عالمی اردو کانفرنس 5 تا 8 دسمبر آرٹس کونسل میں ہو گی،احمد شاہ
کراچی (آن لائن)صدر کراچی آرٹس کونسل احمد شاہ نے 4 روزہ عالمی اردو کانفرنس کا اعلان کرتے ہوئے کہا ہے کہ 17 ویں عالمی اردو کانفرنس آئندہ ماہ 5 دسمبر سے شروع ہو رہی ہے ۔
آرٹس کونسل آف پاکستان کراچی کے زیر اہتمام ’’سترہویں عالمی اردو کانفرنس 2024‘‘کے حوالے سے پریس کانفرنس کا انعقاد حسینہ معین ہال میں کیاگیا جس میں صدر آرٹس کونسل محمد احمد شاہ، معروف اسکالر، شاعر و مصنف ڈاکٹر پیرزادہ قاسم رضا صدیقی، نائب صدر آرٹس کونسل و سینئر اداکار منور سعید، سیکریٹری اعجاز فاروقی، خازن قدسیہ اکبر شرکت کی۔ احمد شاہ نے کہا کہ عالمی اردو کانفرنس میں گورنر سندھ کو بھی بلائیں گے ، ہمیشہ وزیرِ اعلیٰ کانفرنس کا افتتاح کرتے ہیں۔ کانفرنس میں دیگر زبانوں کو بھی لا رہے ہیں، کانفرنس میں تھیٹر، فلم اور ریڈیو بھی ہو گا۔ان کا کہنا ہے کہ ایک مسئلہ رہا ہے کہ ہم اگلی نسل کو مادری زبان کے قریب کیسے کریں، ابھی ورلڈ کلچر فیسٹیول میں کلاسیکل موسیقی، فوک اور قوالی بھی رکھی ہے ۔احمد شاہ نے کہا کہ عالمی اردو کانفرنس میں ماحولیات پر بھی فوکس ہو گا، کراچی کے کچرے اور دیگر ماحولیاتی مسائل پر بھی فوکس کریں گے ، شجر کاری پر بھی ہمارا فوکس ہوگا۔ صدر آرٹس کونسل کا کہنا ہے کہ ہندوستان کے ادیب اور شاعروں کو بھی دعوت دی ہے ، وہ بھی آنا چاہتے ہیں۔ احمد شاہ کا یہ بھی کہنا ہے کہ عالمی ثقافتی میلے کی اختتامی تقریب میں راستے بند کرنے پڑے ، ہم نہیں چاہتے کہ اب راستے بند ہوں۔
