پٹرولیم مصنوعات کی قیمتوں میں بڑی کمی کا اعلان
اسلام آباد: (دنیا نیوز) حکومت نے ملک بھر میں پٹرولیم مصنوعات کی قیمتوں میں بڑی کمی کا اعلان کر دیا۔
حکومت کی جانب سے جاری نوٹیفکیشن کے مطابق پٹرول کی فی لٹر قیمت 8 روپے کمی کیساتھ 262 روپے ہوگئی جبکہ ہائی سپیڈ ڈیزل کی قیمت 5 روپے فی لٹر کمی کے ساتھ 253 روپے فی لٹر ہوگئی۔
وفاقی وزیر خزانہ اسحاق ڈار نے کہا کہ مٹی کے تیل کی قیمت برقرار رکھی گئی ہے لائٹ ڈیزل کی فی لٹر قیمت میں 5 روپے کمی کی گئی، موجودہ قیمتیں یکم سے 15 جون تک نافذ العمل رہیں گی۔
اسحاق ڈار نے کہا کہ پچھلے پندرہ دن میں عالمی مارکیٹ میں قیمتیں کم نہیں ہوئیں اور نہ ہی ڈالر کے مقابلے میں روپے کی قدر میں کوئی بہتری آئی ہے، اس کے باوجود ہم نے عوام کے لیے فیصلہ کیا کہ پٹرول کی قیمت میں کمی کے لیے کوئی گنجائش نکالی جا سکے۔
پٹرولیم مصنوعات کی نئی قیمتیں
پٹرول: 262 روپے فی لٹر
ہائی سپیڈ ڈیزل:253 روپے فی لٹر
مٹی کا تیل : 164 روپے 07 پیسے فی لٹر
لائٹ ڈیزل: 147 روپے 68 پیسے فی لٹر
