مزاحمت پر باپ کو قتل ، بیٹے کو زخمی کرنے والا ملزم گرفتار
مظفرگڑھ، خان گڑھ (سٹی رپورٹر )موٹر سائیکل ڈکیتی میں مزاحمت پر ایک شخص کو قتل اور اسکے بیٹے کو زخمی کرنے والے 2 ملزمان کو پولیس نے ایک سال بعد گرفتار کرلیا۔۔۔
مظفرگڑھ کے تھانہ سٹی میں صوبائی پارلیمانی سیکرٹری و مسلم لیگ (ن) کے ایم پی اے اجمل خان چانڈیہ کیساتھ پریس کانفرنس کرتے ہوئے ڈی ایس پی سٹی طاہر اعجاز اور ایس ایچ او افتخار ملکانی کا کہنا تھا کہ یکم دسمبر 2023ء کو محلہ روشن آباد کے رہائشی مزدور محمد صدیق کھوکھر نے بیٹے فہد کی فرمائش پر موٹر سائیکل خریدی،نئی موٹرسائیکل خریدنے کے اگلے روز 2 دسمبر 2023ء کو دونوں باپ بیٹا بازار سے سودا سلف خرید کرکے واپس گھر جارہے تھے کہ اس دوران انکے گھر کے قریب ہی محلہ روشن آباد کی گلیوں میں دو ڈاکوؤں نے ان سے نئی موٹر سائیکل چھیننے کی کوشش کی، مزاحمت پر فائرنگ کرکے صدیق کھوکھر کو قتل اور اسکے بیٹے فہد کو شدید زخمی کردیا،،پریس کانفرنس کرتے ہوئے ڈی ایس پی سٹی طاہر اعجاز اور ایس ایچ او افتخار ملکانی کا کہنا تھا کہ واقعے کا مقدمہ تھانہ سٹی میں نامعلوم ملزمان کیخلاف درج کیا گیا تھا اور گزشتہ 10 ماہ سے پولیس سفاک ڈاکوؤں کی گرفتاری کی کوششیں جاری رکھے ہوئی تھی،واقعے کی تحقیقات کے دوران جدید ٹیکنالوجی کا سہارا لیتے ہوئے 2 ڈاکوؤں کو گرفتار کرلیا گیا،گرفتار ہونے والے ملزمان میں تصور اقبال کبیروالا ضلع خانیوال اور زین علی حامد پور ملتان کا رہائشی ہے ،مقتول شہری کی موٹر سائیکل بھی ملزمان سے برآمد کرلی گئی ہے ۔
