شیخوپورہ:تین ڈاکو گرفتار، 20 لاکھ نقدی، اسلحہ برآمد
شیخوپورہ(ڈسٹرکٹ رپورٹر)ڈسٹرکٹ پولیس آفیسر بلال ظفر شیخ کے سپیشل ٹاسک پر تھانہ سٹی اے ڈویژن پولیس نے کارروائی کرتے ہوئے 3 ڈاکوؤں کو گرفتار کرکے چند روز قبل شہری سے چھینے گئے 20 لاکھ روپے اور جدید اسلحہ برآمد کرلیا۔
تفصیلات کے مطابق چند روز قبل شہری محمد ریا ض نجی بینک سے 20 لاکھ نقدی نکلوا کر موٹر سائیکل پر جارہا تھا کہ 3 ڈاکو شہری سے گن پوائنٹ پر 20لاکھ نقدی چھین کر فرار ہو گئے ، وقوعہ کی اطلاع ملتے ہی ڈی پی او نے تھانہ اے ڈویژن پولیس کو ملزموں کو فوری ٹریس کر کے ان کی گرفتاری اور مال مسروقہ برآمد کر نے کا ٹاسک دیا ،جس پر پولیس نے فوری کارروائی کرتے ہوئے سیف سٹی کیمروں کی مدد سے نہ صرف ملزموں کی نقل و حرکت کا پتہ چلایابلکہ ان کی تصاویر بھی مل گئیں، سیف سٹی کیمروں اور پولیس کے مسلسل تعاقب سے تینوں ڈاکوؤں کو پکڑکر 20لاکھ نقدی اور جدید اسلحہ بھی قبضہ میں لے لیا گیا۔
