وہ چلا گیا…

خاتونِ خانہ کو ہانڈی چاٹنے کی عادت تھی‘ جو اس کے مہذب میاں کو بہت بُری لگتی۔ یہ عادت چھڑانے کے لیے اس نے لاکھ سمجھایا، کئی جتن کئے لیکن کوئی نصیحت، کوئی حربہ کارگر نہ ہوا‘ تو ایک دِن دھمکی دے دی، تمہیں آئندہ ہانڈی چاٹتے دیکھا تو سمجھو تین طلاقیں ہو گئیں‘ لیکن پرانی عادت آسانی سے تھوڑا چھوٹتی ہے۔ ایک شام صاحب گھر آئے تو دیکھا، محترمہ ہانڈی چاٹ رہی تھیں۔ گویا تین طلاقیں ہو گئیں۔ اس ایک بری عادت کے سوا، خاتون میں سو خوبیاں تھیں۔ اب تین طلاقیں ہو جانے پر موصوف بہت پچھتائے اور واپسی کا کوئی شرعی طریقہ ڈھونڈنے، پیر صاحب کے آستانے پر پہنچ گئے۔ یہاں حاضری کے کسی مسئلے کا حل دریافت کرنے کے اپنے ''ادب، آداب‘‘ تھے، اپنے ''لوازمات‘‘ تھے، پریشان حال شخص کو جن کا خیال نہ رہا تھا۔ سائل جس طرح ''روکھا، سوکھا‘‘ آیا تھا، جواب میں پیر صاحب کا رویّہ بھی ایسا ہی تھا۔ فرمایا: تین طلاقیں تو ہو گئیں، اب علیحدگی کے سوا کوئی چارہ نہیں۔ عقدِ ثانی کے لیے ''حلالہ‘‘ والا مسئلہ سنا دیا۔ سائل مایوسی و نامرادی کے عالم میں حجرے سے باہر آیا‘ تو پیر صاحب کے کارندۂ خاص نے کہا: عجیب آدمی ہو، منہ اُٹھا کے چلے آئے۔ کل پورے ''اہتمام‘‘ سے دوبارہ آؤ، پیر صاحب کو اطمینان سے مسئلہ بتاؤ تاکہ وہ مکمل غور و خوض کے ساتھ اس کا کوئی حل بتا سکیں۔ وہ پورے ''اہتمام‘‘ (نذر نیاز) کے ساتھ اگلے روز دوبارہ حاضر ہوا۔ پیر صاحب نے کہا، تم نے شرط کیا لگائی تھی؟... ہانڈی کو چاٹتے دیکھا تو طلاق!... تو اس شام تم نے کیا دیکھا، کیا وہ اپنا منہ ہانڈی کے اندر ڈال کر زبان سے اُسے چاٹ رہی تھی؟... نہیں جناب! وہ ہانڈی کے اندر انگلی پھیرتی اور اسے چاٹ لیتی!... گویا وہ ہانڈی نہیں، انگلی چاٹ رہی تھی، یوں طلاق تو نہ ہوئی۔ سائل کے من کی مراد بر آئی تھی۔ وہ خوشی خوشی اُلٹے پاؤں حجرے سے باہر نکل آیا۔

ظاہر ہے، دلیل اور منطق الگ چیز ہوتی ہے، حیلہ اور حجت ایک اور شے، ہمیں یہ حکایت مشرف کی بیرون ملک روانگی پر بعض وزرا کے نئے مؤقف پر یاد آئی۔ غداری اور قتل جیسے سنگین مقدمات میں ملوث ڈکٹیٹر بیرونِ ملک چلا گیا، اچھا ہوا، سول ملٹری ریلیشن شپ میں ایک مبینہ irritant ختم ہو گیا۔ دہشت گردی کے خلاف ضربِ عضب اور معیشت کی بحالی سمیت کتنے ہی سنگین مسائل ہیں، جن کے حل کے لیے سیاسی استحکام شرطِ اوّل کی حیثیت رکھتا ہے اور اس کے لیے سیاسی و عسکری قیادت کا ایک ہی صفحے پر ہونالازم! اب حکومت اور اسٹیبلشمنٹ ایک ہی صفحے پر آ گئے ہیں تو اس کا خیر مقدم کیا جانا چاہیے (اللہ تعالیٰ ہمارے ستم ظریف دوست کو ہدایت دے جو یہاں بھی شرارت سے باز نہیں آیا۔''اسٹیبلشمنٹ نے حکومت کے صفحے پر کیا آنا تھا، خود حکومت پوری طرح اسٹیبلشمنٹ کے صفحے پر چلی گئی ہے‘‘)۔

مشرف کے خلاف آرٹیکل 6 کے تحت سنگین غداری کا یہ مقدمہ 3نومبر 2007ء کے پی سی او پر قائم ہوا تھا۔ وردی کے ساتھ مشرف کے صدارتی انتخاب کی آئینی حیثیت کے کیس کا فیصلہ آنے کو تھا۔ اِدھر ڈکٹیٹر اور اس کے کیمپ میں اضطراب بڑھتا جا رہا تھا۔ یہ گمان غالب تھا کہ ملک کی سب سے بڑی عدالت مشرف کے صدارتی انتخاب کو غیر آئینی قرار دے گی؛ چنانچہ افتخار محمد چودھری والی ''سرکش‘‘ سپریم کورٹ (اور ہائی کورٹس کے بھی) ''ناپسندیدہ‘‘ ججوں سے نجات کا فیصلہ کیا گیا۔ یاد آیا، یہ جمعہ دو نومبر 2007ء کی شام تھی۔ جدہ میں اپنے اخباری دفتر سے ہفتہ وار چھٹی کے باعث، ہم نمازِ عصر کے بعد شریف پیلس (قصرالشریف) چلے آئے تھے۔ (یہاں کچھ ذکر شریف پیلس کا بھی ہو جائے) 10ستمبر 2007ء کو میاں صاحب کو اسلام آباد سے بالجبر جدہ بھجوا دیا گیا (دوسری بار جلاوطنی) تو سعودی حکام نے بڑے ادب و احترام سے استفسار کیا کہ کیا وہ سرور پیلس میں قیام کرنا پسند کریں گے جہاں وہ دسمبر2000ء سے جنوری 2006ء(لندن روانگی) تک قیام پذیر رہے تھے؟ میاںصاحب کی لندن روانگی کے بعد حسین نواز اپنی فیملی کے ساتھ جدہ ہی میں قیام پذیر تھے۔شاہ کی طرف سے پیشکش تھی کہ حسین، سرور پیلس ہی میں مقیم رہیں لیکن میاں صاحب (اور خود حسین نے بھی) اِسے مناسب نہ سمجھا اور ''الحمرا‘‘ میں ایک جدید ''پیلس‘‘ خرید کر اس میں منتقل ہو گئے جسے اب شریف پیلس (قصرالشریف) کا نام دیدیا گیا تھا۔ 10ستمبر کی دوسری جلا وطنی پر میاں صاحب نے سرور پیلس کی بجائے شریف پیلس میں قیام کا فیصلہ کیا۔

2نومبر کو اُس شام ہم شریف پیلس میں تھے جب پاکستان سے میاں صاحب کو کال آئی۔ باخبر کالر کا کہنا تھا کہ مشرف نے اپنی صدارت کے خلاف متوقع فیصلے سے بچنے کے لیے اعلیٰ عدلیہ کے آزاد منش ججوں سے نجات کے لیے ایمرجنسی کے نفاذ کا فیصلہ کر لیا ہے (اس بار منہ زور میڈیا بھی ہدف ہو گا) ادھر میاں صاحب کے لیے یہ بات ناقابلِ فہم تھی کہ آئین جس ایمرجنسی کی اجازت دیتا ہے، اس کے تحت ججوں سے نجات کیسے حاصل کی جا سکتی ہے؟ اگلے روز پرویز مشرف نے جس اقدام (پی سی او) کا اعلان کیا، وہ کسی آئینی اختیار کے تحت بطور صدرِ مملکت نہیں بلکہ آرمی چیف کے طور پر تھا۔ 12اکتوبر 1999ء کے فوجی اقدام کی طرح اس غیر آئینی اقدام کو بھی مارشل لا کا نام نہیں دیا گیا تھا بلکہ اسے ''ایمرجنسی پلس‘‘ کہا گیا جس کا ہدف حکومت، پارلیمنٹ اور سیاسی جماعتیں نہیں بلکہ اعلیٰ عدلیہ اور میڈیا تھا۔ سات سال قبل 12اکتوبر کا اقدام بھی مشرف (اور کارگل کے مس ایڈونچر میں شریک) اس کے دو، تین فوجی رفقا نے اپنی نوکریاں بچانے کے لیے کیا اور اب 3 نومبر کا آئین شکن اقدام بھی ڈکٹیٹر نے مزید 5 سال کے لیے اپنی غیر آئینی صدارت کے لیے کیا تھا۔

مارچ2009ء میں چیف جسٹس افتخار چودھری والی عدلیہ کی بحالی کے بعد، یہاں 3نومبر 2007ء کے پی سی او کا کیس دائر کر دیا گیا۔ جولائی میں عدالتِ عظمیٰ نے اِسے غیر آئینی قرار دے دیا۔ ڈکٹیٹر اس دوران ایوانِ صدر سے (گارڈ آف آنر کے ساتھ) رخصتی کے بعد، ملک بھی چھوڑ چکا تھا۔ 11مئی 2013ء کے عام انتخابات کے بعد یہ میاں صاحب کی تیسری وزارتِ عظمیٰ تھی۔ سپریم کورٹ میں 3 نومبر کے پی سی او کے حوالے سے سنگین غداری کا کیس زیر سماعت تھا اور 24 جون کو اٹارنی جنرل نے سپریم کورٹ کو حکومت کا مؤقف بتانا تھا کہ وہ یہ کیس چلانا چاہتی ہے یا نہیں۔صبح کابینہ کے اجلاس میں یہ معاملہ زیر غور آیا جس کے بعد وزیر اعظم نے اس حساس ترین مسئلے پر ملک کے سب سے بڑے منتخب ایوان کو اعتماد میں لینے کا فیصلہ کیا۔ پارلیمنٹ سے اپنے خطاب میں وزیر اعظم کہہ رہے تھے: ''نومنتخب حکومت کو جو مسائل ورثے میں ملے ان میں توانائی کا بحران، امن و امان کے سنگین مسائل، بے کاری و بے روزگاری، معیشت کی زبوں حالی، دہشت گردی اور قومی اقتدار اعلیٰ کو درپیش چیلنج شامل ہیں۔ عوام اِن مسائل کا حل چاہتے ہیں۔ 11مئی کے مینڈیٹ کا مقصد بھی یہی تھا‘‘۔ اب وہ آج کے اصل نکتے کی طرف آئے، '' جناب سپیکر! یہاں ایک اور مسئلہ بھی درپیش ہے جس سے صرفِ نظر نہیں کیا جا سکتا۔ ہمارے بیشتر مسائل آئین سے انحراف اور آئینی تقاضوں کو نظر انداز کرنے کا نتیجہ ہیں۔ عدلیہ کی آزادی اور قانون کی عملداری کا بھی تقاضا ہے کہ اس کی حکم عدولی نہ کی جائے اور عدالتی فیصلوں پر سر تسلیم خم کر دیا جائے۔ آج پاکستان کے آخری ڈکٹیٹر پرویز مشرف کے ساتھ آئین اور قانون کے تقاضوں کے مطابق معاملہ کرنے کا مسئلہ درپیش ہے جس نے ایک بار نہیں، دو بار آئین کو توڑا اور دونوں بار کوئی نام نہاد قومی مصلحت نہیں، بلکہ ذاتی مفاد اس کا محرک بنا‘‘۔ وزیر اعظم کا کہنا تھا، حکومت نے مشرف کے تین نومبر کے آئین شکن اقدام کے خلاف کیس کی پیروی کا فیصلہ کیا ہے (ایوان میں ڈیسک بجائے جا رہے تھے)۔ ہم اس روز پریس گیلری میں موجود تھے۔ یاد پڑتا ہے، ایک شیخ رشید کی آواز تھی جو مخالفت میں اُٹھی۔ اُن کا خیال تھا، اس سے سول ملٹری ریلیشن شپ کشیدگی سے دوچار ہو جائے گی، فوج اپنے سابق سربراہ کے ساتھ ''توہین آمیز سلوک‘‘ برداشت نہیں کرے گی۔

11مئی 2013ء کے انتخابات میں حصہ لینے کے لیے ڈکٹیٹر وطن لوٹ آیا۔ الیکشن کے حوالے سے جو بیتی، وہ الگ قصہ ہے اور عدالتی کارروائی ایک الگ کہانی‘ جس سے بچنے کے لیے اس نے کیا کیا جتن کئے۔ 2 جنوری 2014ء کو عدالت جاتے ہوئے ''دل کی تکلیف کے باعث‘‘ آرمڈ فورسز انسٹی ٹیوٹ آف کارڈیالوجی کا رُخ کیا‘ اور وہاں 31 مارچ تک ''زیرعلاج ‘‘ رہا۔ اس ''یقین دہانی‘‘ پر کہ فردِ جرم کیلئے وہ ایک بار عدالت آ جائے جس کے بعد وہ بیرونِ ملک جانے کیلئے آزاد ہو گا، وہ ایک پیشی پر حاضر ہو گیا، لیکن ابھی ''قید و بند‘‘ کی کچھ آزمائش باقی تھی۔ اسی دوران خان صاحب اور جناب علامہ کی دھرنا بغاوت کو بھی اس کا شاخسانہ قرار دیا گیا۔ ادھر مختلف مقدمات میںقابل ضمانت اور ناقابلِ ضمانت وارنٹ گرفتاری بھی جاری ہوتے رہے۔ اور اب ''سنگین خرابیٔ صحت‘‘ کے بہانے وہ ایک بار پھر بیرونِ ملک چلا گیا ہے‘ جس پر حکومت (اور بعض وزرا) میڈیا کی عدالت کے کٹہرے میں کھڑے ہیں تو یہ خلافِ توقع نہیں، لیکن اس پر پیپلز پارٹی کا احتجاج چہ معنی دارد؟ گزشتہ شب ایک ٹی وی ٹاک شو میں جناب لطیف کھوسہ کا کیس خاصہ مضبوط تھا لیکن جواب میں پرویز رشید نے جو آئینہ دکھایا، اس میں خود پیپلز پارٹی کا چہرہ بھی خاصا داغدار تھا۔

پس حرف: نظریۂ ضرورت پھر زندہ ہو گیا‘‘سوشل میڈیا پر شور بپا ہے، ''ایسے میں افتخار چودھری کہاں ہیں‘‘؟

روزنامہ دنیا ایپ انسٹال کریں