حکومت نئے پن بجلی منصوبوں سے پیچھے ہٹنے لگی
اسلام آباد(نمائندہ دنیا)حکومت بجلی کے مزید پیداواری منصوبے لگانے کے پروگرام سے پیچھے ہٹنے لگی، پی پی آئی بی نئے پاور پلانٹس کے لئے ایل او آئی نہیں دیگا ،جاری پن بجلی منصوبے پہلی ترجیح ہوگی ۔
ذرائع کے مطابق حکومت بجلی کا نیا ترسیلی نظام بچھا کر خرابیاں دور کریگی ۔ زیر تعمیر پن بجلی منصوبوں کے علاوہ تھرمل ذرائع سے کوئی نیا منصوبہ نہیں لگے گا۔ حکومت کی طرف سے بجلی کی پیداواری صلاحیت توسیعی منصوبے پر عملدرآمد روکنے کا امکان بھی ظاہر کیا گیا۔ ذرائع کے مطابق پی پی آئی بی نے نئے پاور پلانٹس کے لئے ایل او آئی نہ دینے کا فیصلہ کیا ہے ۔ جاری بجلی منصوبوں سے مستقبل میں بجلی کی طلب پوری ہو جائے گی، وزرات توانائی کے ذرائع نے بتایا ہے کہ حکومت نے 2031 تک مزید 17ہزار میگاواٹ سے زائد نئے منصوبوں کا پلان بنایا تھا ، جس سے بجلی کی پیداواری صلاحیت 68ہزار میگاواٹ سے زائد کی ہونے کی توقع تھی ،بجلی کے توسیعی پلان کی منظوری نیپرا سے لی گئی تھی۔2031تک 8ہزار میگاواٹ سے زائد مہنگے منصوبے مدت پوری کر لیں گے ۔ اس وقت ملک میں بجلی کی پیداواری صلاحیت 41 ہزار میگاواٹ سے زائد ہے ۔ جاری پن بجلی منصوبے مکمل ہونے سے 10ہزار میگاواٹ سے زائد بجلی سسٹم میں شامل ہو جائے گی۔
