وزیراعظم کی متحدہ عرب امارات کے قومی دن پر اماراتی قیادت اور عوام کو مبارکباد
اسلام آباد: (دنیا نیوز) وزیراعظم شہباز شریف نے متحدہ عرب امارات کے قومی دن ’’عید الاتحاد‘‘ پر اماراتی قیادت اور عوام کو دلی مبارکباد دی ہے۔
وفاقی دار الحکومت میں متحدہ عرب امارات کے قومی دن کے موقع پر تقریب میں وزیراعظم شہباز شریف نے بطور مہمان خصوصی شرکت کی، اس موقع پر نائب وزیراعظم و وزیر خارجہ سینیٹر اسحاق ڈار، وفاقی وزراء ، ارکان پارلیمان اور غیرملکی سفارتکاروں کی بڑی تعداد بھی موجود تھی۔
تقریب سے خطاب کرتے ہوئے شہباز شریف نے پاکستان اور متحدہ عرب امارات کی شراکت داری کو مزید مستحکم بنانے کی ضرورت پر زور دیتے ہوئے کہا ہے کہ قابل تجدید توانائی، مصنوعی ذہانت، زراعت اور دوسرے شعبوں میں یو اے ای کی سرمایہ کاری کا خیرمقدم کریں گے۔
وزیراعظم نے متحدہ عرب امارات کے یوم اتحاد پر اماراتی قیادت اور عوام کو دلی مبارکباد دیتے ہوئے کہا کہ یو اے ای کے قومی دن کی تقریب میں شرکت ان کیلئے باعث اعزاز ہے۔
شہباز شریف نے یو اے ای کی موجودہ قیادت کو خراج تحسین پیش کرتے ہوئے کہا کہ ان کی قیادت میں یو اے ای نے ترقی کی نئی منازل طے کیں اور ملک کو ترقی اور خوشحالی کی راہ پر گامزن کیا ہے۔
وزیر اعظم نے شیخ زید بن سلطان النہیان کو امارات کی ترقی کا بانی اور پاکستان اور یو اے ای کے تعلقات کا معمار قرار دیتے ہوئے کہا کہ پاکستان کو یو اے ای کے ساتھ سٹرٹیجک شراکت داری پر فخر ہے، متحدہ عرب امارات نے پاکستان کے معاشی استحکام میں اہم کردار ادا کیا۔
انہوں نے کہا کہ قابل تجدید توانائی، مصنوعی ذہانت زراعت اور دوسرے شعبوں میں یو اے ای کی سرمایہ کاری کا خیرمقدم کریں گے، 1.8 ملین پاکستانی متحدہ عرب امارات کی ترقی میں کردار ادا کر رہے ہیں۔
شہباز شریف نے اس توقع کا اظہار کیا کہ آنے والے وقت میں دونوں ممالک کی تزویراتی شراکت داری مزید مستحکم ہوگی، انہوں نے یو اے ای کی ترقی و خوشحالی کیلئے نیک خواہشات کا اظہار بھی کیا۔
قبل ازیں متحدہ عرب امارات (یو اے ای) کے سفیر سالم محمد الزاعابی نے تقریب میں وزیر اعظم کا خیرمقدم کرتے ہوئے کہا کہ دونوں ممالک کے 5 دہائیوں سے دیرینہ اور گہرے و تاریخی برادرانہ تعلقات ہیں، وقت کے ساتھ دونوں ممالک کے تعلقات مزید مضبوط ہوئے ہیں۔
انہوں نے پاکستان میں مختلف شعبوں میں سرمایہ کاری کو پرکشش قرار دیتے ہوئے کہا کہ یو اے ای پاکستان میں قابل تجدید توانائی ، مصنوعی ذہانت، آئی ٹی سمیت مختلف شعبوں میں سرمایہ کاری کا خواہاں ہے۔
سالم محمد الزاعابی نے پاکستان اور یو اے ای کے مابین ہم آہنگی ، ترقی و خوشحالی کیلئے نیک خواہشات کا اظہار کیا، بعد ازاں وزیر اعظم نے متحدہ عرب امارات کے قومی دن کی مناسبت سے کیک بھی کاٹا۔
