350 واٹر فلٹریشن پلانٹ ناکارہ، آلودہ پانی پینے سے شہری بیمار
لاہور(اپنے سٹی رپورٹر سے)شہریوں کو صاف پانی میسر نہ آسکا، لاہور میں بڑے پیمانے پر واٹر فلٹریشن پلانٹس ناکارہ ہونے کا انکشاف ہوا ہے۔
تفصیل کے مطابق میٹروپولیٹن کارپوریشن لاہور کے زیر استعمال سینکڑوں واٹر فلٹریشن پلانٹ ناکارہ ہیں۔ دستاویزات کے مطابق لاہور میں مجموعی طور پر 1228 واٹر فلٹریشن پلانٹ موجود ہیں،مختلف علاقوں میں اربوں روپے لاگت سے لگائے جانیوالے 350 واٹر فلٹریشن پلانٹ ناکارہ ہو گئے جس کے باعث گندا پانی پینے سے شہریوں میں بیماریاں پھیلنے لگیں۔پنجاب حکومت نے ابتدائی طور پر 185 واٹر فلٹریشن پلانٹ کو فعال کرنے کا فیصلہ کر لیا، ان پر 60 کروڑ 10 لاکھ کے اخراجات کئے جائیں گے ۔پبلک ہیلتھ انجینئرنگ ڈیپارٹمنٹ واٹر سپلائی سکیمز کی مرمت و بحالی کے لئے موجود فنڈز میں سے رقم ادا کرے گا۔شہر میں صاف پانی کی فراہمی کے لئے محکموں کی فلٹریشن پلانٹس پر نظر نہ رکھنا لمحہ فکریہ ہے۔
