چناب نگر :کمبلوں سمیت گرم ملبوسات کی مہنگے داموں فروخت
چناب نگر(نامہ نگار )چناب نگر میں موسم سرما کی آمد کے ساتھ ہی کمبلوں، رضائیوں اور گرم ملبوسات کی مانگ میں اضافہ، دکانداروں نے قیمتیں بھی بڑھا دیں، مہنگائی کے ستائے عوام مزید پریشانی کا شکار ہو گئے ۔
تفصیلات کے مطابق موسم سرما کی آمد کے ساتھ ہی چناب نگر و گردو نواح میں گرم ملبوسات ، رضائیوں، کمبلوں اور گرم لحافوں کی مانگ بڑھ گئی ،شہریوں نے بازاروں میں ریڈی میڈ گارمنٹس کی دکانوں اور لنڈا بازار کا رخ کر لیا۔ غریب، متوسط اورسفید پوش طبقہ سمیت بڑی گاڑیوں والے بھی لنڈا بازار جا رہے ہیں، خریداروں میں خواتین کی کثیر تعداد شامل ہے ، جہاں سے سویٹر، کوٹ، جرسیاں، جرابیں اور دیگر گرم ملبوسات خریدے جا رہے ہیں۔ لنڈا بازار میں منہ مانگی قیمتیں وصول کی جا رہی ہیں،دوسری طرف نئے کمبل، رضائیاں بھی شہریوں کی پہنچ سے دو ر ہو چکیں۔عوام و سماجی حلقوں نے وزیراعظم شہباز شریف اور دیگر اعلیٰ حکام سے نوٹس لینے کا مطالبہ کیا ہے ۔
