کھیلوں کی جدید سہولیات کی فراہمی یقینی بنائی جائیگی، احمد حسن رانجھا
راولپنڈی (نیوز رپورٹر) خدمت خلق مقدس جذبے کے ساتھ عظیم عبادت بھی ہے، نوجوان نسل کو کھیلوں کی جد ید سہولیات کی فراہمی اور ان کی تربیت کیلئے تمام ممکنہ اقدامات یقینی بنائے جائیں گے۔
یوتھ ایجوکیشن اینڈ سپورٹس (YES)ویلفیئر سوسائٹی (رجسٹرڈ) راولپنڈی 7برس سے پاکستان میں کھیلوں کے فروغ، خصوصاً بچیوں کو محفوظ اور باعزت طریقے سے کھیلوں کی سہولیات فراہم کرنے کیلئے سرگرم ہے۔ ان خیالات کا اظہار ڈائریکٹر جنرل پی ایچ اے و چیئرمین یس (YES)احمد حسن رانجھا نے یوتھ ایجوکیشن اینڈ سپورٹس (YES)ویلفیئر سوسائٹی کی ساتویں سالگرہ کا کیک کاٹنے کی تقریب سے خطاب کرتے ہوئے کیا۔ اس موقع پر فلاحی تنظیم کے صدر محمد زاہد، نائب صدر سابق ٹیسٹ کرکٹر نوید قریشی و دیگر مہمان بھی موجود تھے۔ احمد حسن رانجھا نے بتایا کہ سوسائٹی نے وطن عزیز کا 78واں جشن آزادی، معرکہ حق کا جشن شایان شان طریقے سے منانے کیلئے پی ایچ اے راولپنڈی اور ڈسٹرکٹ سپورٹس ڈیپارٹمنٹ راولپنڈی کیساتھ مل کر متعدد پروگرام ترتیب دئیے ہیں جن میں 14اگست کو شجرکاری، 22سے 24اگست تک ویمن ٹی ٹین کرکٹ لیگ، 6ستمبر کو آسٹریلین فٹ بال اور بیس بال کے خواتین میچز نمایاں ہیں۔
