائر کی ہیں، سب کو سپریم کورٹ کے فیصلے کا انتظار ہے۔ ضروری نہیں ہے کہ کسی مسئلے کا قانونی جواز ہر صورت میں اخلاقی معیار پر بھی پورا اترے۔ اس کی واضح مثال نیب کا 'پلی بارگین‘ یعنی ''استدعا برائے مُک مُکا‘‘ کا قانون ہے، جو تاحال نہ صرف ہمارے ملک کا باقاعدہ قانون ہے، بلکہ دنیا کے کئی ممالک میں اس طرح کے قوانین رائج ہیں۔ اس کا جواز یہ بتایا جاتا ہے کہ عدالتی معیار پر جرم کے ثبوت دستیاب نہ ہونے کے سبب اکثرصورتوں میں ملزم بری ہوجاتے ہیں، لہٰذا کچھ بھی برآمد نہ ہونے کی بجائے دبائو ڈال کر کچھ نہ کچھ برآمد کر لینا ہی بہتر ہے لیکن ظاہر ہے کہ اس میں کرپشن کا خفیہ سوراخ بھی ممکنہ طور پر موجود ہے۔

ہمارے ہاں جذباتی فضا میں پورا سچ بیان کرنا دشوار ہوتا ہے یہ ''آ بیل مجھے مار‘‘ کے مترادف ہے لیکن اب مناسب وقت ہے کہ سیاسی یا غیر سیاسی میدان میں مذہبی تنظیمیں چلانے والے حضرات اس مسئلے کے تمام پہلوئوں پر توجہ دیں اور آئندہ جب بھی کسی دینی مسئلے پر احتجاج کی نوبت آئے تو سب ذمہ داران سے مسئولیت ہو۔ اس میں کوئی شک نہیں کہ اصل ذمہ داری حکومتِ وقت اور حکمراں جماعت کی ہوتی ہے لیکن دوسرے ارکانِ پارلیمنٹ بھی بری الذمہ قرار نہیں دیے جا سکتے۔

پارلیمنٹ کی الیکشن ریفارمز کمیٹی کافی عرصے سے جامع انتخابی اصلاحات پر کام کر رہی تھی، اس کے ذمے انتخابات کے متفرق قوانین کو جامع اندا ز میں یکجا کر کے ان میںمزید اصلاحات کرنا شامل تھا۔ ہماری پارلیمنٹ کے دونوں ایوانوں کے ارکان کی مجموعی تعداد 446 ہے، قومی اسمبلی کے ارکان کی کل تعداد 342 اور سینیٹ کی 104 ہے۔ ہمارے ہاں قانون سازی کا طریقۂ کار یہ ہے کہ ڈرافٹ بل یعنی مسوّدۂ قانون وفاقی وزیرِ قانون یا کوئی بھی مُجاز وزیر‘ اسمبلی میں پیش کرتا ہے، پہلے اس پر عمومی بحث ہوتی ہے، پھر دوسری اور تیسری خواندگی ہوتی ہے۔ الغرض قومی اسمبلی کے سپیکر اور چیئرمین سینیٹ مسوّدۂ قانون کا ایک ایک لفظ، ایک ایک جملہ پڑھوا کر ایوان میں سناتے ہیں اور ایوان سے بل کی شق وار منظوری لیتے ہیں اور پھر صدرِ مملکت کے دستخط ہونے کے بعد وہ ایکٹ یعنی ملک کا قانون بن جاتا ہے۔

جس مسئلے پر نزاع پیدا ہوا، وہ ایمان وکفر کا مسئلہ نہیں تھا کیونکہ اقرارِ ختم نبوت کی عبارت ڈیکلریشن فارم میں موجود تھی اور اسلامی عقائد کی کسی کتاب میں یہ درج نہیں ہے کہ اگر کوئی غیر مسلم حلف اٹھائے بغیر کلمۂ اسلام پڑھے تو وہ اسلام میں داخل نہیں ہو سکتا یا کسی مسلمان کاحلف کے بغیر ختم نبوت کا اقرار کرنے سے اُس کا عقیدہ مشتبہ قرار پائے گا۔ پس علمائے ربانییّن کی ذمہ داری ہے کہ اَدِلّہ ٔ شرعیہ کی روشنی میں جس بات پر جتنا شرعی حکم مرتّب ہوتا ہو، وہ لگایا جائے، خواہ وہ حکم تفسیق و تضلیل کا ہو یا پھر انتہائی درجے میں کفر وارتدادکا۔ درپیش صورت حال میں یہ جرم سرزد ہوا کہ ''حلفیہ اقرار کرتا ہوں‘‘ کے الفاظ حذف کر دیے گئے اور اسی طرح Solemnly کا لفظ بھی حذف کردیا گیا تھا، جس کے معنی ہیں: ''صدقِ دل سے ‘‘، باقی مجرّد اقرار نامہ بدستور موجود تھا۔ میں نے ایک ماہرِ قانون سے پوچھاکہ عام حالات میں حلف کے بغیر بھی اقرارِ ختم نبوت معتبر ہے، یہاں ''حلفیہ اقرار‘‘کے الفاظ حذف کرنے سے کیا قانونی اثر مرتّب ہوگا؟ انہوں نے جواب دیا: ''اگر ایک شخص نے ختم نبوت کا حلفیہ اقرار کیا ہے اور بعد میں ناقابلِ تردید شواہد سے یہ ثابت ہو جائے کہ وہ ختم نبوت پر ایمان نہیں رکھتا، تو جھوٹا حلف نامہ داخل کرنے پر اسے پارلیمنٹ کی رکنیت سے نا اہل قرار دیا جاسکتا ہے‘‘، سو قانونی نتائج کے اعتبار سے ''حلفیہ اقرار‘‘ کی بڑی اہمیت ہے۔

دیانتاً اور قضاء ً یعنی قانون کی نظر میں پارلیمنٹ کی ''انتخابی اصلاحاتی کمیٹی‘‘ اور پارلیمنٹ کے دونوں ایوانوں کے 446ممبران جوابدہ ہیں، یہ درست ہے کہ ہم ستّر یا اسّی فیصد ذمہ داری حکومتِ وقت اور حکمراں اتحاد پر ڈالیں گے لیکن بیس یا تیس فیصد ذمہ داری سے پارلیمنٹ کا ایک بھی ممبر بری الذمہ نہیں ہو سکتا۔ اس میں مذہبی سیاسی پس منظر رکھنے والے اور مذہبی جماعتوں کے ارکان کی ذمہ داری دوسروں سے بدرجہا زائد ہے۔ لیکن حیرت کا مقام ہے کہ سب ارکان جوابدہ بننے اور اپنی پوزیشن واضح کرنے کی بجائے حکومت پر حملہ آور ہو کر بری الذمہ، بلکہ آج کل کے محاورے کے مطابق ''پَوِتْر‘‘ ہو جاتے ہیں اور ہمارے سادہ لوح مذہبی لوگ مطمئن ہوجاتے ہیں، یہ ایسا ہی ہے کہ کوئی شخص چوری کرے اور پھر چوری کے خلاف احتجاج کرنے والوں کے مجمع میں شامل ہوکر پُر زور نعرے لگانا شروع کر دے۔

میں نے یہ آرٹیکل لکھنے سے پہلے جماعتِ اسلامی کے ذمے داران سے پوچھا کہ آپ بحیثیت جماعت اپنی پوزیشن واضح کریں کہ آپ نے یہ شق منظور ہونے، الیکشن ریفارمز کمیٹی کے مسوّدے کی تیاری اور پھر قومی اسمبلی اور پارلیمنٹ میں اس کی منظوری کے موقع پر پُر زور احتجاج کرتے ہوئے رائے شماری کا مطالبہ کیوں نہیں کیا تاکہ قوم کے سامنے یہ حقیقت کھل کر آتی کہ ان الفاظ کو حذف کرنے میں عملی، ذہنی اور فکری اعتبار سے کون کون سے ارکانِ پارلیمنٹ شامل ہیں۔ اس پر جماعتِ اسلامی کے قانونی شعبے کے جناب سیف اللہ گوندل نے مجھ سے جماعت کی پوزیشن واضح کرنے کے لیے رابطہ کیا۔ انہوں نے بتایا کہ ہمارے ممبران نے اس پر آواز اٹھائی تھی اور جنابِ سراج الحق اپنی جماعت کی مجلس شوریٰ کے اجلاس میں شرکت کے باعث سینیٹ میں خود شریک نہ ہو سکے اور انہوں نے جے یو آئی کے سینیٹر حافظ حمد اللہ کے ذمے لگایا کہ آپ اس مسئلے کو سینیٹ میں اٹھائیں۔ گوندل صاحب کے بقول انہوں نے یہ مسئلہ اٹھایا تو 13ارکان نے ان کی حمایت کی اورسینیٹر اعتزاز احسن سمیت 34ارکان نے اس کی مخالفت کی۔ میں نے گوندل صاحب سے کہا کہ ازراہِ کرم سینیٹ کی کارروائی کی نقل مجھے ارسال فرما دیں، انہوں نے کہا: سینیٹ کے ریکارڈ کی کاپی ہمیں سرِ دست دستیاب نہیں ہے، تاہم انہوں نے اپنا پریس ریلیز اور سیکرٹری سینیٹ آف پاکستان کے نام سینیٹر حافظ حمد اللہ صاحب کے خط کی کاپی ارسال کی۔ اسی طرح سے صاحبزادہ طارق اللہ، صاحبزادہ محمد یعقوب، شیر اکبر خان اور محترمہ عائشہ سیّد کے مشترکہ ناموں سے بھی مختلف شقوں اور دفعات کے حوالے سے قومی اسمبلی سیکرٹریٹ میں جمع کردہ ایک خط کی کاپی مجھے ارسال کی۔ یہ معلوم نہیں ہوسکا کہ یہ تجاویز دفتر ہی میں رد کردی گئیں یا اسمبلی کے فلور پر پیش ہوئیں اورکثرتِ رائے سے رد کردی گئیں، اس کی بابت تا حال مجھے ریکارڈ دستیاب نہیں ہو سکا۔ میری رائے میں جنابِ سراج الحق پر لازم تھا کہ اپنی مجلسِ شوریٰ کے اجلاس کو ایک دن کے لیے مؤخر کر دیتے اور اس حسّاس مسئلے پر بذاتِ خود اجلاس میں شریک ہوتے اور پُر زور احتجاج کرتے تا کہ جماعتی وابستگی سے قطع نظر تمام مخالفین بے نقاب ہوتے۔

بعد میں مولانا فضل الرحمن نے قومی اسمبلی میں فاٹا کے صوبۂ خیبر پختونخوا میں انضمام و ادغام کے مسئلے پر گفتگو کرنے کے علاوہ ختم نبوت کے اقرار نامے میں ''حلفیہ اقرار کرتا ہوں‘‘ کے الفاظ حذف ہونے پر بھی گفتگو کی، اس غفلتِ مجرمانہ کے ازالے پر اطمینان کا اظہار کرتے ہوئے یہ اعتراف بھی کیا: ''اس غفلت کی ذمہ داری ہم سب پر عائد ہوتی ہے‘‘، میں جہاں اس غفلتِ مجرمانہ کی مذمت کرتا ہوں، وہاں مولاناکے اعتراف پر ان کی تحسین بھی کرتا ہوں، کسی اور ممبر نے اس طرح واضح طور پر اپنی غلطی کا اعتراف نہیں کیا۔ اب دیانت دارانہ اور جامع تحقیق کے بعد ہی نتیجہ سامنے آسکتا ہے کہ آیا یہ سب کچھ دانستہ اورکسی داخلی یا خارجی قوت کے ایما پر ہوا ہے یا محض بشری فروگزاشت ہے۔ مذہبی طبقات سمیت کسی بھی فرد سے بشری فروگزاشت کے امکان کو رد نہیں کیا جا سکتا، لیکن 446 ارکان پر مشتمل ارکانِ پارلیمنٹ سے اس طرح کی غفلتِ مجرمانہ کا صدور پوری قوم کے لیے الارمنگ ہے کہ ہمارے منتخب نمائندے اپنے اہم فرائض کے بارے میں کس قدر غیر سنجیدہ اور غافل رہتے ہیں۔

اس مضمون کا بقیہ حصہ اگلے کالم میں ملاحظہ فرمائیں۔