ترقیاتی سکیموں کیلئے 52 ارب 58 کروڑ روپے کی منظوری
لاہور(اے پی پی)پنجاب پلاننگ اینڈ ڈویلپمنٹ بورڈ نے 15ویں اجلاس میں مختلف ترقیاتی سیکٹرز کی 8ترقیاتی سکیموں کیلئے 52 ارب 58کروڑ 87لاکھ 60ہزار روپے کے فنڈز کی منظوری دیدی۔
اجلاس کی صدارت چیئرمین ڈاکٹر نعیم رؤف نے کی۔ جن سکیموں کی منظوری دی گئی ان میں وزیر اعلیٰ پنجاب آسان کاروبار فنانس مرکزکیلئے 9 ارب 26کروڑ 40لاکھ ، وزیر اعلیٰ آسان کاروبار فنانس ساؤتھ کیلئے 8ارب 58کروڑ 60لاکھ ، وزیر اعلی ٰ آسان کاروبار فنانس نارتھ کیلئے 6 ارب 68کروڑ 60 لاکھ ، وزیر اعلیٰ آسان ایکسپورٹ فنانس برائے سمال میڈیم انٹرپرائزز کیلئے 4ارب 26 کروڑ 60لاکھ ، ڈسکہ، مندرینوال، جامکے چیمہ میں سیوریج و سیلابی پانی کی نکاسی میں بہتری کیلئے 8 ارب 2کروڑ 36لاکھ ، لیہ شہر میں سیوریج وسیلابی پانی کی نکاسی میں بہتری کیلئے 8 ارب 78کروڑ 63 لاکھ 20 ہزار ، اٹک میں سیلابی پانی کی نکاس کی بہتری کیلئے 3ارب 17کروڑ 8 لاکھ 40 ہزار اور لاہور میٹرو بس سسٹم گرین لائن سٹیشنوں کی بحالی دوبارہ تشکیل اور سولرائزیشن کیلئے 3ارب 80کروڑ 60لاکھ روپے شامل ہیں۔
