میتھیو بریٹزکے نے ون ڈے کرکٹ میں نئی تاریخ رقم کردی
رانچی: (ویب ڈیسک) جنوبی افریقہ کے نوجوان بلے باز میتھیو بریٹزکے ہر گزرتے دن کے ساتھ ون ڈے کرکٹ میں نئی تاریخ رقم کر رہے ہیں۔
میتھیو بریٹزکے ون ڈے کرکٹ کی تاریخ کے وہ پہلے بلے باز تھے جنہوں نے اپنے ابتدائی پانچ ون ڈے میچز میں 50 سے زائد رنز سکور کیے تھے، ان کا ابتدائی پانچ میچز میں سکور 150، 83، 57، 88 اور 85 تھا۔
میتھیو بریٹزکے نے اپنے کیریئر کے ابتدائی پانچ میچز میں ایک سنچری اور چار نصف سنچریوں کی مدد سے 463 رنز بنائے تھے، ان سے پہلے ون ڈے کی تاریخ میں کوئی دوسرا بلے باز اپنے کیریئر کے ابتدائی پانچ میچز میں اتنے رنز نہیں بنا سکا تھا۔
ابتدائی پانچ اننگز کے بعد اگلی چار اننگز میں وہ خاطر خواہ کارکردگی نہ دکھا سکے اور 4، 42، 17 ناٹ آؤٹ اور 16 رنز بنا سکے تاہم بھارت کے خلاف ون ڈے سیریز کے ابتدائی دونوں میچز میں انہوں نے نصف سنچریاں سکور کرتے ہوئے 72 اور 68 رنز کی اننگز کھیلیں۔
ان اننگز کی بدولت انہوں نے ون ڈے کیریئر کے ابتدائی 11 میچز میں 68.20 کی اوسط سے 682 رنز بنالیے ہیں جو ون ڈے کرکٹ میں نیا ریکارڈ ہے، اس سے قبل کوئی بلے باز اپنے کیریئر کے ابتدائی 11 ون ڈے میچز میں اتنے رنز نہیں بنا سکا۔
