زرعی یونیورسٹی میں محکمہ زراعت کے افسر وں کیلئے تربیتی ورکشاپ
فیصل آباد(سٹاف رپورٹر)محکمہ زراعت پنجاب کے افسروں کیلئے زرعی یونیورسٹی فیصل آباد کے پروفیشنل ٹریننگ اینڈ سکل ڈویلپمنٹ سنٹرکے زیر اہتمام فنانس، ایڈمنسٹریشن، مینجمنٹ اور ای گورننس پر چار ہفتوں کی ورکشاپ کا افتتاحی سیشن شروع ہو گیا۔
یہ تربیت محکمہ زراعت پنجاب کے افسران کی ترقی کیلئے لازمی قرار دی گئی ہے ، اس پروگرام کے 30ویں بیج میں محکمہ زراعت کی ریسرچ ونگ کے 65 افسران شرکت کر رہے ہیں۔ زرعی یونیورسٹی کے وائس چانسلر پروفیسر ڈاکٹر ذوالفقار علی کی ہدایت پر ورکشاپ میں شرکت کرنے والے محکمہ زراعت کے افسران کیلئے فول پروف انتظامات کئے گئے ہیں۔ اس موقع پر مقررین نے خطاب میں کہا کہ ماہرین زراعت کو موسمیاتی تبدیلیوں اور پانی کی قلت جیسے مسائل سے نمٹنے کیلئے جدید زرعی طریقہ کار کو فروغ دینا ہو گا تاکہ غذائی استحکام کو یقینی بنایا جا سکے ۔ ڈائریکٹر پروفیشنل ٹریننگ اینڈ سکل ڈویلپمنٹ سنٹرڈاکٹر وقاص وکیل نے کہا کہ زرعی شعبہ ہماری معیشت کی ریڑھ کی ہڈی ہے ،جدید دور کے زرعی چیلنجز سے نمٹنے کیلئے جدید زرعی طریقہ کار کو اپنانا وقت کی اہم ضرورت ہے تاکہ بڑھتی ہوئی آبادی کی ضروریات پوری کی جا سکیں۔ انہوں نے کہا کہ ایسے تربیتی پروگرام نہ صرف محکمے کے افسران کو ضروری مہارتیں فراہم کرتے ہیں بلکہ قومی غذائی تحفظ کو یقینی بنانے کیلئے ان کی صلاحیتوں کو بھی نکھارتے ہیں۔ انہوں نے بتایا کہ PTSDC اس وقت 250 سے زائد قلیل مدتی کورسز پیش کر رہا ہے جن کا خاص زور زراعت، لائیوسٹاک اور دیہی ترقی پر ہے ۔ ڈاکٹر نذر حسین نے بتایا کہ PTSDC اب تک 11,000 سے زائد افراد کو تربیت فراہم کر چکا ، تقریب میں محکمہ زراعت کے دیگر افسران نے بھی خطاب کیا۔
