آئین و قانون کی بالادستی سب کیلئے ہونی چاہیے :اعظم نذیر
لاہور(مانیٹرنگ ڈیسک)وفاقی وزیر قانون اعظم نذیر تارڑ نے لاہور ہائیکورٹ واقعہ کو تکلیف دہ قرار دے دیا۔
انہوں نے لاہور میں پنجاب بار کونسل میں چیکس تقسیم کرنیکی تقریب سے خطاب کرتے کہا پنجاب حکومت نے بار کونسل کیلئے ایک ارب کے فنڈز مختص کیے ، تاریخ میں آج تک پنجاب حکومت نے وکلا کیلئے اتنا بڑا پیکیج نہیں دیا۔ آئین و قانون کی بالادستی عدلیہ اور حکومت سمیت سب کیلئے ہونی چاہیے ، عدلیہ اپنی حدود سے باہر جائے تو وکلا چیک کرتے ہیں، گزشتہ دنوں لاہور بار ایسوسی ایشن کے معاملے پر جو ہوا وہ بہت تکلیف دہ تھا۔ نہتے وکلا بارے احکامات بہت بڑی زیادتی تھی، لاہور ہائیکورٹ نے حکماً کہا کہ آپ دروازے بند کردیں اور کوئی وکیل اندر داخل نہیں ہوگا، یہ کام تو مارشل لا ادوار اوروکلا تحریک میں بھی نہیں ہوا جب وکلا کو انتہا درجے کی ریاستی دہشتگردی کا سامنا تھا، 3 نومبر کے بعد بھی وکلا پر لاہور ہائیکورٹ کا دروازہ بند نہیں ہوا۔وزیراعلیٰ پنجاب نے فوری ایکشن لیتے کہا وکلا دہشتگرد نہیں بلکہ قانون کے رکھوالے ہیں، اپنے حق کیلئے احتجاج کر رہے ہیں یہ دہشتگردی نہیں، اسی وقت سب کو رہا کردیا گیا، آج کی میٹنگ میں یہ بات طے ہوئی ہے کہ جلسے جلوسوں پر کسی وکیل پر دہشتگردی کا مقدمہ درج نہیں ہوگا۔ بار ایسوسی ایشنز کو بھی خود احتسابی کرنا ہوگی، وکلا کو چاہیے کہ وہ کسی توڑ پھوڑ ،تالہ بندی کا حصہ اورانصاف فراہمی میں رکاوٹ نہ بنیں۔
