ساہیوال ریجن کے 49 شہداء پولیس کی فیملیز کو پلاٹس فراہم
لاہور: (دنیا نیوز) شہداء پولیس کے اہل خانہ کو گھروں کی فراہمی کا مشن، ساہیوال ریجن کے 49 شہداء پولیس کی فیملیز کو پلاٹس کی فراہمی کی تقریب کا انعقاد ہوا۔
آئی جی پنجاب ڈاکٹر عثمان انور نے تقریب میں بطور مہمان خصوصی شرکت کی، اراکین قومی و صوبائی اسمبلی، کمشنر ساہیوال شعیب اقبال سید، ساہیوال ریجن کے تینوں اضلاع کے ڈپٹی کمشنر بھی تقریب میں خصوصی طور پر شریک ہوئے۔
ساہیوال ریجن کے شہداء کے اہل خانہ کی بڑی تعداد نے بھی تقریب میں شرکت کی، آئی جی پنجاب نے شہدا کی لازوال قربانیوں کو خراج تحسین پیش کیا، آئی جی پنجاب نے پولیس شہدا کے لئے پلاٹس فراہم کرنے پر سماجی شخصیت طارق فرشتہ کا خصوصی شکریہ ادا کیا۔
.jpg)
ترجمان پنجاب پولیس کے مطابق ضلع اوکاڑہ کے 24، پاکپتن 20، ضلع ساہیوال کے 5 شہداء کی فیملیز کو پلاٹس کے ملکیتی کاغذات دیئے گئے۔
آر پی او ساہیوال محبوب رشید نے بتایا کہ ساہیوال ریجن کے 2017ء سے قبل کے تمام 76 شہداء کی فیملیز کو پلاٹس فراہم کئے جا چکے۔
آئی جی پنجاب ڈاکٹر عثمان انور نے کہا کہ پنجاب پولیس کے مختلف اضلاع کے 2017ء سے قبل کے 701 شہداء کے اہل خانہ کو پلاٹس فراہم کیے جا چکے ہیں، پنجاب پولیس نے اپنے وسائل سے پلاٹس پر گھروں کی تعمیر کیلئے 04 کروڑ 90 لاکھ روپے بھی فراہم کئے ہیں۔
ڈاکٹر عثمان انور نے شہدا پولیس کے اہل خانہ کے لیے پلاٹس کا انتظام کرنے پر آر پی او ساہیوال، تینوں اضلاع کے ڈی پی اوز کی کارکردگی کو سراہا۔
.jpg)
آر پی او ساہیوال محبوب رشید، ڈی آئی جی ویلفیئر اینڈ فنانس غازی محمد صلاح الدین، ڈی پی او ساہیوال رانا طاہر رحمن خان، ڈی پی او اوکاڑہ محمد راشد ہدایت، ڈی پی او پاکپتن جاوید اقبال چدھڑ سمیت دیگر افسران بھی تقریب میں موجود تھے۔
