ایوانِ صدر میں میری گفتگو کا خلاصہ

16 جنوری 2018ء کو ایوانِ صدر میں جو مجلس قائم ہوئی، اگر اس پر ''پیغامِ پاکستان‘‘ کا بوجھ نہ ڈالا جاتا اور براہِ راست فتوے کے پیغام کو پوری قوت سے پھیلایا جاتا، تو اس سے بہتر نتائج برآمد ہوتے۔ چنانچہ اصل مخاطَبین یعنی تحریک طالبانِ پاکستان نے فتوے کے پیغام کو ہی اصلِ مقصد سمجھا اور اپنا جوابی بیانیہ فتوے کی صورت میں پیش کیا ہے۔

میں پہلے بھی لکھ چکا ہوں کہ جمہوریت اپنی روح کے اعتبار سے سیکولر ہے؛ تاہم جب تک دستور کے آرٹیکل 2 میں ہر قسم کی قانون سازی کو قرآن و سنت کے تابع قرار دینے کی لازمی شرط موجود ہے، یہ آرٹیکل ہماری جمہوریت کو قانون سازی کی حد تک پابند کرکے دیگر سیکولر دساتیر سے ممتاز کرتا ہے، لیکن جب تک آرٹیکل 2 کو پورے دستور پر بالا دست اور غیر متبدل نہیں مانا جائے گا، اس سے انحراف کا امکانی خطرہ موجود ہے، کیونکہ قانون سازی پارلیمنٹ کے اختیار میں ہے اور اُسے دو تہائی اکثریت سے دستور میں ترمیم کا حق بھی حاصل ہے۔ ماضی میں سابق چیف جسٹس ڈاکٹر نسیم حسن شاہ اس حوالے سے ایک خطرناک ریمارکس دے چکے ہیں کہ آئین کا کوئی آرٹیکل دوسرے آرٹیکلز کو Overlap نہیں کر سکتا، یعنی بالا دست نہیں ہے۔ افغانستان کے صدر جناب اشرف غنی اور اسلام آباد میں افغانستان کے سفیر جناب عمر زخیلوال نے یہ نہیں کہا کہ ہمیں بھی ایک ''پیغامِ افغانستان‘‘ مرتّب کرکے دے دیجیے، بلکہ یہ کہا کہ ہمارے لیے بھی ایک ایسا ہی فتویٰ جاری کرا دیجیے۔ ظاہر ہے کہ اس فتوے کے اصل مخاطَب تحریک طالبان پاکستان اور اُن کی فکر سے متاثرہ لوگ ہیں۔

میں نے اسی لیے اپنی مختصر گفتگو میں کہا تھا: ہمیں فلسفیانہ گفتگو کرنے کی بجائے براہِ راست درپیش مسئلے پر بات کرنی چاہیے اور وہ مسئلہ یہ ہے ''داعش، القاعدہ یا تحریکِ طالبانِ پاکستان جو بھی نام دیں، اُن کا بیانیہ یا مؤقف یہ ہے کہ جمہوریت کفر ہے، پاکستان کا دستوری نظام کفر ہے اور اس کے خلاف جہاد فرض ہے۔ پاکستان کی پارلیمنٹ، مسلّح افواج اور پوری اسٹیبلشمنٹ کفر و ارتداد کے اس نظام کی محافظ ہے۔ پس جو عوام اس کفریہ نظام کو مٹانے کے لیے میدانِ عمل میں نہیں آ رہے، بالواسطہ وہ بھی کفر کے حامی ہیں اور جو علماء اُن کے نظریے کے حامی بن کر اس پورے ریاستی اور دستوری نظام کے خلاف آواز بلند نہیں کرتے یا جہاد نہیںکرتے، اُن کا بھی یہی حکم ہے، سو ان سب کے خلاف جہاد واجب ہے‘‘۔ میں نے اپنے فتوے میں بھی اسی بنیادی نکتے کو موضوع بنایا، کیونکہ ہمارا دستور قرآن و سنت کی بالادستی کا حامی ہے، ریاست کو پابند کرتا ہے کہ قرآن و سنت کے خلاف کوئی قانون نہ بنے، ریاست اپنے عوام کو اسلامی احکام کے مطابق زندگی گزارنے کے لیے حالات کو سازگار بنائے اور سہولتیں فراہم کرے۔ لہٰذا اپنے دستوری میثاق کے مطابق اسلامی جمہوریہ پاکستان ایک اسلامی ریاست ہے اور اس کی ہیئتِ مقتدرہ یعنی اسٹیبلشمنٹ جب تک عَلانیہ احکامِ الٰہی کو ردّ نہ کرے، اس پر کفر کا اطلاق نہیں کیا جا سکتا، البتہ اپنے دستوری میثاق پر پورا نہ اترنے یا مِن و عَن شریعتِ الٰہی پر عمل نہ کرنے کے سبب وہ خالق اور خلق کے سامنے جوابدہ رہیں گے۔ مزید یہ کہ آئین و قانون کے دائرے میں رہتے ہوئے پُرامن طریقے سے نفاذِ شریعت کے لیے آواز بلند کرنا یا جدّوجہد کرنا دستور کا تقاضا بھی ہے اور جمہوری اقدار کے منافی بھی نہیں ہے۔ لہٰذا ہم پورے نظام کو کفر قرار دینے کے بیانیے کو ردّ کرتے ہیں‘‘۔

لیکن بعد کے خطابات روایتی انداز اختیار کر گئے اور چونکہ فتوے پر ''پیغام پاکستان‘‘ کا بوجھ لاد دیا گیا تھا، لہٰذا فتویٰ پسِ پشت چلا گیا اور پیغامِ پاکستان کی قصیدہ خوانی اصل موضوع بن گئی، حالانکہ یہ کاوش بنیادی طور پر فتوے کے اجراء کے لیے کی گئی تھی، لیکن کچھ عناصر کریڈٹ لینے کے لیے ایسے مواقع پر قابض ہو کر اصل مشن کو غارت کر دیتے ہیں۔ چنانچہ تحریکِ طالبانِ پاکستان کا جوابی بیانیہ یا موقف بعنوان: ''اَلْحَارِقُ عَلَی الْمَارِق (دین سے نکلنے والے کے لیے آتشیں ہتھیار)‘‘ سامنے آیا، اس سے میرے مؤقف کی تائید ہو گئی، میں نے اپنی گفتگو میں یہ بھی کہا کہ ہمارے اصل دشمن وہ ہیں جو بیرونِ ملک اپنی کمین گاہوں میں بیٹھ کر ہمارے وطنِ عزیز کے اندر قتل و غارت کے منصوبے بنا رہے ہیں، ہماری سلامتی کے اداروں کے اہلکاروں اور بے قصور لوگوں کو قتل کر رہے ہیں، ہماری دفاعی تنصیبات پر حملے کی منصوبہ بندی کرکے اپنے کارندوں کے ذریعے اس پر عمل در آمد کرتے ہیں اور بعض وہ ہیں جو ہماری سرحدوں کے اندر بیٹھ کر دہشت گردی کی کارروائیاں کر رہے ہیں۔ اس کے لیے وہ اُسی بیانیے کو بنیاد بناتے ہیں، جس کا میں نے ابتدا میں ذکر کیا ہے؛ چنانچہ میں نے کہا: ہماری مسلّح افواج نے ضربِ عضب اور ردّالفساد کے نام سے ان باغی عناصر کے خلاف جو آپریشن شروع کر رکھا ہے، ہم اس کی حمایت کرتے ہیں۔ میں نے اپنی گفتگو میں بتایا: اسلام میں کفر و شرک کے بعد قتلِ ناحق سب سے بڑا گناہ ہے، قرآنِ کریم میں اللہ تعالیٰ نے اولادِ آدم میں قتل کے پہلے واقعے کا پسِ منظر بیان کرکے فرمایا ''اسی سبب ہم نے بنی اسرائیل پر لکھ دیا کہ جس شخص نے قصاص یا فساد فی الارض کے بغیر کسی (بے قصور) جان کو قتل کیا تو گویا اس نے تمام انسانوں کو قتل کیا اور جس نے ایک (بے قصور) جان کو بچایا تو گویا اس نے تمام انسانوں کو بچا لیا اور بے شک ان کے پاس ہمارے رسول روشن معجزات لے کر آئے، پھر اس کے باوجود بہت سے لوگ زمین میں حد سے تجاوز کرنے والے ہیں اور جو لوگ اللہ اور اس کے رسول سے جنگ کرتے ہیں اور زمین میں فساد برپا کرتے ہیں، ان کی یہی سزا ہے کہ ان کو چن چن کر قتل کیا جائے یا ان کو سولی دی جائے یا ان کے ہاتھ اور پائوں مخالف سَمت سے کاٹ دیے جائیں یا اُن کو زمین سے نکال دیا جائے، یہ اُن کے لیے دنیا میں رسوائی ہے اور آخرت میں ان کے لیے بڑا عذاب ہے، سوائے اُن لوگوں کے جنہوں نے تمہارے ان پر غلبہ پانے سے پہلے توبہ کر لی ہو، سو جان لو کہ اللہ بہت بخشنے والا بہت رحم فرمانے والا ہے۔ (المائدہ: 32-34)‘‘۔

اس آیت کی رُو سے فساد فی الارض اور قتلِ ناحق بہت بڑا جرم ہے اور یہی وجہ ہے کہ قرآن نے دیگر جرائم کے مقابلے میں اس کی سزا بھی سب سے سخت اور عبرت ناک مقرر کی ہے۔ یہ بھی واضح فرما دیا کہ شریعت انسانی جان کو تحفظ دیتی ہے، لیکن قتلِ ناحق اور فساد فی الارض کا مجرم اس تحفظ کا حق دار نہیں ہوتا، کیونکہ وہ خود اپنی جان کی حرمت کو اپنے عمل سے مباح کر چکا ہے۔ دوسرے مقام پر اللہ تعالیٰ نے فرمایا ''سو اگر مومنوں کا ایک گروہ دوسرے کے خلاف بغاوت کرے، تو بغاوت کرنے والے گروہ سے جنگ کرو یہاں تک کہ وہ اللہ کے حکم کی طرف لوٹ آئیں، سو اگر وہ (اللہ کے حکم کی طرف) لوٹ آئے تو ان دونوں کے درمیان عدل اور انصاف کے ساتھ صلح کرو۔ (الحجرات:9)‘‘۔

الغرض فساد فی الارض اور مسلمانوں کے نظمِ اجتماعی کے خلاف، جو ریاست کو قرآن و سنت کے مطابق قانون سازی کا پابند بناتا ہے، مسلّح بغاوت کو طاقت سے کچلنا ریاست کی ذمہ داری ہے۔ اگر یہ لوگ مغلوب ہونے سے پہلے توبہ کر لیں یا امرُ اللہ یعنی حکمِ شرعی کی طرف لوٹ آئیں، تو ان کے ساتھ مصالحت کی گنجائش موجود ہے۔ میں نے اپنی گفتگو میں یہ بھی کہا: گزشتہ دو تین سال سے امام الحج اور آئمۂ حرمین طیبین ان باغی گروہوں کو خارجی اور تکفیری قرار دے رہے ہیں، ہم ان آئمۂ کرام کی اس رائے کا خیر مقدم کرتے ہیں، لیکن اُن سے ہمیں گلہ ہے کہ ہم گزشتہ تقریباً پندرہ سال سے اس آگ میں جل رہے ہیں، اگر ہمارے دکھ کو انہوں نے اپنا دکھ سمجھا ہوتا اور روزِ اوّل سے یہ فتویٰ جاری کر دیا ہوتا، تو شاید اس آگ کے شعلے اُن کی سرحدوں تک پہنچنے سے پہلے بجھ چکے ہوتے، لیکن ایسا نہیں ہوا بلکہ وہاں سے ان گروہوں کو کسی نہ کسی انداز میں تائید اور نظریاتی و مادّی تقویت بھی ملتی رہی۔ لیکن اب چونکہ اس آگ کے شعلے ان کی سرحدوں پر دستک دے رہے ہیں، اس لیے ان کی تپش کو انہوں نے محسوس کیا اور یہ فتویٰ جاری کیا، سو ہم کہتے ہیں: اگرچہ ''بہت دیر کی مہرباں آتے آتے‘‘ لیکن پھر بھی دیر آید درست آید۔ لیکن اب بھی فکری اور استدلالی سطح پر منظّم انداز میں تسلسل کے ساتھ کام نہیں ہو رہا، جبکہ یہ فکر بہت سے ذہنوں میں راسخ ہو چکی ہے اور مرضِ مُزمِن کی شکل اختیار کر چکی ہے۔ پس جو اعتقادی بیماری دل دماغ میں پیوست ہو جائے اور ٹیومر کی شکل اختیار کر لے، تو اس کے لیے بہت جامع اور بے رحم آپریشن کی ضرورت ہوتی ہے۔ چنانچہ اسلامی نظریاتی کونسل کے رکن علامہ غلام محمد سیالوی نے بتایا کہ چائے کے وقفے کے دوران ایک عالم کہہ رہے تھے کہ یہ ''پیغامِ پاکستان‘‘ امریکی مفادات کی تکمیل کے لیے ہے۔ میں نے اپنی گفتگو میں یہ بھی کہا تھا: اقلیت کی اصطلاح ترک کر دینی چاہیے، کیونکہ یہ ایک اضافی اصطلاح ہے اور اس سے احساسِ محرومی کا تاثر پیدا ہوتا ہے، ہمیں غیر مسلم پاکستانی کی اصطلاح رائج کرنی چاہیے، کیونکہ ہر پابندِ آئین و قانون غیر مسلم پاکستانی کو جان و مال اور عزت و آبرو کے تحفظ کو بھی وہی حقوق حاصل ہیں جو صدر ممنون حسین یا مجھے یا کسی اور کو حاصل ہیں۔