لائبر یر یوں کیلئے 27سال بعد 7کروڑ کی کتب کی خریداری
لاہور(خبرنگار)ڈائریکٹر جنرل پبلک لائبریریز پنجاب کاشف منظور نے کہ ان کی تعیناتی کے 18 ماہ کے دوران 7کروڑ 10 لاکھ روپے کی کتابیں پنجاب کی سرکاری لایبریریوں کو فراہم کی جا چکی ہیں، اور اتنی خطیر رقم سے کتب کی خریداری 27 سال بعد ہوئی ہے۔
اپنے ایک بیان میں کاشف منظور نے بتایا کہ انہوں نے ذاتی طور پر بھی ہزاروں روپے کی کتابیں خرید کر قائد اعظم پبلک لائبریری میں رکھی ہیں ۔ امریکہ کے تعاون سے قائد اعظم پبلک لائبریری میں لنکن کارنر سمارٹ لائبریری قائم کی گئی ہے جسے منی امریکن سنٹر بھی کہہ سکتے ہیں۔ اس کے قیام کے لئے امریکہ کی گورنمنٹ نے 5 کروڑ روپے فراہم کئے ۔ اس میں امریکن لٹریچر اورامریکن میگزین سٹڈی کی سہولت موجود ہے ۔ یہ پنجاب میں چھٹی اور لاہور میں دوسری لنکن سمارٹ لائبریری ہے ۔ اس سے پہلے ارفع کریم ٹاور لاہور میں پہلی لنکن سمارٹ لائبریری قائم کی گئی ۔ حکومت کی توجہ ای۔لائبریریز کو پروموٹ کرنے پر ہے اور قائد اعظم پبلک لائبریری کو بھی ای۔لائبریری پر شفٹ کیا جارہا ہے ۔ انہوں نے حکومت کو تجویز دی ہے کہ طلبا کو لیپ ٹاپ کی بجائے ٹیبلٹس دیے جائیں اور ان میں حکومت کی منظور شدہ دس بیس ہزار ایسی کتابیں پہلے سے موجود ہوں جو طلبا کی تعلیم میں معاون ثابت ہوں۔
