ایشیز سیریز: گابا ٹیسٹ کی پہلی اننگز میں انگلینڈ 334 رنز پر آؤٹ، سٹارک کے 6 شکار
برسبین: (دنیا نیوز) ایشیز سیریز کے دوسرے ٹیسٹ کی پہلی اننگز میں انگلش ٹیم 334 رنز پر آل آؤٹ ہوگئی۔
گابا میں جاری میچ کے دوسرے روز کھیل کا آغاز ہوا تو انگلش ٹیم اپنے گزشتہ روز کے ٹوٹل میں صرف 9 رنز کا ہی اضافہ کرسکی، جوفرا آرچر 38 رنز بناکر آؤٹ ہوئے، مارنوس لبوشین نے ہوا میں اڑتے ہوئے ان کا کیچ پکڑا، جو روٹ 138 رنز بناکر ناٹ آؤٹ رہے۔
آسٹریلیا کی جانب سے مچل سٹارک نے 6 جبکہ مائیکل نیسر، برینڈن ڈوگٹ اور سکاٹ بولینڈ نے ایک ایک وکٹ حاصل کی۔
یہ جنوری 2018 کے بعد پہلا موقع ہے جب انگلینڈ نے آسٹریلیا میں کسی ٹیسٹ اننگز میں 300 رنز بنائے ہیں۔
اس سے قبل گابا ٹیسٹ کے پہلے روز انگلینڈ نے ٹاس جیت کر بیٹنگ کا فیصلہ کیا تو ایک مرتبہ پھر پہلے ہی اوور میں نقصان اٹھانا پڑا جب 5 کے مجموعی سکور پر بین ڈکٹ گولڈن ڈک پر چلتے بنے۔
تیسرے ہی اوور میں اولی پوپ بھی بغیر کوئی رن بنائے پویلین لوٹ گئے، بعد ازاں زیک کرولی نے جو روٹ کے ساتھ 117 رنز کی شراکت قائم کی، کرولی 76 رنز بناکر مائیکل نیسر کا شکار بن گئے۔
176 کے مجموعی سکور پر ہیری بروک 31 رنز بنا کر مچل سٹارک کا شکار بن گئے، یہ سٹارک کی ٹیسٹ کرکٹ میں 415 ویں وکٹ تھی جس سے وہ وسیم اکرم کو پیچھے چھوڑتے ہوئے سب سے زیادہ ٹیسٹ وکٹیں حاصل کرنے والے لیفٹ آرم فاسٹ بولر بن گئے ہیں۔
انگلش کپتان بین سٹوکس 19، جیمی سمتھ صفر، ول جیکس 19، گّس ایٹکنسن 4 اور برائیڈن کارس بغیر کوئی رن بنائے آؤٹ ہو گئے، جو روٹ ایک اینڈ سے وکٹ سنبھالے رہے اور آخری وکٹ پر جوفرا آرچر کے ساتھ دن کے اختتام تک 61 رنز کی ناقابل شکست شراکت قائم کی تھی۔
یہ جو روٹ کی مجموعی طور پر 40 ویں جبکہ آسٹریلوی سرزمین پر ان کے کیریئر کی پہلی ٹیسٹ سنچری ہے، وہ ٹیسٹ کرکٹ میں 40 سنچریاں بنانے والے چوتھے کھلاڑی بھی بن گئے ہیں، انگلینڈ نے دن کے اختتام تک 9 وکٹ پر 325 رنز بنائے تھے۔
