اوور بلنگ انکوائری
ایک خبر کے مطابق پاور ڈویژن نے اوور بلنگ کے حوالے سے انکوائری داخلِ دفتر کر دی ہے اور چار ماہ گزرنے کے بعد بھی اوور بلنگ میں ملوث افراد کے خلاف کوئی کارروائی نہیں کی جا سکی۔اس سال اپریل تا جون‘ نیپرا نے بجلی کی تمام تقسیم کار کمپنیوں کو اوور بلنگ میں ملوث قرار دیتے ہوئے ملوث اہلکاروں کے خلاف کارروائی کا اعلان کیا تھا جبکہ مئی میں اوور بلنگ پر تین سال کی سزا کا بل بھی منظور کیا گیا تھا اور اوور بلنگ پر کارروائی کا اختیار بھی ایف آئی اے سے لے کر نیپرا کو دیا گیا تھا۔ اس سے پہلے ترسیلی کمپنیاں متعلقہ اہلکاروں کے خلاف خود ہی انکوائری کرتی تھیں اور اکثر افسران اور اہلکاروں کو بے قصور قرار دے کر اوور بلنگ کا بوجھ عوام پر منتقل کر دیا جاتا تھا۔ چند اہلکاروں کی حرکت کا خمیازہ عوام ہی کو بھگتنا پڑتا اور زیادہ یونٹس ڈالنے سے نہ صرف بجلی کا سیلب ریٹ تبدیل ہونے سے کئی گنا زیادہ بل ادا کرنا پڑتا بلکہ پروٹیکٹڈ کیٹیگری کے صارفین کو آئندہ چھ ماہ تک مہنگی بجلی خریدنا پڑتی۔ عموماً بجلی کے ترسیلی خسارے اور محکمانہ کوتاہیوں کو چھپانے کیلئے اوور بلنگ کی جاتی ہے اور سارا بوجھ بے قصور صارفین پر ڈال دیا جاتا ہے۔ ضروری ہے کہ اوور بلنگ میں ملوث اہلکاروں کے خلاف کارروائی کو پایہ تکمیل تک پہنچایا جائے۔ عوام مجرمانہ غفلت کا بہت خمیازہ بھگت چکے ہیں‘ اب کرپٹ اہلکاروں کو اپنے کیے کی سزا ملنی چاہیے۔
