حکومت چیف الیکشن کمشنر کی تقرری کیلئے مشاورت شروع کرے: اپوزیشن لیڈر آزاد کشمیر
مظفرآباد: ( دنیا نیوز) آزاد جموں و کشمیر قانون ساز اسمبلی میں قائد حزب اختلاف شاہ غلام قادر نے چیف الیکشن کمشنر کی تقرری کے لیے وزیراعظم فیصل ممتاز راٹھور کو خط لکھ دیا۔
اپوزیشن لیڈر نے خط میں لکھا کہ چیف الیکشن کمشنر کی تقرری کیلئے مشاورت کا آغاز کیا جائے، چیف الیکشن کمشنر کی تقرری آئینی فریضہ ہے، آئین کے تحت وزیراعظم آزاد کشمیر کی جانب سے اس پر مشاورت اپوزیشن لیڈر سے لازمی قرار دی گئی یے۔
انہوں نے کہا کہ چیف الیکشن کمشنر کا منصب عرصہ سے خالی چلا آرہا ہے، ریاست کے انتخابی عمل اور آئینی ذمہ داریوں پر منفی اثرات مرتب ہو رہے ہیں ، آمدہ انتخابات کے بروقت انعقاد کیلئے چیف الیکشن کمشنر اور ممبران کا تقرر لازمی ہے۔
مکتوب میں کہا گیا ہے کہ آئینی تقاضوں کے مطابق آئینی تقرری کو مزید تاخیر کا شکار نہ ہونے دیا جائے، آئینی تقاضے پورے کر کے فوری مشاورت کا آغاز کیا جائے، ہنگامی میٹنگ کے انعقاد کیلئے ضروری اقدامات کیئے جائیںں، یہ منصب ریاستی ڈھانچے کا بنیادی ستون ہے۔
واضح رہے کہ آزاد جموں و کشمیر میں عام انتخابات سال 2026 جولائی میں ہوں گے۔
