ہسپتالوں میں ڈیوٹی روسٹر نمایاں جگہوں پر آویزاں کرنیکی ہدایت
لاہور(اپنے سٹاف رپورٹر سے)سیکرٹری محکمہ سپیشلائزڈ ہیلتھ کیئر اینڈ میڈیکل ایجوکیشن عظمت محمود نے گورنمنٹ ٹیچنگ ہسپتال گوجرانوالہ کا اچانک دورہ کیا۔
سپیشل سیکرٹری آپریشنز طارق محمود رحمانی بھی ہمراہ تھے۔ پرنسپل گوجرانوالہ میڈیکل کالج بھی موقع پر پہنچ گئے۔ سیکرٹری صحت پنجاب نے مریضوں کی عیادت کی اور طبی سہولیات بارے فیڈ بیک لیا۔ دورہ کے دوران ہسپتال میں ادویات کی فراہمی، ڈاکٹرز کی حاضری، وزیراعلیٰ شکایت سیل و دیگر شعبہ جات میں طبی سہولیات کا جائزہ لیا گیا۔وزیراعلیٰ پنجاب مریم نواز شریف کے ویژن کے مطابق موقع پر پیشنٹ کیئر بارے ہدایات جاری کی گئی ہیں۔ ہسپتال میں ڈیوٹی روسٹرم نمایاں جگہوں پر آویزاں کرنے کی ہدایت کی گئی ہے۔ ادویات کی فراہمی کی الیکٹرانک فہرست نہ ہونے پر ایم ایس کو متعلقہ افسران سے باز پرس کی ہدایت کی گئی۔ سیکرٹری محکمہ سپیشلائزڈ ہیلتھ کیئر اینڈ میڈیکل ایجوکیشن عظمت محمودنے ایمرجنسی میں پبلک ایڈریس سسٹم فعال نہ ہونے پر برہمی کا اظہار کیا اور لواحقین کے لئے کرسیوں اور بینچوں کی فی الفور فراہمی کا حکم دیا-انہوں نے یہ بھی حکم دیا کہ جاری ہدایات پر عملدرآمد کی رپورٹ شام تک پیش کی جائے۔
