’’دولت اسلامیہ؟‘‘

گزشتہ روز آپ نے رابرٹ فسک کی ایک رپورٹ کا ترجمہ ملاحظہ کیا ہو گا۔ جس میں داعش دنیا کے جن ملکوں پر اپنی ''خلافت‘‘ قائم کرنا چاہتی ہے‘ ان میں پہلے مرحلے پر مندرجہ ذیل ممالک کو شامل کیا گیا ہے۔ سپین‘ یونان‘ سابق یوگوسلاویہ‘ ترکی‘ مصر‘ مغرب اور نصف افریقہ‘ سارا بھارت ‘ پاکستان اور چین کا ایک بڑا حصہ شامل ہوں گے۔آپ نے یہ بھی ملاحظہ کیا ہو گا کہ داعش اپنے قیدیوں پر جو مظالم ڈھاتی اور ان کی ویڈیوزانٹرنیٹ پر لگاتی ہے‘ وہ کتنے بھیانک اور خوفناک ہوتے ہیں۔داعش کے قیدیوں کو جب مارنے کے لئے لے جایا جاتا ہے‘ تو وہ ایک نیم بے ہوش آدمی کی طرح بغیر کسی مزاحمت‘ اپنی قتل گاہ کی جانب جا رہے ہوتے ہیں۔ اس سے اندازہ کیا جا سکتا ہے کہ وہ زندگی سے کتنے تنگ آئے ہوئے ہیں؟ اور ان میں جینے کی ذرا بھی خواہش باقی نہیں رہی۔ گزشتہ دنوں آپ نے داعش کی جاری کردہ ایک اور ویڈیو دیکھی ہو گی‘ جو افغانستان کی ہے۔ وہاں پر داعش کے ''مجاہد‘‘ پتھریلی زمین پر دس بارہ گڑھے کھودتے ہیں۔ ان میںانتہائی طاقتور بم رکھ کر دبا دیتے ہیں اور پھر بم کے اوپر بنی ہوئی مٹی کی ڈھیری پرقیدی کو لے جا کر بٹھا دیتے ہیں۔ جس کے ہاتھ پیر بندھے ہوتے ہیں اور اسے کوئی خبر نہیں ہوتی کہ وہ کس جگہ بیٹھا ہے؟ دور سے داعش کے ''مجاہدین‘‘ بارود پر بنائی ہوئی ہر ڈھیری کے نیچے رکھے بم کو ریموٹ سے اڑا دیتے ہیں۔ ایسی دہشت ناک موت کا ذکر نہ کبھی تاریخ میں پڑھا ہے اور نہ ہی دنیا کے کسی خطے میں ابھی تک دیکھا گیا ہے۔ اس طرح سے انسانوں کو مارنا بھی دولت اسلامیہ کی ایجاد ہے۔ آج ایک نشریاتی رپورٹ پڑھی جو دولت اسلامیہ کے مختلف روپ کو سامنے لاتی ہے۔ اس سے پتہ چلتا ہے کہ داعش والے اپنے قیدیوں کی تجارت کس طرح کرتے ہیں؟اس کی جھلکیاں پیش خدمت ہیں۔

''اس وقت عراق اور ترکی کی سرحد پر رات کا ایک بجا ہے اور محافظ سرحدوں کے دروازے بند کرنے کی تیاری کر رہے ہیں۔اس کے ساتھ ہی مسافر ترکی جانے والی آخری بس پر جلدی جلدی سوار ہو رہے ہیں۔ لیکن ایک یزیدی خاندان خاموشی کے ساتھ چوکی پر نظریں جمائے کھڑا ہے۔اچانک ترکی کی سرحد کی جانب سے ایک عورت اور چار بچے نمودار ہوتے ہیں ‘جو عراقی سرحد پر کھڑے خاندان سے گلے ملتے ہیں اور پھر سبھی زار و قطار رونے لگتے ہیں۔ایک دوسرے سے گلے ملتے ہوئے وہ ایک دوسرے کی آنکھوں میں ایسے دیکھ رہے ہیں جیسے انہیں یقین نہ آ رہا ہو کہ وہ تمام دوبارہ ایک ساتھ ہیں۔خاتون کی عمر 35 سال اور بچوں کی عمریں چار سے دس سال کے درمیان ہیں۔ وہ پچھلے سال اگست میں عراق میں سنجر کے علاقے میں اپنے گاؤں پر دولت اسلامیہ کے حملے کے بعد اغوا کر لیے گئے تھے۔اغوا کے بعد ان لوگوں کو شام کے علاقے رقہ لے جایا گیا‘ جسے دو ماہ قبل ہی شدت پسند تنظیم دولت اسلامیہ نے اپنا حقیقی دارالخلافہ قرار دیا ہے۔خاتون بہت کمزور لگ رہی تھیں اور بہت مشکل سے کھڑی ہو پا رہی تھیں۔انہوں نے بتایا کہ' 'وہ سب بہت دہشت ناک تھا۔ وہ ہمیں ناکافی غذا اور پانی دیتے تھے اور ہمیں نہانے بھی نہیں دیتے تھے۔ وہ ہمیں کبھی کبھار مارتے بھی تھے۔‘‘یہ خاتون اور اس کے بچے اپنی رہائی کے لیے ایک عراقی تاجر عبداللہ کے احسان مند ہیں‘ جو پہلے شام سے زراعت کا سامان خریدا کرتے تھے مگر اب دولت اسلامیہ کے ہاتھوں اغوا شدہ لوگوں کے لیے آزادی خریدتے ہیں۔خاتون اور ان کے بچوں کو ان کے باقی خاندان سے ملانے کے بعد عبداللہ ہمیں اپنے معمولی سے مکان میں لے گئے‘ جہاں انہوں نے ہمیں اپنی 22 سالہ بھتیجی مروہ سے ملوایا۔خاتون کی طرح مروہ اور ان کے 55 رشتے داروں کو بھی دولت اسلامیہ کے جنگجوؤں نے پچھلے سال سنجر کے علاقے سے اغوا کر لیا تھا۔دو ماہ پہلے مروہ اپنے چچا سے رابطہ کرنے میں کامیاب ہو گئیں اور انہیں بتایا کہ انہیں رقہ کے ایک مکان میں قید رکھا گیا ہے۔عبداللہ کہتے ہیں' 'میں نے انہیں بتایا کہ وہ لوگ کرد زبان نہیں جانتے۔ اس لیے میری بات غور سے سنو۔ اگر تمہیں اس گھر سے نکلنے کا کوئی راستہ نظر آتا ہے تو میں تمہیں یہاں سے نکالنے کے لیے کسی کو بھیجوں گا۔‘‘ایک رات مروہ سامنے والے دروازے کی چابی چرانے میں کامیاب ہو گئیں اور وہاں سے باہر نکل آئیں۔مروہ نے بتایا کہ ''میں نے ایک ٹیکسی کو اشارہ کیا۔ ڈرائیور نے مجھ سے پوچھا کہ میں کہاں جانا چاہتی ہوں۔ پہلے تو اس نے مجھ سے کہا کہ وہ خوفزدہ ہے کیونکہ اگر دولت اسلامیہ کے لوگوں نے اسے میرے ساتھ دیکھ لیا ‘تو وہ ہم دونوں کو قتل کردیں گے۔ لیکن بعد میں وہ مجھے شہر کے دوسرے حصے تک لے جانے کے لیے راضی ہو گیا‘ جہاں پر بہت سے اچھے لوگ میری مدد کرسکتے تھے۔‘‘اگلے دن مروہ نے اپنے چچا سے رابطہ کرنے کی کوشش کی لیکن دولت اسلامیہ کے اغوا کار کو اس کی قیام گاہ کے بارے میں پتہ چل گیا تھا۔ اس نے مروہ کو پناہ دینے والوں سے کہا کہ یا تو وہ اسے واپس کریں یا پھر7500 ڈالر کے عوض خرید لیں۔اس نے مروہ کے چچا سے بھی رابطہ کیا۔ عبداللہ نے بتایا کہ میں نے اس سے کہا ''ٹھیک ہے مجھے کچھ وقت دو اور میں تمھیں رقم پہنچا دوں گا۔ لیکن میری بھتیجی کو ہاتھ نہیں لگانا۔‘‘اس کے بعد عبداللہ نے شام میں اپنے پرانے کاروباری رابطے استعمال کرنا شروع کیے اور بالآخر مروہ کو آزاد کروانے میں کامیاب ہو گئے۔

گذشتہ ایک سال کے دوران عبداللہ نے شام، ترکی اور عراق میں سمگلروں اور رابطوں کا نیٹ ورک بنا لیا ہے‘ جس کے ذریعے وہ اب تک 300 سے زائد عورتوں اور بچوں کو دولت اسلامیہ کے چنگل سے آزاد کرا چکے ہیں۔ جن میں زیادہ تر یزیدی ہیں۔انہوں نے اندازہ لگایا ہے کہ دولت اسلامیہ کی قید سے رہائی کی قیمت فی شخص 6000 سے 35000 ڈالر کے درمیان ہے۔نوجوان لڑکیوں کے لیے وہ زیادہ رقم طلب کرتے ہیں۔ یہاں تک کہ وہ بچوں کو بھی نہیں بخشتے۔ ''ایک مرتبہ ایک خاندان کو صرف ایک ماہ کے بچے کے لیے

6000 ڈالر دینا پڑے۔‘‘بہت سے خاندانوں کے لیے اتنی بڑی رقم کا انتظام کرنا تقریباً ناممکن ہوتا ہے۔مذکورہ خاتون اور ان کے بچوں کو ان کے سسر مروان نے 35000 ڈالر کے عوض آزاد کرایا۔ مروان نے بی بی سی کو بتایا کہ ''میرے پاس جو کچھ بھی تھا میں نے بیچ دیا۔ مجھے رقم حاصل کرنے کے لیے گھر گھر جانا پڑا۔ اب مجھے یہ ساری رقم واپس کرنی ہے مگر میرے پاس کچھ بھی نہیں ہے جبکہ میرے خاندان کے 17 افراد ابھی بھی دولت اسلامیہ کی قید میں ہیں۔‘‘اس سال کے شروع میں مروان نے اپنی ایک اور بہو اور اس کے دو بچوں کو آزاد کرنے کے لیے بھی 35000 ڈالر کا انتظام کیا تھا۔ لیکن وہ کرد سمگلر جو رقم پہنچانے کا کام کررہا تھا، مارا گیا اور 17500 ڈالر جو اسے دولت اسلامیہ کے اغوا کاروں کو دینے تھے‘ وہ بھی غائب ہو گئے۔وہ اب مطالبہ کررہے ہیں کہ اگر مروان اپنی بہو اور پوتے پوتیوں کو دوبارہ دیکھنا چاہتے ہیں تو وہ ان کو 10000 ڈالر بھجوائیں۔عبداللہ کا کہنا ہے کہ تاوان کی زیادہ تر رقم دولت اسلامیہ کو جانے کے بجائے انسانی سمگلروں کے پاس چلی جاتی ہے۔ لیکن ان کو معلوم ہے کہ ان کی اس کارروائی کے ذریعے اس گروہ کے پاس بھی کچھ نہ کچھ آ ہی جاتا ہے۔ ان کو اغواشدہ یزیدیوں کو ان کے خاندان سے واپس ملانے کا کوئی اور راستہ نظر نہیں آتا۔''دولت اسلامیہ کے لیے عورتیں اور لڑکیاں کسی شے سے زیادہ حیثیت نہیں رکھتیں اور ہمارے پاس یہ واحد راستہ ہے کہ ہم سرحد پر دوسرے سامان کی طرح ان کی بھی تجارت کریں۔‘‘ان کا کہنا تھا کہ سب سے مشکل مرحلہ رقم دیتے وقت دولت اسلامیہ کے لوگوں کے اصلی ہونے کی تصدیق کا ہوتا ہے۔پچھلے ایک سال کے دوران عبداللہ کے ساتھ کام کرنے والے 23 سمگلروں کو دولت اسلامیہ کے لوگ قتل کر چکے ہیں۔عبداللہ نے بتایا کہ ''کبھی کبھار وہ ہمیں فون کرکے یزیدیوں کو لے جانے کو کہتے ہیں۔ لیکن جب ہم اپنے آدمی دولت اسلامیہ کے علاقے میں بھیجتے ہیں وہ اغوا ہونے کے بعد مار دیے جاتے ہیں۔‘‘عراقی حکومت اور کرد حکام نے یزیدی قیدیوں کو بحفاطت واپس لانے کی کوششوں کو تیز کرنے کے لیے ایک دفتر قائم کیا ہے لیکن صاف ظاہر ہے کہ اس مقصد میں کامیابی آسان نہیں ہے۔ کردستان کی علاقائی حکومت کے یزیدی امور کے رابطہ کار نوری عثمان عبدالرحمٰن کے مطابق ''ابھی تک بہت سارے لوگ دولت اسلامیہ کی قید میں ہیں اور ہمارے پاس ابھی تک اتنی رقم نہیں ہے کہ ان تمام کو واپس لانے کے لئے سمگلروں کو دے سکیں۔‘‘بہت سارے خاندانوں کے پاس عبداللہ کی مدد کے سوا کوئی دوسرا راستہ نہیں ہے۔بہت سا تاوان ادا کیا جا چکا ہے اور یہ واضح ہے کہ قیدیوں اور ان کا انتظار کرنے والے ‘دونوں کے لیے یہ اس تکلیف کی قیمت ہے ‘جو انہیں ان کی زندگی کے سب سے بڑا سانحے سے ملی ہے۔مروہ ابھی تک اپنے اوپر بیتنے والے واقعے کے صدمے سے باہر آنے کی کوشش کررہی ہیں۔ مروہ کہتی ہیں کہ ''جب میں پریشان ہوتی ہوں تو مجھ پر گھبراہٹ کے دورے پڑتے ہیں اور سانس لینا مشکل ہوجاتا ہے اور مجھے اپنے اور دوسری لڑکیوں پر بیتنے والے واقعات کی بازگشت سنائی دیتی ہے۔‘‘عبداللہ کی کوششوں کے بعد بھی‘ اپنے خاندان میں یہ واحد فرد ہے جو رہا ہونے میں کامیاب ہو ئی ہے۔‘‘

روزنامہ دنیا ایپ انسٹال کریں