صدر زرداری سے وزیر اعلیٰ بلوچستان اور صوبائی وزراء کی ملاقات
اسلام آباد،کوئٹہ( سٹاف رپورٹر) صدر مملکت آصف علی زرداری نے کہا ہے کہ صوبے کی آبی ضروریات پوری کرنے ، زراعت کے فروغ اور غذائی تحفظ کیلئے وفاقی حکومت کے تعاون سے کچّھی کینال کی جلد تکمیل ضروری ہے ۔
یہ بات انہوں نے اتوار کو ایوان صدر میں وزیر اعلیٰ بلوچستان میر سرفراز احمد بگٹی ،صوبائی وزراء میر علی حسن زہری،حاجی علی مدد جتک ،ظہور احمد بلیدی، بابا غلام رسول عمرانی، صادق عمرانی سے ملاقات کے دوران گفتگو کر تے ہوئے کہی، ملاقات میں وزیر اعلیٰ بلوچستان اور صوبائی وزراء نے صدر مملکت کو صوبے کی مجموعی صورتحال ،صوبے میں امن و امان سمیت اپنے محکموں کی کارکردگی کے بارے میں آگاہ کیا ، وزیر اعلی بلوچستان نے صدر مملکت کو عوامی فلاح کیلئے صوبے میں جاری ترقیاتی منصوبوں پر بریفنگ دی جس پر صدر مملکت نے بلوچستان کی ترقی و خوشحالی کیلئے منصوبوں کی جلد تکمیل پر زور دیا۔ اس موقع پر صدر مملکت آصف علی زرداری نے صوبے میں جاری منصوبوں اور امن و امان کیلئے صوبائی حکومت کے اقدامات پر اطمینان کا اظہار کر تے ہوئے کہا کہ صوبائی حکومت بلوچستان کی ترقی اور عوامی خوشحالی کیلئے موثر اقدامات اْٹھائے ۔
