کمشنرکا مختلف اضلاع میں دوبارہ تجاوزات کا نوٹس
دوبارہ تجاوزات قائم کرنے والوں کے خلاف سخت کارروائی ہوگی،حسن نقویحلف نامہ جمع کرانے والوں کو ایس اوپی پر عمل کا پابند کیا جائے گا، اجلاس میں فیصلہ
کراچی (اسٹاف رپورٹر )کمشنر کراچی سید حسن نقوی کی زیر صدارت ڈپٹی کمشنرز اور اسسٹنٹ کمشنرز کا اجلاس منعقد ہوا اجلاس میں روڈ سائڈ تجاوزات کے خلاف جاری مہم کا جائزہ لیا گیا ۔کمشنر نے مختلف اضلاع میں دوبارہ تجاوزات قائم ہونے کا نوٹس لیا۔فیصلہ کیا گیا کہ حلف نامہ جمع کرانے والوں کو ایس او پی پر عمل کرنے کا پابند کیا جائے گا، حلف نامہ جمع کرانے کے باوجود ایس او پی کی خلاف ورزی پر بھاری جرمانہ عائد کیا جائے گا اور گرفتاری بھی کی جاسکے گی۔ کمشنر نے تمام ڈپٹی کمشنرز سے کہا کہ ایس او پی پر سختی سے عمل کرایا جائے ۔ ڈپٹی کمشنرز نے بتایا کہ ایس او پی پر عمل کرنے کی تحریری یقین دہانی کے بعد دکانوں اور ہوٹلوں کو ڈی سیل کر دیا گیا ہے اور حلف نامہ جمع کرانے والے ان ہوٹلوں اور دکانوں کی مانیٹرنگ کی جاری ہے ۔ کمشنر نے کہا کہ شہر میں روڈ سائڈ تجاوزات کا رحجان بڑھ رہا ہے اسے ترجیحی اقدامات کے ذریعے روکنے کی ضرورت ہے ۔اسسٹنٹ کمشنر ہیڈ کوارٹر ز رابعہ سید نے اجلاس کو بتایا کہ ڈپٹی کمشنرز کی پیش کردہ رپورٹس کے مطابق مجموعی طور پر 632 دکانوں اور 250 ہوٹلوں کے خلاف کارروائی کی گئی ہے ۔ سب سے زیادہ سخت کارروائی سب ڈویژن صدرمیں کی گئی جس میں 257 دکانیں اور 47 ہوٹلز سیل کئے گئے تھے ۔
