پنجاب میں بلدیاتی الیکشن آنیوالے ہیں، کارکن تیاری کریں: بلاول بھٹو زرداری
لاہور: (دنیا نیوز) چیئرمین پاکستان پیپلزپارٹی بلاول بھٹو زرداری نے کہا ہے کہ پنجاب میں بلدیاتی الیکشن آنیوالے ہیں، کارکن تیاری کریں۔
چیئرمین پیپلزپارٹی بلاول بھٹو زرداری پیپلز پارٹی کے رہنماؤں کے اعزاز میں گورنر ہاؤس میں عشائیہ دیا، عشائیہ میں پیپلزپارٹی کے اراکین قومی و صوبائی اسمبلی، ٹکٹ ہولڈرز، پارٹی عہدیداران نے بھی شرکت کی۔
عشائیہ میں پیپلزپارٹی کے اراکین قومی اسمبلی راجہ پرویز اشرف، مرتضیٰ محمود، طاہر رشید، ثمینہ گھرکی نے شرکت کی، علی حیدر گیلانی، نیئر بخاری، ہمایوں خان، عبدالقادر شاہین، رانا فاروق سعید، دوست محمد کھوسہ، فیصل میر، شہزاد سعید چیمہ، ندیم افضل چن، عزیز الرحمان چن اور دیگر بھی عشائیہ میں شریک ہوئے۔
.jpg)
چیئرمین پاکستان پیپلز پارٹی بلاول بھٹو نے عشائیہ سے خطاب کرتے ہوئے کہا کہ ضمنی الیکشن میں ایک نشست ہم نے جیتی ایک ہم سے چھین لی گئی، پنجاب میں بلدیاتی الیکشن آنے والے ہیں، پیپلزپارٹی کے رہنما اور کارکن بلدیاتی الیکشن کی تیاری کریں۔
بلاول بھٹو نے کہا کہ آئندہ بلدیاتی الیکشن میں ہمیں فرنٹ فٹ پر آکر کھلنا ہو گا، باقی صوبوں میں بلدیاتی الیکشن ہو گئے پنجاب میں کیوں نہیں ہو رہے؟، پی ٹی آئی کا کوئی مستقبل نہیں، بحیثیت جماعت سب کو سیاست کرنے کا حق ہے۔
چیئرمین پیپلز پارٹی کا کہنا تھا کہ ملک دشمن اور اداروں کے خلاف بولنے والوں کو سیاست کرنے کا کوئی حق نہیں، میں اب لاہور مختصر دورے پر آیا ہوں اس کے بعد لاہور کا طویل دورہ کروں گا۔
بلاول بھٹو گورنر ہاؤس سے بلاول ہاؤس چلے گئے، چیئرمین پاکستان پیپلز پارٹی کل ایف پی سی سی آئی کی تقریب میں شرکت کریں گے، بلاول بھٹو کل سینئر صحافیوں سے بھی ملاقات کریں گے۔
