بھینسیں شہر سے باہر منتقل کرنے کیلئے ڈیڈ لائن ختم،باڑوں کیخلاف کارروائی،جانور ضبط ہونگے
گوجرانوالہ(سٹاف رپورٹر)کمشنر گوجرانوالہ ڈویژن نوید حیدر شیرازی، ڈپٹی کمشنر نوید احمد کی ہدایت پر رہائشی علاقوں میں بھینسیں رکھنے والے افراد کو دی گئی ڈیڈ لائن ختم، کارپوریشن کی ٹیموں کی طرف سے شہری آبادیوں میں قائم بھینسوں کے باڑوں کیخلاف کارروائیوں کا آغاز کردیا گیا۔
ڈپٹی کمشنر نوید احمد نے کہا کہ بھینسوں کے باڑے شہر سے باہر منتقل کرانے پر کارپوریشن کے افسر وعملہ زیرو ٹالرنس پالیسی اپنائیں،جانور شہری حدود سے باہر منتقل نہ کرنے پر ضبط کر لئے جائیں گے ، عدم تعاون پر جرمانے عائد، گرفتاریاں بھی عمل میں لائی جائیں گی۔ بتایا گیا ہے کہ گوجرانوالہ شہر میں ہزاروں کی تعداد میں بھینسیں ہیں جن کا گوبر اور بچ جانے والا گرین ویسٹ (کچرا) سڑکوں، گلیوں، چوکوں، چوراہوں اور ویسٹ مینجمنٹ کے کوڑا کولیکشن پوائنٹس پر کچرے دانوں کے اندر اور اطراف پھینک دیا جاتا ہے اور بعض اندرون شہر کے علاقوں میں پانی کے ساتھ سیوریج نالیوں، گندے نالوں میں پھینکا جارہا ہے جس سے صفائی ستھرائی اور نکاسی آب کا نظام درہم برہم ہو کر رہ گیا ہے ۔
