خواہش ہے نوازشریف سے پوچھوں ’’مجھے کیوں نکالا‘‘،عشرت العباد
ابھی حالات نے کئی کروٹیں بدلنی ہیں،لگتا نہیں کہ عام انتخابات بروقت ہونگے لندن والے کے خودکش دھماکوں کی وجہ سے کراچی سے اسکا کردارختم ہورہاہے،گفتگو
لاہور (سلمان غنی) سندھ کے سابق گورنر ڈاکٹر عشرت العباد نے کہا ہے کہ خواہش ہے نوازشریف سے مل کر پوچھوں کہ ‘‘مجھے کیوں نکالا’’ ،کراچی میں امن و امان سکیورٹی فورسز نے بحال کر دیا لیکن مستقل امن کے لیے سیاسی جماعتوں کو کردار ادا کرنا پڑے گا۔ دیکھتے ہیں کہ سیاسی خلا کون پُر کرتا ہے ،انہوں نے کہاکہ کراچی میں آل پارٹیز کانفرنس کی کوشش بغیر کسی ہوم ورک کے تھی۔کراچی میں مستقبل اسی کا ہو گا جو کراچی کے مسائل سے سنجیدہ ہو گا۔ کراچی میں لندن کا کردار آئے روز لندن والے کے خودکش دھماکوں سے ختم ہو رہا ہے ۔ دبئی سے دنیا نیوز سے خصوصی بات چیت کرتے ہوئے سابق گورنر سندھ نے امریکہ کی پالیسی کو پاکستان کے لیے خطرناک قرار دیتے ہوئے کہا کہ یہ ہماری آنکھیں کھولنے کے لیے کافی ہے ۔ امریکہ کو موثر جواب نہ دیا گیا تو پاکستان کو ٹارگٹ کرنے کا عمل جاری رہے گا۔ دہشت گردی میں پاکستان کے کردار کو ٹارگٹ کرنے والا امریکہ خود جوائنٹ آپریشن کا حصہ تھا تو پھر یہ ناکامی خود امریکہ کی ہے خوامخواہ پاکستان کو موردالزام ٹھہرا کر اپنی شکست کی پردہ پوشی کی جا رہی ہے ۔ انہوں نے نوازشریف کے سیاسی مستقبل کے حوالے سے کہا کہ سیاسی آپشنز کے استعمال کا ایک وقت ہوتا ہے انہیں چاہیے کہ صبروتحمل سے کام لیں۔ میں نہ مانوں کی روش اور اداروں کو ٹارگٹ کرنے کا عمل اچھے نتائج پیدا نہیں کرتا انہیں چاہیے کہ اپنے مخلص ساتھیوں کے ساتھ بیٹھیں ٹھنڈے دل سے غور کریں راستہ نکل سکتا ہے ، بلاوجہ کی فائرنگ ہنگامہ تو پیدا کر سکتی ہے مگر مسئلہ کا حل نہیں نکال سکتی ،فی الحال نہیں کہا جا سکتا کہ عام انتخابات بروقت ہوں گے یا نہیں کیونکہ ابھی حالات نے کئی کروٹیں بدلنی ہیں۔
