پٹرول، ڈیزل اور مٹی کے تیل کی قیمتوں میں اضافہ متوقع
کراچی(بزنس رپورٹر)عالمی منڈی میں خام تیل کی قیمتوں میں مسلسل اضافے اور روپے کی قدر میں اتار چڑھاؤ کے باعث حکومت نے پیٹرولیم مصنوعات کی قیمتوں میں ممکنہ اضافے پر غور شروع کر دیا ہے۔
آئل اینڈ گیس ریگولیٹری اتھارٹی (اوگرا) نے قیمتوں میں رد و بدل سے متعلق تجاویز حکومت کو ارسال کر دی ہیں،جن پر حتمی منظوری کے بعد 16 جون 2025 سے نئی قیمتوں کا اطلاق متوقع ہے ۔ذرائع کے مطابق ہائی اسپیڈ ڈیزل کی قیمت میں 5 روپے 27 پیسے فی لٹر اضافے کی تجویز دی گئی ہے ،جس کے بعد نئی قیمت 254.64 روپے سے بڑھ کر 259.91 روپے ہو جائے گی۔ پیٹرول، جو کہ عوام میں سب سے زیادہ استعمال ہونے والی مصنوعات میں شامل ہے ، اس کی قیمت 1 روپے 12 پیسے فی لیٹر بڑھنے کا امکان ہے ، جس سے نئی قیمت 254.75 روپے فی لیٹر ہو سکتی ہے ۔اسی طرح مٹی کے تیل کی قیمت میں 4 روپے 16 پیسے اور لائٹ ڈیزل آئل میں 4 روپے 13 پیسے فی لیٹر اضافے کی سفارش کی گئی ہے ۔ نئی قیمتیں 16 جون سے نافذ العمل ہوں گی اور 15 روز کے لیے مؤثر رہیں گی، جس کے بعد ایک بار پھر عالمی نرخوں کے مطابق قیمتوں پر نظرثانی کی جائے گی۔اقتصادی ماہرین کا کہنا ہے کہ برینٹ خام تیل کی قیمت 83 ڈالر فی بیرل سے تجاوز کر چکی ہے ، جس کے مقامی منڈی پر اثرات پڑ رہے ہیں۔ علاوہ ازیں، حکومت کی جانب سے آئی ایم ایف معاہدے کے تحت پیٹرولیم لیوی میں بھی اضافہ کیا گیا ہے ، جس سے قیمتوں پر مزید دباؤ بڑھا ہے ۔
