سنگ دلی کا ایک واقعہ
اگلے روز سندھ کے ضلع سانگھڑ کے علاقے میں کسی سنگ دل وڈیرے نے کھیت میں داخل ہونے والے اونٹ پر جو ظلم ڈھایا اس نے پاکستانی قوم کوشدید غمزدہ کیا ہے۔ یہ واقعہ عالمی سطح پر ملکی تشخص کے لیے بھی شدید منفی اثرات کا حامل ہے۔ دین اسلام میں جانوروں کے ساتھ بھی حسن سلوک کی تلقین کی گئی ہے ۔ انسانیت کے ناتے سے بھی کوئی جانور پر ایسا ظلم ڈھانے کا حوصلہ نہیں کر سکتا۔ ضروری ہے کہ اس واقعے کے ذمہ داروں کے خلاف قانونی کارروائی کی جائے ۔متاثرہ اونٹ کاعلاج بھی حکومتی ذمہ داری ہے۔ اگرچہ کسی علاج اور مصنوعی ٹانگ سے اُس تکلیف اور اُن چیخوں کا مداوا نہیں ہو سکتا جو سوشل میڈیا پر وائرل ہونے والی وڈیو میں سنائی دیتی ہیں اور کلیجہ منہ کو آتا ہے۔آدمی یہ سوچ کر حیران و پریشان ہو جاتا ہے کہ ہمارے سماج میں کس قدر سنگ دل لوگ پائے جاتے ہیں ‘جن کے ظلم سے نہ انسان محفوظ ہیں اور نہ ہی جانور۔ جانور کے کسی کھیت میں داخل ہو جانے سے کھیت کا کوئی بڑا نقصان نہیں ہو گیا ہو گا‘ بالفرض ہو ا بھی ہے تو بھی ایک زندہ جانور کی ٹانگ کاٹ دینے جیسے وحشت ناک عمل کی کوئی توضیح نہیں پیش کی جاسکتی۔ سندھ حکومت کو اس واقعے پر سنجیدگی سے اقدامات کرنا ہوں گے بصورت دیگر دنیا یہ سمجھنے پر مجبور ہو گی کہ صوبہ سندھ میںوہ اندھیر نگری ہے کہ نہ انسانی جانیں محفوظ ہیں اور نہ ہی بے زبان۔
