بجلی کاایک اوربریک ڈاؤن،پانی کی لائن پھٹ گئی
کراچی(این این آئی)دھابیجی پمپنگ اسٹیشن پر بجلی کے ایک اوربریک ڈاؤن سے پائپ لائن پھٹ گئی، جس کی وجہ سے مختلف علاقوں میں پانی کی قلت کا خدشہ پیدا ہو گیا۔ پائپ لائن پھٹنے سے پمپنگ اسٹیشن کے 19 پمپ بند ہو گئے ہیں۔
واٹر کارپوریشن کے ترجمان کے مطابق دھابیجی پمپنگ اسٹیشن پرمنگل کی صبح 6 بجے سے بجلی کی فراہمی بند ہے ، پمپنگ اسٹیشن کی بجلی تاحال بحال نہیں ہو سکی ہے ۔ترجمان نے بتایا کہ بریک ڈاؤن کے باعث دھابیجی پمپنگ اسٹیشن کے تمام فیڈرز کی بجلی بند ہے ، اس کے باعث بیک پریشر کی وجہ سے لائن نمبر 5 ایک بار پھر متاثر ہو گئی۔حکام کے مطابق دھابیجی پمپنگ اسٹیشن کے قریب پانی کی پائپ لائن کی مرمت کا کام شروع کر دیا گیا، بجلی کے بریک ڈاؤن کے باعث 50 ایم جی ڈی کی لائن پھٹ گئی تھی۔حکام نے کہا کہ رات تک لائن کی مرمت کا کام مکمل کر کے سپلائی شروع کر دی جائے گی۔واضح رہے کہ 2 روز قبل بھی بجلی کے بریک ڈاؤن سے پمپنگ اسٹیشن کی 2 پائپ لائنیں پھٹ گئی تھیں۔ دوسری جانب کے الیکٹرک کے ترجمان نے بتایا کہ دھابیجی پمپنگ اسٹیشن پر ٹیکنیکل فالٹ آیا تھا جو درست کر دیا گیا ہے ،کے الیکٹرک کا عملہ واٹر بورڈ کے نمائندوں کے ساتھ رابطے میں ہے ۔
