گرڈ سٹیشن عالم چوک پر آتشزدگی سے گیپکو کو2ارب نقصان کا خدشہ:کئی علاقوں میں 2روز سے بجلی بند
گوجرانوالہ(سٹی رپورٹر)گیپکو کے 132 کے وی اے گرڈ سٹیشن عالم چوک پر لگنی والی آگ سے گیپکو کو 2ارب روپے کا نقصان پہنچنے کا خدشہ، حادثے کے ذمہ داروں کا تاحال تعین نہ کیاجاسکا۔۔۔
گزشتہ روز آگ سے گیپکو کے ہیوی کیپسٹی کے 3 ٹرانسفارمرز بری طرح جھلس گئے ،ہیوی ٹرانسفارمر کی فی کس قیمت 40 کروڑ روپے سے زائد ہے ، اسکے علاوہ 30پینل اور انسولیٹرز،کنڈکٹرزسمیت دیگر ٹیکنیکل سامان بھی خراب ہوگیا، گیپکو ذرائع کے مطابق ابتدائی رپورٹ میں گیپکو کو دو ارب روپے کا نقصان پہنچا ہے ،دو روز گزرنے کے باوجود گیپکو کے آپریشنل افسر اور سٹاف 13 فیڈرز میں بجلی بحال کرنے میں ناکام ہیں درجنوں علاقوں کے مکین دوروز سے بجلی سے محروم ہیں جن میں سب سے زیادہ گرجاکھی سب ڈویژن کے علاقے رحمت ٹائون،کوٹلی رستم ،محلہ باغوالہ ،راجکوٹ دھلے سے ملحقہ علاقے شامل ہیں ،گیپکو افسروں کا کہنا ہے کہ حادثے کی تحقیقات شروع کردی ہے بجلی کی بحالی اولین ترجیح ہے جسکے بعد فائنل انکوائری کرکے غفلت کے مرتکب افسروں کیخلاف کارروائی کی جائیگی۔
